നേരിയ തിളക്കത്തില്‍ സ്വര്‍ണം: പവന് 200 രൂപ വര്‍ധന

കൊച്ചി: തുടര്‍ച്ചയായ ഇടിവിന് പിന്നാലെ സംസ്ഥാനത്ത് സ്വര്‍ണവിലയില്‍ വര്‍ധന. ഇന്ന് പവന് 200 രൂപ വര്‍ധിച്ച് 37,800 രൂപയിലെത്തി (22 കാരറ്റ്). ഗ്രാമിന് 25 രൂപ വര്‍ധിച്ച് 4,725 രൂപയിലാണ് വ്യാപാരം നടക്കുന്നത്. കഴിഞ്ഞ ദിവസം പവന് 480 രൂപ കുറഞ്ഞ് 37,600 രൂപയില്‍ എത്തിയിരുന്നു. ഈ മാസത്തെ ഏറ്റവും കുറഞ്ഞ നിരക്കിലേക്കാണ് സ്വര്‍ണവില ഇന്നലെ എത്തിയത്. ഇന്ന് 24 കാരറ്റ് സ്വര്‍ണം പവന് 256 രൂപ വര്‍ധിച്ച് 41,240 രൂപയായി. ഗ്രാമിന് 32 രൂപ വര്‍ധിച്ച് 5,155 രൂപയായിട്ടുണ്ട്.

വെള്ളി ഗ്രാമിന് 60.90 രൂപയാണ് വില. 8 ഗ്രാമിന് 487.20 രൂപയിലാണ് വ്യാപാരം നടക്കുന്നത്. 8 ഗ്രാമിന് കഴിഞ്ഞ ദിവസത്തേക്കാള്‍ 1.60 രൂപ കൂടിയിട്ടുണ്ട്. ഇന്ന് വ്യാപാരം ആരംഭിക്കുമ്പോള്‍ യുഎസ് ഡോളറിനെതിരെ രൂപയുടെ മൂല്യം 4 പൈസ ഇടിഞ്ഞ് 79.87 ആയി. വിദേശ വിപണിയില്‍ യുഎസ് ഡോളര്‍ ശക്തമാകുന്നതാണ് രൂപയ്ക്ക് തിരിച്ചടിയായത്.

ഇന്റര്‍ബാങ്ക് ഫോറിന്‍ എക്‌സ്‌ചേഞ്ചില്‍, ഡോളറിനെതിരെ 79.84 ല്‍ ആരംഭിച്ച രൂപ പിന്നീട് 79.87 ലേക്ക് താഴ്ന്നു. ബ്രെന്റ് ക്രൂഡ് ബാരലിന് 99.73 ഡോളറാണ് വില. ആഭ്യന്തര ഓഹരി വിപണിയില്‍ വ്യാപാരം ആരംഭിച്ചപ്പോള്‍ സെന്‍സെക്‌സ് 141.45 പോയിന്റ് അല്ലെങ്കില്‍ 0.24 ശതമാനം താഴ്ന്ന് 58,889.85 ലും എന്‍എസ്ഇ നിഫ്റ്റി 50.15 പോയിന്റ് അല്ലെങ്കില്‍ 0.29 ശതമാനം ഇടിഞ്ഞ് 17,527.35 ലും എത്തി. എക്‌സ്‌ചേഞ്ച് ഡാറ്റ പ്രകാരം 563.00 കോടി രൂപയുടെ ഓഹരികള്‍ വാങ്ങിയതിനാല്‍ വിദേശ സ്ഥാപന നിക്ഷേപകര്‍ ചൊവ്വാഴ്ച മൂലധന വിപണിയില്‍ അറ്റ വാങ്ങലുകാരായി.