ഇന്ത്യയില്‍ ഡിമാന്‍ഡ് കുതിക്കുന്നു; തേരോട്ടത്തിനൊരുങ്ങി ബിവൈഡി

ഇന്ത്യന്‍ വിപണിയില്‍ ചൈനീസ് വാഹന ഭീമനായ ബിവൈഡി ആഴത്തില്‍ ചുവടുറപ്പിക്കുമെന്ന് സൂചന. രാജ്യത്ത് വര്‍ധിച്ചുവരുന്ന ഡിമാന്‍ഡാണ് കമ്പനിയെ ഇതിന് പ്രേരിപ്പിക്കുന്നത്. കമ്പനിക്ക് പ്രീമിയം ഇവി മോഡലുകള്‍ക്കായി നൂറുകണക്കിന് ഓര്‍ഡറുകള്‍ ലഭിച്ചതായി റിപ്പോര്‍ട്ടുണ്ട്. ഇത് ഇന്ത്യന്‍ ഉപഭോക്താക്കളില്‍ ക്ലീന്‍ മൊബിലിറ്റി സൊല്യൂഷനുകള്‍ക്കായുള്ള വര്‍ദ്ധിച്ചുവരുന്ന താല്‍പ്പര്യം സൂചിപ്പിക്കുന്നതാണ്.

ബിവൈഡി തങ്ങളുടെ അടിത്തറ ശക്തിപ്പെടുത്തുന്നതിനും ചെലവ് കുറയ്ക്കുന്നതിനുമായി പ്രാദേശിക അസംബ്ലി ഓപ്ഷനുകള്‍ പരിഗണിക്കുന്നുണ്ടെന്ന് വ്യവസായ മേഖലയിലുള്ളവര്‍ പറയുന്നു.ഇന്ത്യയുടെ ഇവി മേഖല ശക്തി പ്രാപിക്കുകയാണ്. സര്‍ക്കാര്‍ പ്രോത്സാഹനങ്ങളും വര്‍ദ്ധിച്ചുവരുന്ന ഇന്ധന വിലയും കൂടുതൽ പേർ ഇവിയിലേക്ക് തിരിയാൻ കാരണമായിട്ടുണ്ട്. ടാറ്റ മോട്ടോഴ്സ്, മഹീന്ദ്ര തുടങ്ങിയ ആഭ്യന്തര കമ്പനികള്‍ എന്‍ട്രി ലെവല്‍ വിഭാഗത്തില്‍ ആധിപത്യം സ്ഥാപിക്കുമ്പോള്‍, ബിവൈഡി ഈ രംഗത്തെ പ്രീമിയം വിപണിയാണ് ലക്ഷ്യമിടുന്നത്.

കാത്തിരിപ്പ് ഉയരുന്നു

നൂതന സാങ്കേതികവിദ്യയും ദൈര്‍ഘ്യമേറിയ ഡ്രൈവിംഗും ഇഷ്ടപ്പെടുന്നവർക്കും ബിവൈഡി ആകര്‍ഷകമാണ്. കമ്പനിയുടെ ആഗോള വൈദഗ്ദ്ധ്യം ഇന്ത്യയുടെ അതിവേഗം വികസിച്ചുകൊണ്ടിരിക്കുന്ന ഇവി ഇൻഫ്രാസ്ട്രക്ചറിനും ഗുണകരമാകുമെന്നാണ് വിലയിരുത്തൽ.

ബിവൈഡി ഇതിനകം തന്നെ Atto 3 SUV, e6 MPV പോലുള്ള മോഡലുകള്‍ ഇന്ത്യയില്‍ വില്‍ക്കുന്നു. പക്ഷേ ലഭ്യത കുറവാണ്. ഇക്കാര്യം ഡീലര്‍മാര്‍ കമ്പനിയെ അറിയിക്കുന്നുണ്ട്. മാസങ്ങളോളം കാത്തിരിക്കേണ്ടി വരുന്നു എന്നതാണ് പ്രധാന പോരായ്മ.