രാജ്യത്ത് ഏറ്റെടുക്കല്‍ വേട്ട, എസിസിയും അംബുജയും അദാനിക്ക്, എഫ്എംസിജി ബ്രാന്‍ഡുകള്‍ക്കായി അംബാനി

ശതകോടീശ്വരന്മാരായ അദാനിയും അംബാനിയും അവരുടെ സാമ്രാജ്യത്തിന്റെ വ്യാപ്തി വര്‍ധിപ്പിക്കുന്നതിനുള്ള മത്സരത്തിലാണ്. ഫോര്‍ബ്സ് അടുത്തിടെ പുറത്ത് വിട്ട ആഗോള കോടീശ്വരന്മാരുടെ പട്ടിക പ്രകാരം 90.7 ബില്യണ്‍ യുഎസ് ഡോളര്‍ ആസ്തിയുമായി മുകേഷ് അംബാനി പത്താം സ്ഥാനത്തും, 90 ബില്യണ്‍ യുഎസ് ഡോളര്‍ ആസ്തിയുമായി ഗൗതം അദാനിയും കുടുംബവും പതിനൊന്നാം സ്ഥാനത്തുമാണ്. പുതിയ ഏറ്റെടുക്കലുകളിലൂടെ രാജ്യത്തെ മുന്‍നിര കോര്‍പ്പറേറ്റുകള്‍ പുതിയ മേഖലകളിലേക്ക് ചിറക് വിരിക്കുന്നു.

സ്വിസ് സിമന്റ് ഭീമനായ ഹോള്‍സിം ഗ്രൂപ്പിന്റെ ഇന്ത്യന്‍ ആസ്തികളായ അംബുജ സിമെന്റിനെയും എസിസിയെയും കടുത്ത മത്സരത്തിനൊടുവില്‍ 10.5 ബില്യണ്‍ ഡോളറിന് അദാനി കഴിഞ്ഞ ദിവസം സ്വന്തമാക്കി . ഇന്‍ഫ്രാസ്ട്രക്ച്ചര്‍ മേഖലയിലെ തന്നെ ഏറ്റവും വലിയ ഏറ്റെടുക്കലിലൂടെ അദാനി ഇന്ത്യയിലെ രണ്ടാമത്തെ സിമന്റ് ഉത്പാദകരായി ഇതോടെ മാറും. അംബുജ സിമന്റ്‌സില്‍ 63.19 ശതമാനവും, എസിസിയില്‍ 54.53 ശതമാനവും (ഇതില്‍ 50.05 ശതമാനവും അംബുജ സിമന്റ്‌സിലൂടെയാണ്) ഓഹരി ഹോള്‍സിമിന് അതിന്റെ അനുബന്ധ സ്ഥാപനങ്ങള്‍ വഴിയുണ്ട്.തുറമുഖങ്ങള്‍, വൈദ്യുത നിലയങ്ങള്‍, കല്‍ക്കരി ഖനികള്‍ എന്നിവയിലാണ് അദാനി ഗ്രൂപ്പ് മുഖ്യമായും ശ്രദ്ധ കേന്ദ്രീകരിച്ചിരുന്നത്.

എന്നാലിപ്പോള്‍ ഇവയ്ക്ക് പുറമേ എയര്‍പോര്‍ട്ടുകള്‍, ഡാറ്റാ സെന്ററുകള്‍, ക്ലീന്‍ എനര്‍ജി എന്നീ മേഖലകളിലേക്ക് കഴിഞ്ഞ രണ്ട് വര്‍ഷങ്ങളായി അദാനി ബിസിനസ് വൈവിധ്യവത്ക്കരണം നടത്തിയിരുന്നു. മാത്രമല്ല കഴിഞ്ഞ രണ്ട് വര്‍ഷക്കാലയളവിനിടെ അദാനി സിമന്റേഷന്‍ ലിമിറ്റഡ് എന്ന പേരില്‍ ഗുജറാത്തിലും മഹാരാഷ്ട്രയിലും രണ്ട് സിമന്റ് നിര്‍മ്മാണ പ്ലാന്റുകളും അദാനി നിര്‍മ്മിച്ചിരുന്നു. ഇപ്പോള്‍ ഹോള്‍സിം ഏറ്റെടുക്കല്‍ കൂടി പൂര്‍ത്തിയാകുന്നതോടെ രാജ്യത്തെ സിമന്റ് വ്യാപാരവും അദാനിയുടെ നിയന്ത്രണത്തിലേക്ക് എത്തും. രാജ്യത്തെ സിമന്റ് ഉത്പാദനം കണക്കാക്കിയാല്‍ പ്രതിവര്‍ഷം 119.95 മില്യണ്‍ ടണ്‍ ഉത്പാദനത്തോടെ അള്‍ട്രാടെക്ക് സിമന്റ്സാണ് ഒന്നാമത്. അംബുജയ്ക്കും എസിസിയ്ക്കും ചേര്‍ത്ത് 70 മില്യണ്‍ ടണ്‍ ഉത്പാദനമാണുള്ളതെന്നും റിപ്പോര്‍ട്ടുകള്‍ വ്യക്തമാക്കുന്നു.

സിമന്റിന് പിന്നാലെ മാധ്യമവും

സിമന്റ് വിപണിയ്ക്ക് പുറമേ മാധ്യമ സ്ഥാപനം വഴി ബിസിനസ് സാമ്രാജ്യത്തിന് ഇരട്ടി കരുത്തുറപ്പാക്കാനുള്ള നീക്കത്തിലാണ് ഗൗതം അദാനി. അടുത്തിടെയാണ് എഎംജി മീഡിയ നെറ്റ്വര്‍ക്ക്സ് എന്ന പേരില്‍ അദാനി എന്റര്‍പ്രൈസ് സ്വന്തം മാധ്യമ വിഭാഗം സൃഷ്ടിച്ചത്. എന്നാലിപ്പോള്‍ ആഴ്ച്ചകളുടെ വ്യത്യാസത്തില്‍ രാഘവ് ബാഹ്ലിന്റെ ഉടമസ്ഥതയിലുള്ള ക്വിന്റില്യണ്‍ ബിസിനസ് മീഡിയ പ്രൈവറ്റ് ലിമിറ്റഡില്‍ (ക്യുബിഎംഎല്‍) 49 ശതമാനം ഓഹരി വാങ്ങാനൊരുങ്ങുകയാണ് അദാനി. എന്നാല്‍ ഏറ്റെടുക്കലിന്റെ ആകെ മൂല്യം എത്രത്തോളമാണെന്ന് പുറത്ത് വിട്ടിട്ടില്ല. മുന്‍നിര ബിസിനസ് ന്യൂസ് ഡിജിറ്റല്‍ പ്ലാറ്റ്ഫോമായ 'ബ്ലൂംബെര്‍ഗ് ക്വിന്റ്' ക്യുബിഎംഎല്ലിന്റെ ഉടമസ്ഥതയിലുള്ളതാണ്. ഇക്കഴിഞ്ഞ മാര്‍ച്ച് ഒന്നിനാണ് അദാനി എന്റര്‍പ്രൈസസും ക്യുബിഎംഎല്ലും ഇത് സംബന്ധിച്ച് ധാരണാപത്രം ഒപ്പിട്ടത്. ഇതോടെ മാധ്യമ മേഖലയിലുടെയും ബിസിനസ് വ്യാപതി വര്‍ധിപ്പിക്കുവാനൊരുങ്ങുകയാണ് അദാനി.

റിലയന്‍സിന്റെ ഏറ്റെടുക്കല്‍ 'വേട്ട', 50,000 കോടി ഇറക്കും

പലവ്യഞ്ജനം, ഗാര്‍ഹിക ആവശ്യങ്ങള്‍ക്കുള്ളവ, സൗന്ദര്യവര്‍ധക ഉത്പന്നങ്ങള്‍ തുടങ്ങി 60 ബ്രാന്‍ഡുകളെ ഏറ്റെടുക്കാനുള്ള നീക്കത്തിലാണ് മുകേഷ് അംബാനിയുടെ ഉടമസ്ഥതയിലുള്ള റിലയന്‍സ് റീട്ടെയില്‍ എന്ന് റിപ്പോര്‍ട്ടുകള്‍ പറയുന്നു. ഏകദേശം 50,000 കോടി രൂപ ഇതിനായി നിക്ഷേപിക്കുമെന്നും സൂചനയുണ്ട്. ഏറ്റെടുക്കല്‍ സംബന്ധിച്ച കൂടുതല്‍ വിവരങ്ങള്‍ പുറത്ത് വന്നിട്ടില്ല. ഇവ പൂര്‍ത്തിയായാല്‍ യൂണിലീവര്‍ അടക്കമുള്ള കമ്പനികള്‍ക്ക് വലിയ മത്സരം നേരിടേണ്ടി വരും. മാത്രമല്ല വിലക്കിഴിവ് നല്‍കി വിപണി കീഴടക്കുന്ന 'ജിയോ മാര്‍ട്ടി'ന്റെ ബിസിനസ് തന്ത്രത്തിന് ഏറ്റെടുക്കല്‍ ഊര്‍ജ്ജം പകരുമെന്നുറപ്പ്. നിലവില്‍ ഏകദേശം 30 പ്രാദേശിക കണ്‍സ്യൂമര്‍ ബ്രാന്‍ഡുകളുമായി റിലയന്‍സ് ചര്‍ച്ചയിലാണെന്ന് റിപ്പോര്‍ട്ടുകള്‍ വന്നിട്ടുണ്ട്.