20 ദിവസത്തെ ഏറ്റവും താഴ്ന്ന വിലയില്‍ സ്വര്‍ണം

സംസ്ഥാനത്തെ സ്വ‍‍‍‍ര്‍ണ വില 20 ദിവസത്തെ ഏറ്റവും താഴ്ന്ന വിലയിലേക്ക് എത്തി. ഈ മാസത്തില്‍ ഇതുവരെ ജനുവരി രണ്ടിന് മാത്രമാണ് വിലയില്‍ വര്‍ധന പ്രകടമായത്. ബാക്കിയുള്ള ദിവസങ്ങളിലെല്ലാം വില ഇടിയുകയോ മാറ്റമില്ലാതെ തുടരുകയോ ആയിരുന്നു. ഇന്ന് 22 കാരറ്റ് സ്വര്‍ണം ഗ്രാമിന്‍റെ വില 10 രൂപയുടെ ഇടിവോടെ 5760 രൂപയില്‍ എത്തി. പവന് 80 രൂപയുടെ ഇടിവോടെ 46,080 രൂപയാണ് ഇന്നത്തെ വില. കഴിഞ്ഞ 9 ദിവസങ്ങള്‍ക്കിടെ വിലയില്‍ 920 രൂപയുടെ കുറവാണ് ഉണ്ടായത്.

24 കാരറ്റ് സ്വര്‍ണത്തിന്‍റെ വിലയും ഇന്ന് ഇടിഞ്ഞു. 24 കാരറ്റ് ഗ്രാമിന് 12 രൂപയുടെ ഇടിവോടെ 6283 രൂപയാണ് ഇന്നത്തെ വില, പവന് 96 രൂപയുടെ ഇടിവോടെ 50,264 രൂപയാണ്.

ആഗോളതലത്തില്‍ ഡോളർ ശക്തി പ്രാപിക്കുന്നതും ട്രഷറി ആദായം ഉയർന്നതും സ്വര്‍ണത്തിന് തിരിച്ചടി നല്‍കുന്നു. അന്താരാഷ്ട്ര വിപണിയില്‍ സ്വര്‍ണ വില ഇന്ന് ട്രോയ് ഔണ്‍സിന് 2033 ഡോളറിലാണ് (രാവിലെ 11.04നുള്ള വിവരം) വ്യാപാരം നടത്തുന്നത് . ഡിസംബറില്‍ സ്വര്‍ണവില പുതിയ ഉയരങ്ങളിലേക്ക് കുതിച്ചിരുന്നു. സംസ്ഥാനത്തെ സ്വര്‍ണ വില കഴിഞ്ഞമാസം രണ്ടു തവണ പുതിയ റെക്കോഡുകള്‍ കുറിച്ചു.

സംസ്ഥാനത്തെ വെള്ളിവിലയില്‍ ഇന്ന് മാറ്റമില്ല. വെള്ളി ഗ്രാമിന് 77.50 രൂപയാണ് ഇന്നത്തെ വില.