എന്‍ ആര്‍ ഐക്ക് ലൈഫ് ഇന്‍ഷുറന്‍സ് എടുക്കാമോ?

എന്‍ ആര്‍ ഐ-കള്‍ക്ക് (non resident ഇന്ത്യൻസ്; NRI) പരിഗണിക്കാവുന്ന വിവിധ ലൈഫ് ഇന്‍ഷുറന്‍സ് പദ്ധതികളുണ്ട്. പക്ഷെ, അതിനു മുൻപ് ഇന്ത്യയിലും വിദേശത്തും ലൈഫ് ഇന്‍ഷുറന്‍സ് വാങ്ങുന്നതുമായി ബന്ധപ്പെട്ട നിയമങ്ങള്‍ വ്യക്തമായി അറിഞ്ഞിരിക്കേണ്ടത് അത്യാവശ്യമാണ്.

ഫോറിന്‍ എക്സ്ചേഞ്ച് മാനേജ്മെന്റ് ആക്ട് (FEMA; ഫെമ) പ്രകാരം എല്ലാ എന്‍ ആര്‍ ഐ-കള്‍ക്കും ലൈഫ് ഇന്‍ഷുറന്‍സ് പദ്ധതിയില്‍ അംഗമാകാം. ഈ രീതിയില്‍, എന്‍ ആര്‍ ഐ-കള്‍ക്ക് അവര്‍ താമസിക്കുന്ന രാജ്യം ഏതാണെന്ന് നോക്കാതെ തന്നെ ടേം ഇന്‍ഷുറന്‍സും മറ്റ് ലൈഫ് ഇന്‍ഷുറന്‍സ് പോളിസികളും വാങ്ങാന്‍ കഴിയും.

പ്രീമിയം ഒരു നോണ്‍ റസിഡന്റ് ഓര്‍ഡിനറി (NRO) ബാങ്ക് അക്കൗണ്ട്, നോണ്‍ റെസിഡന്‍ഷ്യല്‍ എക്‌സ്‌റ്റേണല്‍ (NRE) ബാങ്ക് അക്കൗണ്ട് അല്ലെങ്കില്‍ വിദേശ കറന്‍സി വഴി അടക്കാവുന്നതാണ്.

പോളിസി ചെലവ്: ഒരു പോളിസി വാങ്ങുന്നതിന് മുമ്പ് ശരിയായ അന്വേഷണം നടത്തണം. സ്വന്തം രാജ്യത്തോ വിദേശത്തോ പോളിസി മൂല്യമുള്ളതാണോ എന്ന് പരിശോധിച്ച് പോളിസി ചെലവ് വിലയിരുത്തണം.

മെഡിക്കല്‍ പരിശോധന: എന്‍ ആര്‍ ഐ-കള്‍ക്ക് വിദേശത്ത് ടേം ലൈഫ് ഇന്‍ഷുറന്‍സ് പോളിസി വാങ്ങാം. എന്നാല്‍ അവര്‍ വിദേശത്ത് വൈദ്യ പരിശോധനയ്ക്ക് വിധേയരാകുകയും റിപ്പോര്‍ട്ട് ഇന്ത്യയിലെ ഇന്‍ഷുറര്‍ക്ക് അയയ്ക്കുകയും വേണം.

ഇതിന്റെ പരിശോധനാ ചെലവ് സ്വന്തമായി വഹിക്കേണ്ടിവരും. ഇന്ത്യയില്‍ പോളിസി വാങ്ങുകയാണെങ്കില്‍, അധിക മെഡിക്കല്‍ പരിശോധനാ ചെലവ് നല്‍കേണ്ടതില്ല.

നികുതി: നിങ്ങള്‍ ഇന്ത്യയില്‍ ടേം ഇന്‍ഷുറന്‍സ് വാങ്ങുമ്പോള്‍, ഒരു പോളിസിയില്‍ നിന്ന് നിങ്ങള്‍ക്ക് നിരവധി ആനുകൂല്യങ്ങള്‍ ലഭിക്കും. സാധാരണയായി, ഇന്ത്യയിലെ ആദായനികുതി നിയമങ്ങള്‍ക്ക് കീഴില്‍ ഡെത്ത് ബെനിഫിറ്റ് തുകയ്ക്ക് നികുതി ഈടാക്കാറില്ല.

എന്നാല്‍ എന്‍ ആര്‍ ഐ-കള്‍ക്ക് വിദേശത്ത് ലഭിക്കുന്ന ഇന്‍ഷുറന്‍സ് തുകയ്ക്ക് നികുതി നല്‍കേണ്ടി വന്നേക്കാം. വിദേശത്ത് നിലവിലുള്ള നികുതി നിയമങ്ങള്‍ വിദേശ വരുമാനത്തിന്റെ നികുതി നിശ്ചയിക്കുന്നു. അതിനാല്‍, ഏതെങ്കിലും പോളിസി എടുക്കുന്നതിനു മുൻപ് എന്‍ ആര്‍ ഐ-കള്‍ താമസിക്കുന്ന രാജ്യത്തെ നികുതി വ്യവസ്ഥകള്‍ പരിശോധിക്കണം.