സ്വര്‍ണവില വീണ്ടും കൂപ്പുകുത്തി; വമ്പന്‍ ഇടിവുമായി പവന് ഒരു ലക്ഷത്തിന് താഴെ

സംസ്ഥാനത്തെ സ്വര്‍ണ വിപണിയെ അമ്പരപ്പിച്ചുകൊണ്ട് പവന്‍ വില വീണ്ടും കുത്തനെ താഴേക്ക്. മാസങ്ങളായി ഒരു ലക്ഷത്തിന് മുകളില്‍ നടുങ്ങിനിന്ന സ്വര്‍ണവില ഒടുവില്‍ 99,480 രൂപയിലേക്ക് കൂപ്പുകുത്തി. ഇന്ന് ഉച്ചയ്ക്ക് ശേഷം മാത്രം ഗ്രാമിന് 400 രൂപയും പവന് 3200 രൂപയുമാണ് കുറഞ്ഞത്. രാവിലെ രേഖപ്പെടുത്തിയ ഇടിവ് കൂടി ചേര്‍ത്താല്‍ ഇന്ന് മാത്രം പവന് 7,560 രൂപയുടെ ഞെട്ടിക്കുന്ന കുറവാണ് ഇന്ന് വിപണിയിലുണ്ടായത്. ജനുവരി 5-ന് ശേഷം ആദ്യമായാണ് സ്വര്‍ണവില ഒരു ലക്ഷത്തിന് താഴെയെത്തുന്നത്.

വിവാഹ സീസണിന്റെ തിരക്കിലായിരുന്ന സാധാരണക്കാര്‍ക്കും നിക്ഷേപകര്‍ക്കും ഈ വിലയിടിവ് വലിയ ആശ്വാസമാണ് പകരുന്നത്. നിലവില്‍ ഒരു ഗ്രാം സ്വര്‍ണത്തിന് 12,435 രൂപയാണ് നിരക്ക്. 18 കാരറ്റ് സ്വര്‍ണത്തിന് ഗ്രാമിന് 10,225 രൂപയും വെള്ളിക്ക് ഗ്രാമിന് 230 രൂപയുമാണ് നിലവിലെ വില. ജനുവരി 29-ന് രേഖപ്പെടുത്തിയ ഏറ്റവും ഉയര്‍ന്ന വിലയായ 1,31,160 രൂപയില്‍ നിന്നും ഏകദേശം 31,680 രൂപയുടെ കുറവാണ് ഇതുവരെയുണ്ടായിരിക്കുന്നത്.

അന്താരാഷ്ട്ര വിപണിയിലെ വന്‍ തകര്‍ച്ചയാണ് കേരളത്തിലും പ്രതിഫലിക്കുന്നത്. ആഗോള വിപണിയില്‍ സ്വര്‍ണവില ഔണ്‍സിന് 250 ഡോളറിലേറെ ഇടിഞ്ഞത് പ്രാദേശിക വിപണിയെയും പിടിച്ചുലച്ചു. ഇതിനുപുറമെ, സുരക്ഷിത നിക്ഷേപം എന്ന നിലയില്‍ നിന്ന് നിക്ഷേപകരുടെ താല്‍പ്പര്യം മറ്റ് മേഖലകളിലേക്ക് മാറുന്നതും പൊന്നിന് തിരിച്ചടിയായിട്ടുണ്ട്. പശ്ചിമേഷ്യന്‍ സംഘര്‍ഷങ്ങള്‍ക്കിടയിലും ഡോളര്‍ കരുത്താര്‍ജ്ജിച്ചത് സ്വര്‍ണത്തിന്റെ തിളക്കം കുറയാന്‍ പ്രധാന കാരണമായി.

വിപണിയിലെ ഈ അപ്രതീക്ഷിത ചാഞ്ചാട്ടം സ്വര്‍ണം വാങ്ങാന്‍ കാത്തിരുന്നവര്‍ക്ക് സുവര്‍ണാവസരമാണ് ഒരുക്കിയിരിക്കുന്നത്. ഈ മാസത്തിന്റെ തുടക്കത്തില്‍ 1,26,920 രൂപയായിരുന്ന പവന്‍ വിലയാണ് ഇപ്പോള്‍ ലക്ഷത്തിന് താഴെയെത്തിയത്. വരും ദിവസങ്ങളിലും അന്താരാഷ്ട്ര വിപണിയിലെ മാറ്റങ്ങള്‍ക്കനുസരിച്ച് വിലയില്‍ കൂടുതല്‍ ഇടിവുണ്ടാകുമോ അതോ തിരിച്ചു കയറുമോ എന്നാണ് ഉപഭോക്താക്കളും വ്യാപാരികളും ഒരുപോലെ ഉറ്റുനോക്കുന്നത്.