മൂന്നാം ദിവസം ഉണര്‍ന്ന് സ്വര്‍ണം, പവന് 80 രൂപ വര്‍ധന

കൊച്ചി: തുടര്‍ച്ചയായ രണ്ട് ദിവസം വിലയിടിവുണ്ടായതിന് പിന്നാലെ സ്വര്‍ണവിലയില്‍ നേരിയ വര്‍ധന. ഇന്ന് പവന് 80 രൂപ വര്‍ധിച്ച് 41,120 രൂപയായി. ഗ്രാമിന് 10 രൂപ വര്‍ധിച്ച് 5,140 രൂപയിലാണ് വ്യാപാരം നടക്കുന്നത് (22 കാരറ്റ്). കഴിഞ്ഞ ദിവസം പവന് 120 രൂപ കുറഞ്ഞ് 41,040 രൂപയായിരുന്നു.

ഇക്കഴിഞ്ഞ ചൊവ്വാഴ്ച്ചയും പവന്റെ വിലയില്‍ 120 രൂപയുടെ ഇടിവുണ്ടായി. ഈ മാസം 9ന് പവന്റെ വില 41,280 രൂപയായിരുന്നു. ഇത് ഈ മാസത്തെ ഏറ്റവും ഉയര്‍ന്ന നിരക്കാണ്. ഇന്ന് 24 കാരറ്റ് സ്വര്‍ണം പവന് 88 രൂപ വര്‍ധിച്ച് 44,856 രൂപയായി. ഗ്രാമിന് 11 രൂപ വര്‍ധിച്ച് 5,607 രൂപയിലാണ് വ്യാപാരം നടക്കുന്നത്.

ഇന്ന് വെള്ളി ഗ്രാമിന് 74 രൂപയാണ് വില. എട്ട് ഗ്രാമിന് 592 രൂപയിലാണ് വ്യാപാരം നടക്കുന്നത്. ഇന്ന് ആദ്യഘട്ട വ്യാപാരത്തില്‍ യുഎസ് ഡോളറിനെതിരെ രൂപയുടെ മൂല്യം 14 പൈസ ഉയര്‍ന്ന് 81.54ല്‍ എത്തി. ആഭ്യന്തര വിപണിയിലെ നേരിയ ഉണര്‍വും ആഗോളതലത്തില്‍ ഡോളര്‍ ബലഹീനമായതുമാണ് രൂപയ്ക്ക് നേട്ടമായത്.

ഇന്റര്‍ബാങ്ക് ഫോറിന്‍ എക്‌സ്‌ചേഞ്ചില്‍ വ്യാപാരം ആരംഭിച്ചപ്പോള്‍ 81.54 എന്ന നിലയിലായിരുന്നു രൂപ. ബുധനാഴ്ച്ച വ്യാപാരം അവസാനിച്ചപ്പോള്‍ യുഎസ് ഡോളറിനെതിരെ രൂപയുടെ മൂല്യം 81.68ല്‍ എത്തി.

ആഭ്യന്തര ഓഹരി വിപണിയില്‍ വ്യാപാരം ആരംഭിച്ചപ്പോള്‍ ബിഎസ്ഇ സെന്‍സെക്സ് 117.7 പോയിന്റ് അഥവാ 0.20 ശതമാനം ഉയര്‍ന്ന് 60,223.20 ലും, എന്‍എസ്ഇ നിഫ്റ്റി 33.25 പോയിന്റ് അഥവാ 0.19 ശതമാനം ഉയര്‍ന്ന് 17,928.95 ലുമെത്തി.