വിദേശനാണ്യ ശേഖരം റെക്കോര്‍ഡുകള്‍ ഭേദിച്ച് മുന്നോട്ട്

രാജ്യത്തിന്റെ വിദേശനാണ്യ ശേഖരം സര്‍വ്വകാല റെക്കോര്‍ഡുകള്‍ ഭേദിച്ച് കുതിക്കുന്നു. ജനുവരി 30-ന് അവസാനിച്ച വാരത്തില്‍ ഇന്ത്യയുടെ വിദേശനാണ്യ ശേഖരം 723.774 ബില്യണ്‍ ഡോളറില്‍ എത്തി. റിസര്‍വ് ബാങ്കിന്റെ ഏറ്റവും പുതിയ കണക്കുകളിലാണ് ഇക്കാര്യം വ്യക്തമാക്കുന്നത്.

ഒറ്റ ആഴ്ച കൊണ്ട് മാത്രം 14.36 ബില്യണ്‍ ഡോളറിന്റെ വന്‍ വര്‍ദ്ധനവാണ് രേഖപ്പെടുത്തിയത്. കഴിഞ്ഞ വാരത്തിലുണ്ടായിരുന്ന 709.4 ബില്യണ്‍ ഡോളര്‍ എന്ന റെക്കോര്‍ഡാണ് ഇപ്പോള്‍ വഴിമാറിയത്.ഈ റെക്കോര്‍ഡ് നേട്ടത്തിന് പിന്നിലെ രഹസ്യം മറ്റൊന്നുമല്ല രാജ്യത്തിന്റെ സ്വര്‍ണ ശേഖരത്തിലുണ്ടായ വന്‍ വര്‍ദ്ധനവ്.വിദേശ കറന്‍സി ആസ്തികളില്‍ നേരിയ കുറവ് രേഖപ്പെടുത്തിയെങ്കിലും, സ്വര്‍ണ ശേഖരം 137.683 ബില്യണ്‍ ഡോളറായി ഉയര്‍ന്നു.

ഒറ്റ ആഴ്ച കൊണ്ട് സ്വര്‍ണ ശേഖരത്തില്‍ മാത്രം 14.595 ബില്യണ്‍ ഡോളറിന്റെ വളര്‍ച്ചയാണുണ്ടായത്.ഇന്ത്യയുടെ ഇറക്കുമതി ആവശ്യങ്ങള്‍ നിറവേറ്റാന്‍ ഈ ശേഖരം സുസജ്ജമാണെന്ന് ആര്‍.ബി.ഐ വ്യക്തമാക്കുന്നു. നിലവിലെ കണക്കനുസരിച്ച്, അടുത്ത 11 മാസത്തിലധികം ആവശ്യമായ സാധനങ്ങള്‍ വിദേശത്തുനിന്ന് ഇറക്കുമതി ചെയ്യാന്‍ ഈ പണം മതിയാകും.

വിദേശത്തുനിന്നുള്ള സാമ്പത്തിക ബാധ്യതകള്‍ നിറവേറ്റാന്‍ ഇന്ത്യക്ക് യാതൊരു ബുദ്ധിമുട്ടും ഉണ്ടാകില്ലെന്ന് കേന്ദ്ര ബാങ്ക് ആത്മവിശ്വാസം പ്രകടിപ്പിക്കുന്നു.ചുരുക്കത്തില്‍, 723 ബില്യണ്‍ ഡോളറിന്റെ ഈ കരുതല്‍ ശേഖരം ആഗോള സാമ്പത്തിക പ്രതിസന്ധികള്‍ക്കിടയിലും ഇന്ത്യയെ ഒരു 'സേഫ് ഹെവന്‍' ആയി നിലനിര്‍ത്തുന്നു.

ഇത് ഇന്ത്യന്‍ രൂപയ്ക്ക് കൂടുതല്‍ സ്ഥിരത നല്‍കുകയും വിദേശ നിക്ഷേപകരെ ഇന്ത്യയിലേക്ക് ആകര്‍ഷിക്കുകയും ചെയ്യുന്നു.