Login 
പഠിക്കാം & സമ്പാദിക്കാം 
Home
7 May 2026 7:25 PM IST
Innova Hycross: ഇരട്ടി വില്പ്പനയുമായി ഹൈക്രോസ്; ക്രിസ്റ്റക്ക് ഇനി സമാധാനമായി മടങ്ങാം
MyFin Desk
ഇന്ത്യയിലെ എംപിവി വിപണിയില് ടൊയോട്ട മോട്ടോര് കോര്പ്പറേഷന്റെ ടൊയോട്ട ഇന്നോവ ഹൈക്രോസ് ശക്തമായ മുന്നേറ്റം തുടരുന്നു. 2026 സാമ്പത്തിക വര്ഷത്തിലെ വില്പ്പന കണക്കുകള് പ്രകാരം ഇന്നോവ ഹൈക്രോസ്, ടൊയോട്ട ഇന്നോവ ക്രിസ്റ്റയെക്കാള് ഇരട്ടി വില്പ്പനയാണ് സ്വന്തമാക്കിയിരിക്കുന്നത്.
ഹൈക്രോസിന് വമ്പന് മുന്നേറ്റം
കഴിഞ്ഞ സാമ്പത്തിക വര്ഷം ടൊയോട്ട 52,604 ഇന്നോവ ഹൈക്രോസ് യൂണിറ്റുകള് വിറ്റഴിക്കുമ്പോള് ഇന്നോവ ക്രിസ്റ്റയുടെ വില്പ്പന 27,672 യൂണിറ്റുകളില് ഒതുങ്ങി. മൊത്തം ഇന്നോവ വില്പ്പനയുടെ 65.5 ശതമാനവും ഹൈക്രോസ് സ്വന്തമാക്കിയതോടെ ഇന്നോവ കുടുംബത്തിന്റെ പ്രധാന മുഖമായി ഈ ഹൈബ്രിഡ് എംപിവി മാറിയിരിക്കുകയാണ്. ലോഞ്ച് ചെയ്ത് നാല് വര്ഷത്തിനുള്ളില് തന്നെ രണ്ട് ലക്ഷം യൂണിറ്റ് വില്പ്പന എന്ന നേട്ടവും ഹൈക്രോസ് സ്വന്തമാക്കി.
ഹൈബ്രിഡ് സാങ്കേതികവിദ്യയ്ക്ക് സ്വീകാര്യത
ആധുനിക ഇന്റീരിയര്, പ്രീമിയം ഫീച്ചറുകള്, മികച്ച ഡ്രൈവിംഗ് അനുഭവം എന്നിവയാണ് കുടുംബങ്ങളെ ഹൈക്രോസിലേക്ക് ആകര്ഷിക്കുന്നത്. നഗരയാത്രകളിലും ഹൈവേ യാത്രകളിലും ഒരുപോലെ മികച്ച പ്രകടനം നല്കുന്ന ഹൈബ്രിഡ് സംവിധാനം റണ്ണിംഗ് കോസ്റ്റ് കുറയ്ക്കുന്നതിലും സഹായിക്കുന്നു.
ലിറ്ററിന് 23.24 കിലോമീറ്റര് വരെ മൈലേജ് നല്കുന്ന ഹൈക്രോസ് സ്വകാര്യ ആവശ്യങ്ങള്ക്കും ടാക്സി മേഖലയ്ക്കും ഒരുപോലെ ലാഭകരമായ വാഹനമായി മാറിയിട്ടുണ്ട്.
ഹൈബ്രിഡ് വിപണിയില് ടൊയോട്ടയുടെ ആധിപത്യം
ഇന്ത്യയിലെ സ്ട്രോംഗ് ഹൈബ്രിഡ് വാഹന വിപണിയില് 80 ശതമാനത്തിലധികം വിഹിതവുമായി ടൊയോട്ട മുന്നിലാണ്. 2026 സാമ്പത്തിക വര്ഷത്തിന്റെ ആദ്യ പാദത്തില് രാജ്യത്തെ ഹൈബ്രിഡ് വാഹന വില്പ്പന ഇരട്ടിയായപ്പോള് അതില് ഏറ്റവും വലിയ പങ്ക് വഹിച്ചതും ഇന്നോവ ഹൈക്രോസ് തന്നെയാണെന്നാണ് കണക്കുകള് വ്യക്തമാക്കുന്നത്.
ക്രിസ്റ്റയ്ക്ക് തിരിച്ചടി
വിശ്വസ്തമായ 2.4 ലിറ്റര് ഡീസല് എഞ്ചിനും ലാഡര്-ഫ്രെയിം പ്ലാറ്റ്ഫോമും കാരണം ക്രിസ്റ്റയ്ക്ക് ഇപ്പോഴും വിപണിയില് ആരാധകരുണ്ട്. പ്രത്യേകിച്ച് കൊമേഴ്സ്യല് ആവശ്യങ്ങള്ക്കായി പലരും ഈ മോഡലിനെ ആശ്രയിക്കുന്നുണ്ട്. എന്നാല് കര്ശനമാകുന്ന മലിനീകരണ നിയന്ത്രണങ്ങളും ഡീസല് വാഹനങ്ങളോടുള്ള വിമുഖതയും ക്രിസ്റ്റയുടെ വിപണി വിഹിതം കുറയ്ക്കുന്ന പ്രധാന ഘടകങ്ങളാണ്. റിപ്പോര്ട്ടുകള് പ്രകാരം അടുത്ത മാസങ്ങളിലായി ക്രിസ്റ്റ ഡീസല് പതിപ്പ് ടൊയോട്ട പിന്വലിച്ചേക്കും.
കുറഞ്ഞ വിലയില് പുതിയ ഹൈബ്രിഡ് മോഡല്?
ക്രിസ്റ്റയുടെ വിടവ് നികത്താനായി കുറഞ്ഞ വിലയിലുള്ള പുതിയ ഹൈബ്രിഡ് ഹൈക്രോസ് പതിപ്പ് അവതരിപ്പിക്കാന് ടൊയോട്ട പദ്ധതിയിടുന്നതായാണ് സൂചന. നിലവില് ഹൈക്രോസ് പെട്രോള് ഓട്ടോമാറ്റിക് പതിപ്പുകളുടെ വില 20 ലക്ഷം രൂപ മുതല് ആരംഭിക്കുന്നു.
കൂടുതല് ഉപഭോക്താക്കളിലേക്ക് ഹൈബ്രിഡ് സാങ്കേതികവിദ്യ എത്തിക്കാനായി ഫീച്ചറുകളില് മാറ്റം വരുത്തിയ വില കുറഞ്ഞ വേരിയന്റുകള് കമ്പനി അവതരിപ്പിച്ചേക്കുമെന്നാണ് വിപണി വിദഗ്ധരുടെ വിലയിരുത്തല്.