സ്വര്‍ണത്തിന് ഇന്നും ഉയര്‍ച്ച

സംസ്ഥാനത്തെ സ്വര്‍ണ വിലയില്‍ തുടര്‍ച്ചയായ മൂന്നാം ദിവസവും മുന്നേറ്റം. 22 കാരറ്റ് ഗ്രാമിന് കഴിഞ്ഞ രണ്ട് ദിവസങ്ങളില്‍ 5 രൂപയുടെ വീതം വര്‍ധനയാണ് ഉണ്ടായത് എങ്കില്‍ ഇന്ന് ഉണ്ടായിരിക്കുന്നത് 10 രൂപയുടെ വര്‍ധന. ഇന്ന് 5430 രൂപയാണ് വില. പവന് ഇന്ന് 43,440 രൂപ, 80 രൂപയുടെ വര്‍ധന. കഴിഞ്ഞ മൂന്നു ദിവസങ്ങളിലായി മൊത്തം 280 രൂപയുടെ വര്‍ധനയാണ് പവന് ഉണ്ടായത്. ഈ മാസം 6 ദിവസങ്ങളില്‍ മാത്രമാണ് സ്വര്‍ണ വില ഉയര്‍ന്നത്.

24 കാരറ്റ് സ്വര്‍ണം ഗ്രാമിന്‍റെ വിലയിലും ഇന്ന് 10 രൂപയുടെ വര്‍ധനയാണ് ഉണ്ടായത്. 5923 രൂപയാണ് ഇന്നത്തെ വില. പവന് 47,384 രൂപ, 80 രൂപയുടെ വര്‍ധന. ആഗോള തലത്തില്‍ സ്വര്‍ണവില ഔണ്‍സിന് 1900 ഡോളറിന് മുകളിലേക്ക് തിരിച്ചെത്തി. ഔണ്‍സിന് 1903.18(ഇന്ത്യന്‍ സമയം 11:35ന്) എന്ന തലത്തിലാണ് ആഗോള തലത്തില്‍ സ്വര്‍ണവില പുരോഗമിക്കുന്നത്.

മാര്‍ച്ച് അവസാനം മുതല്‍ മേയ് രണ്ടാം വാരം വരെയുള്ള കാലയളവില്‍ സ്വര്‍ണം വലിയ കുതിപ്പിന്റെ പാതയിലായിരുന്നു. എന്നാല്‍ തുടര്‍ന്നങ്ങോട്ട് വിലയില്‍ തുടര്‍ച്ചയായ ചാഞ്ചാട്ടവും ക്രമേണ ഇടിവും ഉണ്ടാകുകയായിരുന്നു. ജൂണില്‍ വെറും 7 ദിവസങ്ങളില്‍ മാത്രമാണ് സ്വര്‍ണ വിലയില്‍ വര്‍ധന രേഖപ്പെടുത്തിയത്. ജൂലൈയില്‍ പൊതുവേ ചാഞ്ചാട്ടമാണ് വിലയില്‍ കണ്ടത്. ഓഗസ്റ്റില്‍ വീണ്ടും ഇടിവ് പ്രകടമാകുന്നതിലേക്ക് നീങ്ങി.

സംസ്ഥാനത്തെ വെള്ളിവിലയില്‍ ഇന്ന് മാറ്റമില്ല. ഒരു ഗ്രാം വെള്ളിക്ക് 78 രൂപയാണ് വില. എട്ട് ഗ്രാം വെള്ളിക്ക് 624 രൂപ, ഡോളറിനെതിരേ രൂപയുടെ മൂല്യം ഇന്ന് നേരിയ തോതില്‍ മെച്ചപ്പെട്ടു. ഡോളറിന് 82.95 രൂപ എന്ന നിലയാണ് വിനിമയം.