സ്വർണ വില കുറഞ്ഞു, പവന് 520 രൂപയുടെ കുറവ്

സംസ്ഥാനത്ത് സ്വർണ വില കുറഞ്ഞു. പവന് 114560 രൂപയും ഗ്രാമിന് 14320 രൂപയുമാണ് വില. രാജ്യാന്തര വിപണിയിൽ ട്രോയ് ഔൺസിന് 4543 ഡോളറിലാണ് വില. ഇന്നലെ ഒരു പവൻ സ്വർണത്തിന് 115080 രൂപയായിരുന്നു വില. മെയ് 13 ന് രാവിലെയാണ് ഈ മാസത്തെ ഏറ്റവും ഉയർന്ന നിരക്കിൽ സ്വർണ വില എത്തിയത്. പവന് 123120 രൂപയായിരുന്നു വില. പിന്നീട് വില ഇടിയുകയായിരുന്നു.

തിങ്കളാഴ്ച രാവിലെ എംസിഎക്‌സിലും സ്വർണ്ണ വില കുറഞ്ഞു. അസംസ്‌കൃത എണ്ണ വിലയിലെ കുതിച്ചുചാട്ടം ഡോളറിന്റെ ആവശ്യകത വർദ്ധിപ്പിച്ചു. ഡോളർ സൂചിക ഉയരാൻ ഇത് കാരണമാവുകയും ചെയ്തു. ഡോളർ ശക്തമാകുന്നത് മറ്റ് കറൻസികളിൽ സ്വ‍ർണം വാങ്ങുന്നവർക്ക് ചെലവ് ഉയ‍ർത്തും. ഉയർന്ന ക്രൂഡ് ഓയിൽ വില പണപ്പെരുപ്പ ആശങ്കകൾക്ക് കാരണമാവുന്നതാണ് പ്രധാന തിരിച്ചടി. എംസിഎക്‌സിൽ ജൂൺ ​ഗോൾഡ് ഫ്യൂച്ചേഴ്സ് 0.43% കുറഞ്ഞ് 10 ഗ്രാമിന് 1,57,858 എന്ന നിലയിലെത്തി. ജൂലൈ ഫ്യൂച്ചേഴ്സ് 1.24% കുറഞ്ഞ് കിലോയ്ക്ക് 2,68,511 എന്ന നിലയിലാണ്.