സ്വര്‍ണം ഈ മാസത്തിലെ ഏറ്റവും താഴ്ന്ന വിലയില്‍

സംസ്ഥാനത്തെ സ്വര്‍ണ വില തുടര്‍ച്ചയായ രണ്ടാം ദിവസവും ഇടിഞ്ഞു. തുടര്‍ച്ചയായ നാല് ദിവസങ്ങളിലെ ഇടിവിന് ശേഷം ശനിയാഴ്ച 22 കാരറ്റ് ഗ്രാമിന് ഇന്ന് 10 രൂപ വര്‍ധിച്ച് 5465 രൂപയില്‍ എത്തിയിരുന്നു. പിന്നീട് രണ്ട് ദിവസങ്ങളില്‍ ആ നിലവാരത്തില്‍ തുടര്‍ന്ന വിലയില്‍ ഇന്നലെയും ഇന്നും 10 രൂപയുടെ വീതം ഇടിവുണ്ടായി. ഇന്ന് ഗ്രാമിന് 5445 രൂപയാണ്. പവന് 43,560 രൂപയാണ് ഇന്നത്തെ വില, ഇന്നലത്തെ വിലയില്‍ നിന്ന് 80 രൂപയുടെ ഇടിവ്. ഈ മാസം 3 ദിവസങ്ങളില്‍ മാത്രമാണ് സ്വര്‍ണ വില ഉയര്‍ന്നത്.

24 കാരറ്റ് സ്വര്‍ണം ഗ്രാമിന്‍റെ വില ഇന്ന് 11 രൂപയുടെ ഇടിവോടെ 5940 രൂപയില്‍ എത്തി. പവന് 47,520 രൂപയാണ് വില, 88 രൂപയുടെ ഇടിവ്. ഔണ്‍സിന് 1905.22 ഡോളര്‍ (ഓഗസ്റ്റ് 14, 11:32 എഎം) എന്ന തലത്തിലാണ് ആഗോള തലത്തില്‍ സ്വര്‍ണവില പുരോഗമിക്കുന്നത്.

മാര്‍ച്ച് അവസാനം മുതല്‍ മേയ് രണ്ടാം വാരം വരെയുള്ള കാലയളവില്‍ സ്വര്‍ണം വലിയ കുതിപ്പിന്റെ പാതയിലായിരുന്നു. എന്നാല്‍ തുടര്‍ന്നങ്ങോട്ട് വിലയില്‍ തുടര്‍ച്ചയായ ചാഞ്ചാട്ടവും ക്രമേണ ഇടിവും ഉണ്ടാകുകയായിരുന്നു. ജൂണില്‍ വെറും 7 ദിവസങ്ങളില്‍ മാത്രമാണ് സ്വര്‍ണ വിലയില്‍ വര്‍ധന രേഖപ്പെടുത്തിയത്. ജൂലൈയില്‍ പൊതുവേ ചാഞ്ചാട്ടമാണ് വിലയില്‍ കണ്ടത്.

സംസ്ഥാനത്തെ വെള്ളിവിലയില്‍ ഇന്ന് വര്‍ധനയാണ് ഉണ്ടായത്. ഗ്രാമിന് 20 പൈസയുടെ വര്‍ധനയോടെ 76.20 രൂപയാണ് ഇന്നത്തെ വില. എട്ട് ഗ്രാം വെള്ളിക്ക് 609.60 രൂപ , 1.60 രൂപയുടെ വര്‍ധന. ഡോളറിനെതിരേ രൂപയുടെ മൂല്യം ദുര്‍ബലമായി തുടരുന്നു. 1 ഡോളറിന് 83.24 രൂപ എന്ന നിലയാണ് ഇന്ന് കറന്‍സി വിനിമയം പുരോഗമിക്കുന്നത്.