ജ്വല്ലറികളില്‍ ദീപാവലിത്തിരക്കേറുമോ? സ്വര്‍ണവില വീണ്ടും കുതിപ്പില്‍

സംസ്ഥാനത്ത് സ്വര്‍ണവില ഇന്ന് നേരിയ തോതില്‍ ഉയര്‍ന്നു. 22 കാരറ്റ് സ്വര്‍ണത്തിന് ഗ്രാമിന് 25 രൂപയും പവന് 200 രൂപയുമാണ് വര്‍ധിച്ചത്. ഇതോടെ ഗ്രാം വില 12,800 രൂപയായും പവന്‍ വില 1,02,400 രൂപയായും എത്തി. ഇത് തുടര്‍ച്ചയായ മൂന്നാം ദിവസമാണ് സ്വര്‍ണവില വര്‍ദ്ധിക്കുന്നത്. വില ഉയര്‍ന്നിട്ടും ദീപാവലി വില്‍പ്പന സീസണ്‍ ആയതിനാല്‍ ജ്വല്ലറികളില്‍ തിരക്കേറുന്നുണ്ട്.

അന്താരാഷ്ട്ര വിപണിയിലെ ചലനമാണ് ഈ വിലവര്‍ധനയ്ക്ക് പിന്നില്‍. ഇറാന്‍-യുഎസ് സമാധാന ചര്‍ച്ചകളില്‍ പ്രതീക്ഷ ഉയര്‍ന്നതോടെ ക്രൂഡ് ഓയില്‍ വില ഒരു മാസത്തെ താഴ്ചയിലേക്ക് നീങ്ങി. ഇതോടെ ഡോളറിന്റെ മൂല്യം ഇടിഞ്ഞു. ഇത് സുരക്ഷിത നിക്ഷേപമായ സ്വര്‍ണത്തിന് ഡിമാന്‍ഡ് കൂട്ടി, അന്താരാഷ്ട്ര സ്വര്‍ണവില ഔണ്‍സിന് 3,950 ഡോളറിന് മുകളിലെത്തി. യുഎസ് ഇടക്കാല തെരഞ്ഞെടുപ്പിലെ അനിശ്ചിതത്വവും സ്വര്‍ണവിപണിയെ സ്വാധീനിക്കുന്നു.

എന്നാല്‍, ദീപാവലിക്ക് സ്വര്‍ണം വാങ്ങുന്നത് ഐശ്വര്യമാണെന്ന വിശ്വാസവും ജ്വല്ലറികള്‍ പ്രഖ്യാപിച്ച പണിക്കൂലി ഇളവ്, മേക്കിംഗ് ചാര്‍ജ് ഓഫറുകള്‍, ഗോള്‍ഡ് എക്‌സ്‌ചേഞ്ച് പദ്ധതികള്‍ എന്നിവയും വില്‍പ്പനയെ പിടിച്ചുനിര്‍ത്തുന്നു. 18 കാരറ്റ് ആഭരണങ്ങള്‍ക്കാണ് ഇത്തവണ കൂടുതല്‍ ഡിമാന്‍ഡ്; ഇന്നത്തെ വില ഗ്രാമിന് 10,473 രൂപ. വില ഇനിയും കൂടുമെന്ന ആശങ്കയില്‍ പലരും മുന്‍കൂര്‍ ബുക്കിംഗ് നടത്തുന്നുണ്ടെന്ന് വ്യാപാരികള്‍ പറയുന്നു. കേരളത്തില്‍ ദീപാവലി കാലത്ത് 20-30% വരെ വില്‍പ്പന വര്‍ധനയാണ് മേഖല പ്രതീക്ഷിക്കുന്നത്. അതേസമയം വെള്ളിവില ഗ്രാമിന് 200 രൂപയില്‍ മാറ്റമില്ലാതെ തുടരുന്നു.

നിലവില്‍ ഒരു പവന്‍ സ്വര്‍ണാഭരണം വാങ്ങുന്നതിന് ഏറ്റവും കുറഞ്ഞത് 5 ശതമാനം പണിക്കൂലിയും മറ്റ് നികുതികളും ചേര്‍ത്ത് 1,11,153 രൂപയെങ്കിലും നല്‍കേണ്ടിവരും.