സ്വര്‍ണം പവന് വീണ്ടും 43,000 ന് മുകളില്‍

ഇന്നലെ മാറ്റമില്ലാതെ തുടര്‍ന്ന സംസ്ഥാനത്തെ സ്വര്‍ണ വില ഇന്ന് വീണ്ടും ഉയര്‍ന്നു. 22 കാരറ്റ് സ്വര്‍ണം ഗ്രാമിന്‍റെ വില 35 രൂപയുടെ വര്‍ധനയോടെ 5400 രൂപയാണ്, പവന് 280 രൂപയുടെ വര്‍ധനയോടെ 43,200 രൂപ. ഈ മാസത്തിലെ ഏറ്റവും ഉയര്‍ന്ന നിലയിലാണ് ഇപ്പോള്‍ സ്വര്‍ണം ഉള്ളത്. പത്തു ദിവസത്തെ താഴോട്ടിറക്കത്തിനു ശേഷം കഴിഞ്ഞ വെള്ളിയാഴ്ച മുതലാണ് വില വര്‍ധിച്ചു തുടങ്ങിയത്. 7 ദിവസങ്ങളിലായി 1280 രൂപയുടെ വര്‍ധനയാണ് 22 കാരറ്റ് പവന് ഉണ്ടായിട്ടുള്ളത്. ഇതിനു മുമ്പുള്ള 10 ദിവസങ്ങളിലായി പവന് 2040 രൂപയുടെ ഇടിവാണ് ഉണ്ടായിരുന്നത്.

ഇന്ന് 24 കാരറ്റ് സ്വര്‍ണം ഗ്രാമിന്‍റെ വില 38 രൂപയുടെ വര്‍ധനയോടെ 5891 രൂപയാണ്. പവന് 304 രൂപയുടെ വര്‍ധനയോടെ 47,128 രൂപ. ഡോളര്‍ സൂചികയിലും യുഎസ് ബോണ്ട് ആദായത്തിലും ക്രമേണയുള്ള ഇടിവ് പ്രകടമായി തുടങ്ങിയത് സ്വര്‍ണത്തിന്‍റെ ആകര്‍ഷണീയത ഉയര്‍ത്തിയിട്ടുണ്ട്. ഇസ്രയേല്‍- പലസ്തീന്‍ യുദ്ധ സാഹചര്യം കണക്കിലെടുത്ത് സുരക്ഷിത നിക്ഷേപമെന്ന നിലയിലും സ്വര്‍ണം പരിഗണിക്കപ്പെടുന്നുണ്ട്.

ആഗോള തലത്തില്‍ ഔണ്‍സിന് 1,873-1879 ഡോളര്‍ എന്ന തലത്തിലാണ് സ്വര്‍ണം വിനിമയം നടക്കുന്നത്. ജൂലൈയിലും ഓഗസ്റ്റിലും സെപ്റ്റംബര്‍ ആദ്യ പകുതിയിലും പൊതുവേ ചാഞ്ചാട്ടമാണ് വിലയില്‍ കണ്ടത്. എന്നാല്‍ സെപ്റ്റംബര്‍ അവസാന ദിനങ്ങള്‍ മുതല്‍ തുടര്‍ച്ചയായ ഇടിവ് പ്രകടമാകുകയായിരുന്നു. ഇത് ഒക്റ്റോബറിന്‍റെ ആദ്യ ദിനങ്ങളിലും തുടര്‍ന്നു.

സംസ്ഥാനത്തെ വെള്ളി വിലയിലും ഇന്ന് വര്‍ധന പ്രകടമായി. ഒരു ഗ്രാം വെള്ളിയുടെ വില 50 പൈസയുടെ വര്‍ധനയോടെ 75.50 രൂപയാണ്. എട്ട് ഗ്രാം വെള്ളിക്ക് 604 രൂപയാണ് വില. ഇന്ന് ഡോളറിനെതിരേ രൂപയുടെ മൂല്യം മെച്ചപ്പെട്ടു. ഒരു ഡോളറിന് 83.16 രൂപ എന്ന നിലയിലാണ് ഇന്ന് കറന്‍സി വിനിമയം പുരോഗമിക്കുന്നത്.