വീണ്ടും റെക്കോർഡ് തിരുത്തി വിപണികളിലെ ക്ലോസിംഗ്

തുടർച്ചയായ നാലാമത്തെ സെഷനിലും ഓഹരി വിപണി സൂചികകളായ സെൻസെക്സും നിഫ്റ്റിയും മുന്നേറ്റം തുടര്‍ന്ന് റെക്കോർഡ് തലത്തില്‍ വ്യാപാരം അവസാനിപ്പിച്ചു. നിക്ഷേപകര്‍ക്കിടയില്‍ പടര്‍ന്നു കയറിയ ബുള്ളിഷ് വികാരവും വിദേശ നിക്ഷേപങ്ങളുടെ സുസ്ഥിരമായ ഒഴുക്കും വിപണിയെ നയിക്കുകയാണ്. കൂടാതെ ബജാജ് ഫിനാൻസ്, ബജാജ് ഫിൻസെർവ്, ഇൻഫോസിസ്, എച്ച്ഡിഎഫ്‍സി ബാങ്ക്, ടിസിഎസ് എന്നീ പ്രമുഖ ഓഹരികളിലെ കനത്ത വാങ്ങൽ ഇക്വിറ്റി വിപണിയിലെ ശുഭാപ്തിവിശ്വാസം വർദ്ധിപ്പിച്ചു.

30-ഷെയർ ബിഎസ്ഇ സെൻസെക്‌സ് 274 പോയിന്റ് അഥവാ 0.42 ശതമാനം ഉയർന്ന് അതിന്റെ എക്കാലത്തെയും ഉയർന്ന ക്ലോസിംഗ് നിലയായ 65,479.05 ൽ എത്തി. പകൽ സമയത്ത്, ബെഞ്ച്മാർക്ക് 467.92 പോയിന്റ് അഥവാ 0.71 ശതമാനം ഉയർന്ന് 65,672.97 എന്ന സര്‍വകാല ഇന്‍ട്രാ-ഡേ ഉയരത്തില്‍ എത്തിയിരുന്നു. എൻഎസ്ഇ നിഫ്റ്റി 66.45 പോയിന്റ് അഥവാ 0.34 ശതമാനം ഉയർന്ന് 19,389 എന്ന റെക്കോർഡ് ഉയരത്തിൽ അവസാനിച്ചു. പകൽ സമയത്ത്, ഇത് 111.6 പോയിന്റ് അഥവ 0.57 ശതമാനം ഉയർന്ന് 19,434.15 എന്ന എക്കാലത്തെയും വലിയ ഇൻട്രാ-ഡേ ഉയരത്തില്‍ എത്തിയിരുന്നു.

സെൻസെക്‌സില്‍ 7.71 ശതമാനം ഉയർന്ന് ബജാജ് ഫിനാൻസാണ് ഏറ്റവും മികച്ച പ്രകടനം കാഴ്ചവെച്ച പ്രമുഖ ഓഹരി. ബജാജ് ഫിൻസെർവ്, ടെക് മഹീന്ദ്ര, സൺ ഫാർമ, എൻടിപിസി, ടൈറ്റൻ, വിപ്രോ, ടാറ്റ കൺസൾട്ടൻസി സർവീസസ്, കൊട്ടക് മഹീന്ദ്ര ബാങ്ക്, ഇൻഫോസിസ്, സ്റ്റേറ്റ് ബാങ്ക് ഓഫ് ഇന്ത്യ, ഐടിസി എന്നിവയും നേട്ടം കൊയ്തു. അതേസമയം ഭാരതി എയർടെൽ, ആക്‌സിസ് ബാങ്ക്, റിലയൻസ് ഇൻഡസ്ട്രീസ്, ഇൻഡസ്ഇൻഡ് ബാങ്ക്, ടാറ്റ സ്റ്റീൽ, അൾട്രാടെക് സിമന്റ് തുടങ്ങിയ ഓഹരികൾ നഷ്ടത്തിലാണ് ക്ലോസ് ചെയ്തത്.

ഏഷ്യൻ വിപണികളിൽ ഷാങ്ഹായിയും ഹോങ്കോങ്ങും നേട്ടത്തിലും സിയോളും ടോക്കിയോയും നഷ്ടത്തിലുമാണ് വ്യാപാരം അവസാനിപ്പിച്ചത്. യൂറോപ്പിലെ ഇക്വിറ്റി വിപണികൾ സമ്മിശ്ര തലത്തിലാണ് വ്യാപാരം നടത്തുന്നത്. തിങ്കളാഴ്ച യുഎസ് വിപണികൾ പോസിറ്റീവ് ആയാണ് വ്യാപാരം അവസാനിപ്പിച്ചത്. ആഗോള എണ്ണ മാനദണ്ഡമായ ബ്രെന്റ് ക്രൂഡ് 1.15 ശതമാനം ഉയർന്ന് ബാരലിന് 75.51 ഡോളറിലെത്തി.

വിദേശ പോർട്ട്‌ഫോളിയോ നിക്ഷേപകർ (എഫ്‌പിഐ) തിങ്കളാഴ്ച 1,995.92 കോടി രൂപയുടെ ഇക്വിറ്റികൾ ആഭ്യന്തര വിപണിയില്‍ വാങ്ങിയതായി എക്‌സ്‌ചേഞ്ച് ഡാറ്റ വ്യക്തമാക്കുന്നു. എഫ്‍പിഐകൾ ജൂൺ മാസത്തിൽ ഇന്ത്യൻ ഇക്വിറ്റികളിൽ 47,148 കോടി രൂപയുടെ നിക്ഷേപമാണ് നടത്തിയത്. ഇത് 10 മാസത്തിനിടയിലെ ഏറ്റവും ഉയർന്ന നിക്ഷേപമാണ്.