സ്വര്‍ണം പവന്‍ വീണ്ടും 45,000 തൊട്ടു

കഴിഞ്ഞ രണ്ട് ദിവസങ്ങളിലും ഇടിവ് പ്രകടമാക്കിയ സ്വര്‍ണ വിലയില്‍ ഇന്ന് ഉയര്‍ച്ച. ഈ മാസം തുടക്കം മുതല്‍ സംസ്ഥാനത്തെ സ്വര്‍ണവിലയില്‍ മുന്നേറ്റവും ഇടിവും മാറിമാറിവരികയാണ്. ഇന്ന് 22 കാരറ്റ് സ്വര്‍ണം ഗ്രാമിന് 5,625 രൂപയാണ് സംസ്ഥാനത്തെ വില, ഇന്നലത്തെ വിലയില്‍ നിന്നും 25 രൂപയുടെ വര്‍ധന. കഴിഞ്ഞ 2 ദിവസങ്ങളിലായി 30 രൂപയുടെ ഇടിവ് ഉണ്ടായിരുന്നു. പവന് 45000 രൂപയാണ് ഇന്നത്തെ വില, 200 രൂപയുടെ വര്‍ധന. 24 കാരറ്റ് സ്വര്‍ണം ഗ്രാമിന് 6,136 രൂപയാണ് വില, 26 രൂപയുടെ ഇടിവ്, 24 കാരറ്റ് സ്വര്‍ണം പവന്‍റെ വില 208 രൂപയുടെ വര്‍ധനയോടെ 49,088 രൂപയിലെത്തി.

കഴിഞ്ഞാഴ്ച തുടര്‍ച്ചയായ മൂന്ന് ദിവസങ്ങളില്‍ സംസ്ഥാനത്ത് സ്വര്‍ണ വില കുറഞ്ഞിരുന്നു. മൊത്തം 95 രൂപയുടെ ഇടിവാണ് 22 കാരറ്റ് സ്വര്‍ണം ഗ്രാമിന് മൂന്ന് ദിവസങ്ങളിലായി ഉണ്ടായത്. തുടർന്ന് മേയ് 20 ന് 50 രൂപയുടെ വര്‍ധനയുണ്ടായി. തുടര്‍ന്ന് കഴിഞ്ഞ രണ്ട് ദിവസങ്ങളില്‍ വീണ്ടും ഇടിവിലേക്ക് നീങ്ങുകയായിരുന്നു.

അമേരിക്കയിലെ ബാങ്കിംഗ് പ്രതിസന്ധി പരിഹരിക്കപ്പെട്ടിട്ടില്ലാ എന്നതും പണപ്പെരുപ്പ ആശങ്കകള്‍ ഇപ്പോഴും മുന്നിലുണ്ട് എന്നതും സ്വര്‍ണവിലയെ ഹ്രസ്വ കാലയളവില്‍ ഈ നില തുടരുന്നതിലേക്ക് നയിക്കും. ഏപ്രിലിലും മേയ് തുടക്കത്തിലും സ്വര്‍ണവിലയില്‍ വലിയ വര്‍ധനയാണ് പ്രകടമായതെങ്കില്‍ ഫെഡ് റിസര്‍വ് ധനനയ അവലോകന യോഗത്തിനും തുടര്‍ന്നുള്ള പ്രഖ്യാപനത്തിനും ശേഷം വിലയില്‍ ചാഞ്ചാട്ടം പ്രകടമാകകയായിരുന്നു.

ഡോളറിനെതിരേ ഇന്ന് രൂപയുടെ മൂല്യം മെച്ചപ്പെട്ടു. 1 ഡോളറിന് 82.72 രൂപ എന്ന നിരക്കിലാണ് വിനിമയം.

വെള്ളി വിലയിലും സ്വര്‍ണ വിലയ്ക്ക് സമാനമായ പ്രവണതയാണ് ഈ മാസം മിക്ക ദിവസങ്ങളിലും പ്രകടമായിട്ടുള്ളത്. എന്നാല്‍ ഇന്ന് വെള്ളി വിലയില്‍ ഇടിവാണ് ഉണ്ടായത്. ഗ്രാമിന് 77.50 രൂപയാണ് ഇന്നത്തെ വില, ഇന്നലത്തെ വിലയില്‍ നിന്ന് 50 പൈസയുടെ ഇടിവ്. 8 ഗ്രാം വെള്ളിക്ക് 620 രൂപയാണ്, 4 രൂപയുടെ ഇടിവ്.