പൊന്നിന് പടിയിറക്കം; അപ്രതീക്ഷിതം ഈ വിലയിടിവ്, ഇപ്പോള്‍ വാങ്ങാമോ?

സംസ്ഥാനത്ത് സ്വര്‍ണവിലയില്‍ ഇന്ന് അപ്രതീക്ഷിത ഇടിവ്. ഗ്രാമിന് 40 രൂപയും പവന് 320 രൂപയുമാണ് കുറഞ്ഞത്. ഇതോടെ ഒരു ഗ്രാം സ്വര്‍ണത്തിന്റെ വില 13,840 രൂപയായും ഒരു പവന്റെ വില 1,10,720 രൂപയായും താഴ്ന്നു. 18 കാരറ്റ് സ്വര്‍ണത്തിന് 30 രൂപ കുറഞ്ഞു. ഗ്രാമിന് 22,370 രൂപയാണ് ഇന്നത്തെ വില. അതേസമയം, വെള്ളിവിലയില്‍ മാറ്റമില്ല; ഗ്രാമിന് 240 രൂപ നിരക്കിലാണ് വ്യാപാരം പുരോഗമിക്കുന്നത്.

സ്വര്‍ണവിലയിലെ ഈ കുറവ് ആഭരണം വാങ്ങാന്‍ കാത്തിരിക്കുന്നവര്‍ക്ക് ആശ്വാസമാണ്. കഴിഞ്ഞ ദിവസം ഈ മാസത്തെ ഉയര്‍ന്ന നിരക്കിലെത്തിയ ശേഷമാണ് വില താഴ്ന്നത്. സ്വര്‍ണ ഇടിഎഫുകളിലേക്കുള്ള നിക്ഷേപം വര്‍ധിച്ചതും എണ്ണ വിപണിയിലെ യുഎസ്-റഷ്യ നീക്കങ്ങളും സ്വര്‍ണവിപണിയെ സ്വാധീനിച്ച ഘടകങ്ങളാണ്. എന്നാല്‍ അന്താരാഷ്ട്ര വിപണിയില്‍ സ്വര്‍ണവില ഉയരുന്ന സാഹചര്യത്തിലാണ് സംസ്ഥാനത്ത് വില കുറഞ്ഞതെന്നത് ശ്രദ്ധേയമാണ്.

റഷ്യയില്‍നിന്ന് ഡീസല്‍ വാങ്ങാനുള്ള യുഎസ് തീരുമാനത്തിനു പിന്നാലെ എണ്ണവിലയില്‍ ഇടിവുണ്ടായതും ഡോളര്‍ സൂചിക താഴ്ന്നതും ആഗോള വിപണിയിലെ സ്വര്‍ണവില ഉയരാന്‍ സഹായിച്ചു. അതേസമയം, യുഎസും ഇന്ത്യയും ഈ ആഴ്ച പുറത്തുവിടുന്ന പണപ്പെരുപ്പ കണക്കുകള്‍ സ്വര്‍ണവിപണിയുടെ അടുത്ത നീക്കത്തെ നിര്‍ണയിക്കുന്നതില്‍ നിര്‍ണായകമാകും. യുഎസ് ഫെഡറല്‍ റിസര്‍വിന്റെ പലിശനിരക്ക് സംബന്ധിച്ച തീരുമാനങ്ങളും സ്വര്‍ണവിലയെ സ്വാധീനിക്കും. പലിശനിരക്കുകള്‍ ഉയര്‍ത്തിയാല്‍ സ്വര്‍ണവിലയില്‍ സമ്മര്‍ദമുണ്ടാകാം; മറിച്ചുള്ള സാഹചര്യം വില ഉയരാന്‍ വഴിയൊരുക്കിയേക്കാം.

വില കുറഞ്ഞെങ്കിലും സ്വര്‍ണാഭരണം വാങ്ങാന്‍ വലിയ തുക തന്നെ ചെലവഴിക്കേണ്ടിവരും. ഇന്ന് ഒരു പവന്‍ സ്വര്‍ണാഭരണം വാങ്ങാന്‍ കുറഞ്ഞത് അഞ്ച് ശതമാനം പണിക്കൂലിയും മറ്റ് നികുതികളും ഉള്‍പ്പെടെ ഏകദേശം 1,19,550 രൂപ വേണ്ടിവരും. ഡിസൈന്‍, പണിക്കൂലി, മറ്റ് അധിക നിരക്കുകള്‍ എന്നിവ അനുസരിച്ച് അന്തിമ വിലയില്‍ വ്യത്യാസമുണ്ടാകാം. വരും ദിവസങ്ങളിലെ ആഗോള സാമ്പത്തിക സൂചനകളും പലിശനിരക്ക് സംബന്ധിച്ച നീക്കങ്ങളും സ്വര്‍ണവിലയുടെ ഗതി നിര്‍ണയിക്കും.