വിദേശനാണ്യ കരുതല്‍ ശേഖരം വീണ്ടും ഇടിഞ്ഞു; സ്വര്‍ണം താഴ്ന്നു

ഇന്ത്യയുടെ വിദേശനാണ്യ കരുതല്‍ ശേഖരത്തിന് വീണ്ടും തിരിച്ചടി. ഒക്ടോബര്‍ 30ന് അവസാനിച്ച ആഴ്ചയില്‍ 1.269 ബില്യണ്‍ ഡോളര്‍ കുറഞ്ഞ് കരുതല്‍ ശേഖരം 719.748 ബില്യണിലെത്തിയതായി റിസര്‍വ് ബാങ്ക് അറിയിച്ചു. ഇതിന് തൊട്ടുമുന്‍പുള്ള ആഴ്ചയിലും വലിയ ഇടിവ് ഉണ്ടായിരുന്നു - ഒക്ടോബര്‍ 16ന് അവസാനിച്ച ആഴ്ചയില്‍ 5.011 ബില്യണ്‍ കുറഞ്ഞ് 721.016 ബില്യണിലെത്തി. ഒരുകാലത്ത് 785.706 ബില്യണ്‍ എന്ന എക്കാലത്തെയും ഉയരത്തില്‍ എത്തിയിരുന്ന കരുതല്‍ ശേഖരമാണ് ഇപ്പോള്‍ തുടര്‍ച്ചയായി ഇടിയുന്നത്.

എന്തുകൊണ്ടാണ് ഈ കുത്തനെയുള്ള ഇടിവ്? രണ്ട് കാരണങ്ങളാണ് വിദഗ്ധര്‍ ചൂണ്ടിക്കാട്ടുന്നത്. ഒന്ന്, പ്രവാസി നിക്ഷേപങ്ങള്‍ക്കായുള്ള പ്രത്യേക ഇളവ് പദ്ധതിയായ FCNR(B) വഴി ബാങ്കുകള്‍ സമാഹരിച്ച 133 ബില്യണ്‍ ഡോളറിന്റെ തിരിച്ചടവ്. രണ്ട്, രൂപയുടെ മൂല്യം ഇടിയാതിരിക്കാന്‍ ഡോളര്‍ വിറ്റ് റിസര്‍വ് ബാങ്ക് നടത്തുന്ന കറന്‍സി പ്രതിരോധം. രൂപയെ പിടിച്ചുനിര്‍ത്താന്‍ ഡോളര്‍ വിറ്റപ്പോള്‍ കരുതല്‍ ശേഖരത്തിന് ക്ഷീണം വന്നു എന്ന് ചുരുക്കം.

ഈ ആഴ്ചയിലെ കണക്കുകള്‍ പരിശോധിച്ചാല്‍ സമ്മിശ്ര ചിത്രമാണ്. കരുതല്‍ ശേഖരത്തിന്റെ പ്രധാന ഘടകമായ വിദേശ കറന്‍സി ആസ്തികള്‍ 1.358 ബില്യണ്‍ ഡോളര്‍ വര്‍ധിച്ച് 593.205 ബില്യണായി ഉയര്‍ന്നു. എന്നാല്‍ സ്വര്‍ണ കരുതല്‍ ശേഖരത്തിന്റെ മൂല്യം 2.65 ബില്യണ്‍ കുറഞ്ഞ് 103.15 ബില്യണായി താഴ്ന്നു എന്നത് തിരിച്ചടിയായി. IMFലെ ഇന്ത്യയുടെ കരുതല്‍ 4 മില്യണ്‍ ഡോളര്‍ കുറഞ്ഞ് 4.787 ബില്യണായി.