ആഭരണപ്രേമികള്‍ക്ക് ആശങ്ക; സ്വര്‍ണവിലയില്‍ വീണ്ടും വര്‍ദ്ധനവ്, ഇന്നത്തെ നിരക്ക് അറിയാം

സംസ്ഥാനത്ത് സ്വര്‍ണവിപണിയില്‍ വിലവര്‍ധനവ്. ആഗോള വിപണിയിലെ അസ്ഥിരതയും യുദ്ധസാഹചര്യങ്ങളും ആഭ്യന്തര വിപണിയില്‍ പ്രതിഫലിച്ചതോടെ ചൊവ്വാഴ്ച വൈകുന്നേരം സ്വര്‍ണവിലയില്‍ ഗണ്യമായ വര്‍ദ്ധനവ് രേഖപ്പെടുത്തി. 22 കാരറ്റ് സ്വര്‍ണത്തിന് ഗ്രാമിന് 75 രൂപയും പവന് 600 രൂപയും വര്‍ധിച്ചു. ഇതോടെ ഒരു ഗ്രാം സ്വര്‍ണത്തിന് 13,705 രൂപയും, ഒരു പവന് 1,09,640 രൂപയുമായി വില ഉയര്‍ന്നു. വിവാഹ സീസണ്‍ അടുത്തുവരുന്ന സാഹചര്യത്തില്‍ വിലയിലുണ്ടാകുന്ന ഈ വര്‍ദ്ധനവ് സാധാരണക്കാരായ ഉപഭോക്താക്കളില്‍ വലിയ ആശങ്ക ഉയര്‍ത്തുന്നു.

മറ്റ് കാരറ്റുകളിലും സമാനമായ രീതിയില്‍ വില ഉയര്‍ന്നിട്ടുണ്ട്. 18 കാരറ്റ് സ്വര്‍ണത്തിന് ഗ്രാമിന് 65 രൂപ വര്‍ദ്ധിച്ച് 11,265 രൂപയിലെത്തി. കഴിഞ്ഞ കുറച്ചു ദിവസങ്ങളായി സ്വര്‍ണവിലയില്‍ തുടര്‍ച്ചയായ ഏറ്റക്കുറച്ചിലുകളാണ് ദൃശ്യമാകുന്നത്. അന്താരാഷ്ട്ര തലത്തിലുള്ള സാമ്പത്തിക അനിശ്ചിതത്വങ്ങള്‍ വിപണിയെ സ്വാധീനിക്കുന്നതാണ് ഈ മാറ്റങ്ങള്‍ക്ക് പ്രധാന കാരണമായി ചൂണ്ടിക്കാണിക്കപ്പെടുന്നത്.

2026 ജനുവരി 29-ന് രേഖപ്പെടുത്തിയ ഗ്രാമിന് 16,395 രൂപയും പവന് 1,31,160 രൂപയുമാണ് കേരളത്തിലെ ഇതുവരെയുള്ള റെക്കോര്‍ഡ് വില. ആ റെക്കോര്‍ഡ് ഉയരത്തിലേക്ക് വില വീണ്ടും എത്തുമോ എന്ന ആശങ്കയിലാണ് നിക്ഷേപകര്‍. അന്താരാഷ്ട്ര വിപണിയിലെ ചലനങ്ങളും ഭൗമരാഷ്ട്രീയ സാഹചര്യങ്ങളും വരും ദിവസങ്ങളിലും സ്വര്‍ണവിലയില്‍ നിര്‍ണ്ണായകമായ സ്വാധീനം ചെലുത്താന്‍ സാധ്യതയുണ്ട്.