Tata Motors : പനപാക്കം പ്ലാന്റിൽ ജാഗ്വാർ–ലാൻഡ് റോവർ അസംബ്ലിംഗ്: ടാറ്റ മോട്ടോഴ്സിന്റെ ആഡംബര വാഹന കുതിപ്പ്

ആഡംബര വാഹന വിപണിയിൽ വലിയ മുന്നേറ്റത്തിനൊരുങ്ങുകയാണ് ടാറ്റ മോട്ടോഴ്സ്. തമിഴ്നാട്ടിലെ ചെന്നൈയ്ക്ക് സമീപമുള്ള പനപാക്കം പ്ലാന്റിൽ ജാഗ്വാർ–ലാൻഡ് റോവർ (JLR) വാഹനങ്ങളുടെ അസംബ്ലിംഗ് 2026 ഫെബ്രുവരി 9 മുതൽ ആരംഭിക്കുമെന്ന് കമ്പനി ഔദ്യോഗികമായി സ്ഥിരീകരിച്ചു.

ഏകദേശം 9,000 കോടി രൂപ ചെലവിൽ നിർമ്മിച്ചിരിക്കുന്ന ഈ അത്യാധുനിക പ്ലാന്റ് പ്രതിവർഷം 2.5 ലക്ഷം വാഹനങ്ങൾ നിർമ്മിക്കാൻ ശേഷിയുള്ളതാണ്. പ്ലാന്റ് പൂർണ്ണമായി പ്രവർത്തനക്ഷമമാകുന്നതോടെ 5,000ത്തിലധികം തൊഴിലവസരങ്ങൾ നേരിട്ട് സൃഷ്ടിക്കപ്പെടുമെന്നാണ് ടാറ്റയുടെ കണക്കുകൂട്ടൽ.

ആദ്യ ഘട്ടത്തിൽ പനപാക്കം പ്ലാന്റിൽ നിന്നും പുറത്തിറങ്ങുന്ന മോഡൽ റേഞ്ച് റോവർ ഇവോക്ക് ആയിരിക്കുമെന്നാണ് റിപ്പോർട്ടുകൾ സൂചിപ്പിക്കുന്നത്. നിലവിൽ മഹാരാഷ്ട്രയിലെ പൂനെയിലാണ് ജെ.എൽ.ആർ. വാഹനങ്ങളുടെ അസംബ്ലിംഗ് നടക്കുന്നത്. എന്നാൽ പൂനെയിലെ പ്രവർത്തനം പൂർണ്ണമായി പനപാക്കത്തിലേക്ക് മാറ്റുമോ എന്ന കാര്യത്തിൽ കമ്പനി വ്യക്തത നൽകിയിട്ടില്ല.

ഇലക്ട്രിക് വാഹനങ്ങൾ ഉൾപ്പെടെ നിർമ്മിക്കാൻ അനുയോജ്യമായ രീതിയിലാണ് പ്ലാന്റ് രൂപകൽപ്പന ചെയ്തിട്ടുള്ളത്. ഇത് ഇന്ത്യയെ ആഗോള ആഡംബര വാഹന കയറ്റുമതി കേന്ദ്രമാക്കി മാറ്റുന്നതിൽ നിർണായക പങ്ക് വഹിക്കുമെന്നാണ് വ്യവസായ വിദഗ്ധരുടെ വിലയിരുത്തൽ.

ആഭ്യന്തര വിപണിയുടെ ആവശ്യത്തിനപ്പുറം ഉൽപ്പാദന ശേഷിയുള്ള ഈ പ്ലാന്റ് വിദേശ രാജ്യങ്ങളിലേക്കുള്ള കയറ്റുമതിയും ഗണ്യമായി വർധിപ്പിക്കാൻ സഹായിക്കുമെന്ന് പ്രതീക്ഷിക്കുന്നു. ടാറ്റ മോട്ടോഴ്സിന്റെ ആഡംബര വാഹന വിപണി ശക്തിപ്പെടുത്തുന്ന ഈ നീക്കം ഇന്ത്യയിലെ വാഹന നിർമ്മാണ രംഗത്ത് പുതിയ കാലഘട്ടത്തിന് തുടക്കമിടുമെന്ന വിലയിരുത്തലുകളും ശക്തമാണ്.