സെന്‍സെക്സിലും നിഫ്റ്റിയിലും കുതിപ്പ്

ആഗോള തലത്തിലെ പോസിറ്റിവ് പ്രവണതകളുടെയും വിദേശ നിക്ഷേപകരില്‍ നിന്നുള്ള തുടര്‍ച്ചയായ ഫണ്ട് വരവിന്‍റെയും കരുത്തില്‍ ആഭ്യന്തര ഓഹരി വിപണി ഇന്ന് തുടക്ക വ്യാപാരത്തിൽ കുതിച്ചുയർന്നു. സൂചികയിലെ പ്രമുഖമായ റിലയൻസ് ഇൻഡസ്ട്രീസ് ഓഹരികളില്‍ പ്രകടമാകുന്ന ശക്തമായ വാങ്ങല്‍ ഇക്വിറ്റി വിപണിയിലെ പോസിറ്റീവ് വികാരത്തിന് ആക്കം കൂട്ടി. തുടക്ക വ്യാപാരത്തില്‍ 30-ഷെയർ ബിഎസ്ഇ സെൻസെക്‌സ് 356.13 പോയിന്റ് ഉയർന്ന് 65,700.30 ലെത്തി. എൻഎസ്ഇ നിഫ്റ്റി 102.45 പോയിന്റ് ഉയർന്ന് 19,458.35 ലെത്തി.

സെൻസെക്‌സില്‍ ബജാജ് ഫിനാൻസ്, ബജാജ് ഫിൻസെർവ്, മാരുതി, മഹീന്ദ്ര ആൻഡ് മഹീന്ദ്ര, ഇൻഡസ്ഇൻഡ് ബാങ്ക്, ലാർസൻ ആൻഡ് ടൂബ്രോ, റിലയൻസ് ഇൻഡസ്ട്രീസ്, ടൈറ്റൻ തുടങ്ങിയ ഓഹരികൾ നേട്ടത്തിലാണ്. 30-ഷെയർ പാക്കിൽ നിന്ന് വിപ്രോ മാത്രമാണ് പിന്നോക്കം നിൽക്കുന്നത്.

ഏഷ്യൻ വിപണികളിൽ, സിയോൾ, ടോക്കിയോ, ഷാങ്ഹായ്, ഹോങ്കോംഗ് എന്നിവ നേട്ടത്തിലാണ് വ്യാപാരം നടത്തുന്നത്. തിങ്കളാഴ്ച യുഎസ് വിപണികൾ പോസിറ്റീവിലാണ് അവസാനിച്ചത്. ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.53 ശതമാനം ഉയർന്ന് ബാരലിന് 78.10 ഡോളറിലെത്തി.

"യുഎസ് വിപണികളിലെ റാലിയും ഏഷ്യൻ വിപണികളിലെ തുടക്കത്തിലുള്ള നേട്ടങ്ങളും ആഭ്യന്തര ഓഹരി വിപണികളിൽ ശുഭാപ്തിവിശ്വാസം ഉയർത്തും. കാരണം നിക്ഷേപകർ ഇവയെ പിന്തുടരാനും വാങ്ങൽ വേഗത നിലനിർത്താനും സാധ്യതയുണ്ട്. എന്നിരുന്നാലും, രണ്ട് വലിയ ഘടകങ്ങളില്‍ ശ്രദ്ധ കേന്ദ്രീകരിക്കുന്നതിനാൽ പിന്നീടുള്ള ഘട്ടത്തിൽ ജാഗ്രത നിലനിൽക്കും - യുഎസിന്‍റെ ജൂണിലെ റീട്ടെയില്‍ പണപ്പെരുപ്പം സംബന്ധിച്ച ഡാറ്റ ബുധനാഴ്ച പുറത്തിറങ്ങും, കൂടാതെ ജൂലൈ 26 ന് നടക്കുന്ന എഫ്ഒഎംസി മീറ്റിംഗിൽ യുഎസ് ഫെഡ് പലിശ നിരക്ക് വർദ്ധിപ്പിക്കുന്നതിനുള്ള സാധ്യതയും മുന്നിലുണ്ട്," മെഹ്ത ഇക്വിറ്റീസ് ലിമിറ്റഡ് സീനിയർ വിപി (ഗവേഷണം) പ്രശാന്ത് തപ്‌സെ പറഞ്ഞു.

എക്‌സ്‌ചേഞ്ച് ഡാറ്റ പ്രകാരം തിങ്കളാഴ്ച 588.48 കോടി രൂപയുടെ ഇക്വിറ്റികൾ വാങ്ങി വിദേശ സ്ഥാപന നിക്ഷേപകർ (എഫ്‌ഐഐകൾ) തങ്ങളുടെ ശക്തമായ വാങ്ങൽ തുടർന്നു. തിങ്കളാഴ്ച ബിഎസ്ഇ ബെഞ്ച്മാർക്ക് 63.72 പോയിന്റ് അഥവാ 0.10 ശതമാനം ഉയർന്ന് 65,344.17 ൽ എത്തി. നിഫ്റ്റി 24.10 പോയിന്റ് അഥവാ 0.12 ശതമാനം ഉയർന്ന് 19,355.90 ൽ അവസാനിച്ചു.