രണ്ടാഴ്ച, 1500 കോടി! ആഗോള ബോക്‌സ് ഓഫീസില്‍ 'ധുരന്ധര്‍' തരംഗം

ഇന്ത്യന്‍ സിനിമയുടെ ചരിത്രതാളുകള്‍ തിരുത്തിക്കുറിച്ചുകൊണ്ട് ആദിത്യ ധറിന്റെ ആക്ഷന്‍ വിസ്മയം 'ധുരന്ധര്‍: ദി റിവഞ്ച്' ബോക്‌സ് ഓഫീസില്‍ ജൈത്രയാത്ര തുടരുന്നു. റിലീസ് ചെയ്ത് വെറും രണ്ടാഴ്ച പിന്നിടുമ്പോള്‍, ലോകമെമ്പാടുമുള്ള തിയേറ്ററുകളില്‍ നിന്ന് 1,501 കോടി രൂപ എന്ന അവിശ്വസനീയമായ നേട്ടമാണ് ചിത്രം സ്വന്തമാക്കിയത്. ഇന്ത്യന്‍ സിനിമയിലെ എക്കാലത്തെയും വലിയ ഓപ്പണിംഗ് റെക്കോര്‍ഡുകള്‍ തകര്‍ത്തുകൊണ്ട് തുടങ്ങിയ ഈ നേട്ടം. സിനിമ ഇപ്പോഴും തളര്‍ച്ചയില്ലാതെ മുന്നേറുകയാണ്.

ആഭ്യന്തര വിപണിയില്‍ മാത്രം 1,134 കോടി രൂപ ഗ്രോസ് കളക്ഷന്‍ നേടിയ ചിത്രം, ഇന്ത്യയിലെ നെറ്റ് കളക്ഷനില്‍ 1,000 കോടി എന്ന മാന്ത്രിക സംഖ്യയിലേക്ക് അടുക്കുകയാണ്. നിലവില്‍ 961 കോടി രൂപ നെറ്റ് കളക്ഷന്‍ നേടിയ ചിത്രം, വെറും 15 ദിവസത്തിനുള്ളിലാണ് ഈ നാഴികക്കല്ല് പിന്നിട്ടത് എന്നത് ട്രേഡ് അനലിസ്റ്റുകളെപ്പോലും ഞെട്ടിച്ചിരിക്കുകയാണ്. പ്രവൃത്തിദിവസങ്ങളില്‍ പോലും മികച്ച കളക്ഷന്‍ നിലനിര്‍ത്തുന്ന ചിത്രം വരും ദിവസങ്ങളില്‍ ഇന്ത്യയിലെ ഏറ്റവും വലിയ ഹിറ്റായി മാറുമെന്ന് ഉറപ്പായിക്കഴിഞ്ഞു.

സാധാരണ വലിയ റിലീസുകള്‍ക്ക് രണ്ടാം വാരം സംഭവിക്കാറുള്ള ഇടിവ് ധുരന്ധറിനെ ബാധിച്ചിട്ടില്ല. ആദ്യ ആഴ്ചയില്‍ 690 കോടി നേടിയ ചിത്രം, രണ്ടാം വാരത്തില്‍ മാത്രം 271 കോടി രൂപ അധികമായി സ്വന്തമാക്കി. രണ്ടാം വാരത്തിലെ തിങ്കള്‍ മുതല്‍ വ്യാഴം വരെയുള്ള ദിവസങ്ങളില്‍ യഥാക്രമം 26, 28, 21, 19 കോടി രൂപ വീതം നേടിയത് ചിത്രത്തോടുള്ള പ്രേക്ഷകരുടെ അടങ്ങാത്ത താല്‍പ്പര്യമാണ് കാണിക്കുന്നത്. ഉത്തരേന്ത്യയില്‍ മാത്രമല്ല, ആഗോള വിപണിയിലും ചിത്രം സമാനതകളില്ലാത്ത ആധിപത്യം തുടരുന്നു.

വിദേശ രാജ്യങ്ങളില്‍ നിന്ന് മാത്രം 367 കോടി രൂപ സമാഹരിച്ച ചിത്രം വടക്കേ അമേരിക്കയില്‍ ഏറ്റവും കൂടുതല്‍ പണം വാരിക്കൂട്ടിയ ഇന്ത്യന്‍ സിനിമ എന്ന ഖ്യാതിയും സ്വന്തമാക്കി. ജിയോ സ്റ്റുഡിയോസും ബി62 സ്റ്റുഡിയോസും ചേര്‍ന്ന് നിര്‍മ്മിച്ച ഈ ബിഗ് ബജറ്റ് ചിത്രം, ഏറ്റവും വേഗത്തില്‍ 100 കോടി മുതല്‍ 900 കോടി വരെ പിന്നിടുന്ന ഇന്ത്യന്‍ സിനിമയായും മാറി. നിലവിലെ ട്രെന്‍ഡ് തുടര്‍ന്നാല്‍, ലോക സിനിമയ്ക്ക് മുന്നില്‍ ഇന്ത്യന്‍ സിനിമയുടെ സാധ്യതകള്‍ പുനര്‍നിര്‍വചിക്കുന്ന പുതിയൊരു ബെഞ്ച്മാര്‍ക്ക് ആയിരിക്കും ഈ ചിത്രം കുറിക്കുക.