സ്ഥിര നിക്ഷേപങ്ങളുടെ പലിശ നിരക്ക് വര്‍ധിപ്പിച്ച് പിഎന്‍ബി

പഞ്ചാബ് നാഷണല്‍ ബാങ്ക് (പിഎന്‍ബി) രണ്ട് കോടി രൂപയില്‍ താഴെയുള്ള സ്ഥിര നിക്ഷേപങ്ങളുടെ (എഫ്ഡി) പലിശ നിരക്ക് വര്‍ധിപ്പിച്ചു. ഒന്ന് മുതല്‍ രണ്ട് വര്‍ഷം വരെയും മൂന്ന് വര്‍ഷം വരെയും കാലാവധിയുള്ള സ്ഥിരനിക്ഷേപ പലിശ നിരക്ക് 10 മുതല്‍ 20 ബേസിസ് പോയിന്റുകള്‍ വരെ ബാങ്ക് വര്‍ധിപ്പിച്ചിട്ടുണ്ട്. മറ്റ് സ്ഥിര നിക്ഷേപ കാലാവധികളുടെ പലിശ നിരക്കുകള്‍ മാറ്റമില്ലാതെ നിലനിര്‍ത്തിയിട്ടുണ്ട്. പുതിയ പലിശ നിരക്കുകള്‍ 2022 ജൂലൈ 4 മുതല്‍ പ്രാബല്യത്തില്‍ വരുമെന്ന് ഔദ്യോഗിക വൃത്തങ്ങള്‍ അറിയിച്ചു.

ഒന്നു മുതല്‍ രണ്ടു വര്‍ഷം വരെയുള്ള സ്ഥിരനിക്ഷേപ ങ്ങളുടെ പലിശ നിരക്ക് 10 ബേസിസ് പോയിന്റ് വര്‍ധിപ്പിച്ച് 5.30 ശതമാനമാക്കി. രണ്ട് വര്‍ഷത്തില്‍ കൂടുതലും മൂന്ന് വര്‍ഷം വരെ കാലാവധിയുമുള്ള സ്ഥിരനിക്ഷേപങ്ങള്‍ക്ക് ബാങ്ക് ഇപ്പോള്‍ നല്‍കുന്നത് 5.50 ശതമാനം പലിശ നിരക്കാണ്. ഇത് 20 ബേസിസ് പോയിന്റ് വര്‍ധിപ്പിക്കും. 2022 ജൂണ്‍ 14 മുതല്‍ പ്രാബല്യത്തില്‍ വരുന്ന വിവിധ കാലയളവുകളിലെ സ്ഥിരനിക്ഷേപ പലിശ നിരക്ക് ബാങ്ക് നേരത്തെ പരിഷ്‌കരിച്ചിരുന്നു.

2 കോടിയില്‍ താഴെയുള്ള നിക്ഷേപങ്ങളുടെ എല്ലാ മച്യൂരിറ്റികള്‍ക്കും, മുതിര്‍ന്ന വ്യക്തികള്‍ക്ക് ബാധകമായ കാര്‍ഡ് നിരക്കുകളേക്കാള്‍ 50 അടിസ്ഥാന പോയിന്റുകള്‍ അധികമായി ലഭിക്കുമെന്ന് ബാങ്കിന്റെ വെബ്‌സൈറ്റ് പറയുന്നു. മുതിര്‍ന്ന പൗരന്‍മാരായ ജീവനക്കാര്‍ക്കും വിരമിച്ച ജീവനക്കാര്‍ക്കും ബാധകമായ കാര്‍ഡ് നിരക്കിനേക്കാള്‍ പരമാവധി 150 ബിപിഎസ് പലിശ നിരക്കിന് അര്‍ഹതയുണ്ട്.