സ്വര്‍ണം സര്‍വകാല റെക്കോര്‍ഡില്‍: കാരണമിതാണ്

സ്വര്‍ണം സര്‍വകാല റെക്കോര്‍ഡില്‍. ചരിത്രത്തിലാദ്യമായി 90 ഡോളറും കടന്ന് വെള്ളി. നിര്‍ണായകമായത് അമേരിക്കയുടെ ഡിസംബറിലെ പണപ്പെരുപ്പ കണക്കിലെ ഇടിവ്.

സ്വര്‍ണവില ഔണ്‍സിന് 4,639 ഡോളര്‍ എന്ന റെക്കോര്‍ഡ് ഉയരത്തിലേക്ക് കുതിച്ചു. വെറും രണ്ടാഴ്ച കൊണ്ട് 27 ശതമാനത്തിന്റെ വര്‍ദ്ധനവാണ് വെള്ളിവിലയില്‍ രേഖപ്പെടുത്തിയത്. അമേരിക്കയിലെ പണപ്പെരുപ്പം കുറയുന്നതോടെ അമേരിക്കന്‍ സെന്‍ട്രല്‍ ബാങ്ക് പലിശ നിരക്ക് കുറയ്ക്കുമെന്ന ഉറച്ച വിശ്വാസത്തിലാണ് നിക്ഷേപകര്‍. പലിശ നിരക്ക് കുറയുമ്പോള്‍ ഡോളറിനേക്കാള്‍ ലാഭകരമായ സ്വര്‍ണത്തിലേക്കും വെള്ളിയിലേക്കും നിക്ഷേപം ഒഴുകുന്നു.

വിപണിയിലെ ഈ മാറ്റങ്ങള്‍ക്ക് പിന്നില്‍ രാഷ്ട്രീയ പോരാട്ടങ്ങളുമുണ്ട്. പലിശ നിരക്ക് ഗണ്യമായി കുറയ്ക്കണമെന്ന് പ്രസിഡന്റ് ഡൊണാള്‍ഡ് ട്രംപ് ഫെഡറല്‍ റിസര്‍വ് ചെയര്‍മാന്‍ ജെറോം പവലിന് മേല്‍ കടുത്ത സമ്മര്‍ദ്ദം ചെലുത്തുന്നു. അമേരിക്കന്‍ ഭരണകൂടവും സെന്‍ട്രല്‍ ബാങ്കും തമ്മിലുള്ള ഈ അസ്വാരസ്യം നിക്ഷേപകര്‍ക്കിടയില്‍ ഒരുതരം ആശങ്ക സൃഷ്ടിച്ചിട്ടുണ്ട്, ഇതും സ്വര്‍ണത്തിന് കരുത്തായി.

ഓസ്‌ട്രേലിയ ആന്‍ഡ് ന്യൂസിലന്‍ഡ് ബാങ്ക് നല്‍കുന്ന സൂചന പ്രകാരം, 2026-ന്റെ ആദ്യ പകുതിയില്‍ തന്നെ സ്വര്‍ണം ഔണ്‍സിന് 5,000 ഡോളര്‍ കടക്കാന്‍ സാധ്യതയുണ്ട്. വെള്ളി വൈകാതെ തന്നെ 100 ഡോളര്‍ എന്ന മാന്ത്രിക സംഖ്യ തൊടുമെന്നും വിദഗ്ധര്‍ പ്രവചിക്കുന്നു.