ചാഞ്ചാട്ടം തുടര്‍ന്ന് സ്വര്‍ണവില; ഇന്ന് വര്‍ധിച്ചത് പവന് 400 രൂപ

സംസ്ഥാനത്ത് ഇന്ന് സ്വര്‍ണവിലയില്‍ വര്‍ധന. ഗ്രാമിന് 50 രൂപയും പവന് 400 രൂപയുമാണ് വര്‍ധിച്ചത്. ഇതോടെ സ്വര്‍ണം ഗ്രാമിന് 9060 രൂപയും പവന് 72480 രൂപയുമായി ഉയര്‍ന്നു. ഇന്നലെ കുറഞ്ഞ വിലയാണ് അതേപോലെ ഇന്ന് വര്‍ധിച്ചിരിക്കുന്നത്.

18 കാരറ്റ് സ്വര്‍ണവിലയും ആനുപാതികമായി ഉയര്‍ന്നു. ഗ്രാമിന് 40 രൂപ വര്‍ധിച്ച് 7430 രൂപയ്ക്കാണ് ഇന്നത്തെ വ്യാപാരം. വെള്ളിവിലയില്‍ ഇന്നും മാറ്റമില്ല. ഗ്രാമിന് 116 രൂപയാണ് വിപണിവില.

യുഎസ് തീരുവ അടുത്തമാസം ഒന്നിന് നടപ്പില്‍ വരുന്നതോടെ ആഗോള വ്യാപാരം കുറയും എന്നാണ് വിലയിരുത്തല്‍. ഇത് സ്വര്‍ണത്തിലേക്ക് നിക്ഷേപകരെ അടുപ്പിക്കുന്നു. മാന്ദ്യം പോലുള്ള സാഹചര്യം വരാനുള്ള സാധ്യത ആരും തള്ളിക്കളയുന്നില്ല. ഇതാണ് സ്വര്‍ണ വില ഉയരാന്‍ കാരണമായത്.

ഇന്നലെ ട്രംപിന്റെ തീരുവ നടപ്പാക്കല്‍ പ്രഖ്യാപനത്തിനുശേഷമാണ് അന്താരാഷ്ട്ര വിപണിയില്‍ സ്വര്‍ണവില ഉയര്‍ന്നത്. ഔണ്‍സിന് 3300 ഡോളറില്‍ താഴെയെത്തിയ സ്വര്‍ണം തിരിച്ചു കയറുകയായിരുന്നു. ഇന്ന് രാവിലെ വില നേരിയതോതില്‍ താഴ്ന്നിട്ടുണ്ട്.