മാറ്റമില്ലാതെ സ്വര്‍ണവില

തുടര്‍ച്ചയായ മൂന്ന് ദിവസങ്ങളിലെ ഇടിവിന് ശേഷം സംസ്ഥാനത്തെ സ്വര്‍ണ വിലയില്‍ ഇന്ന് മാറ്റമില്ല. 22 കാരറ്റ് ഗ്രാമിന് ഇന്നലെ 35 രൂപയുടെ ഇടിവും അതിന് മുന്‍പുള്ള രണ്ട് ദിവസങ്ങളില്‍ 10 രൂപയുടെ വീതം ഇടിവുമാണ് ഉണ്ടായത്. ഇന്ന് ഗ്രാമിന് 5410 രൂപയാണ് വില. പവന് 43,280 രൂപ.ഈ മാസം 3 ദിവസങ്ങളില്‍ മാത്രമാണ് സ്വര്‍ണ വില ഉയര്‍ന്നത്. ഓഗസ്റ്റ് 1 ന് 44320 രൂപയായിരുന്നു 22 കാരറ്റ് സ്വര്‍ണം പവന്‍റെ വില. അതായത് ഇന്നത്തെ കണക്കു പ്രകാരം ഈ മാസത്തില്‍ ഇതുവരെ സംഭവിച്ചിട്ടുള്ളത് 1040 രൂപയുടെ ഇടിവാണ്.

24 കാരറ്റ് സ്വര്‍ണം ഗ്രാമിന്‍റെ വിലയിലും ഇന്ന് മാറ്റമില്ല, 5902 രൂപ. പവന് 47,216 രൂപയാണ് വില. ആഗോള തലത്തില്‍ സ്വര്‍ണവില ഔണ്‍സിന് 1900 ഡോളറിന് താഴേ തുടരുകയാണ്. ഔണ്‍സിന് 1892.28 ( ഇന്ത്യന്‍ സമയം 10:30ന്) എന്ന തലത്തിലാണ് ആഗോള തലത്തില്‍ സ്വര്‍ണവില പുരോഗമിക്കുന്നത്.

മാര്‍ച്ച് അവസാനം മുതല്‍ മേയ് രണ്ടാം വാരം വരെയുള്ള കാലയളവില്‍ സ്വര്‍ണം വലിയ കുതിപ്പിന്റെ പാതയിലായിരുന്നു. എന്നാല്‍ തുടര്‍ന്നങ്ങോട്ട് വിലയില്‍ തുടര്‍ച്ചയായ ചാഞ്ചാട്ടവും ക്രമേണ ഇടിവും ഉണ്ടാകുകയായിരുന്നു. ജൂണില്‍ വെറും 7 ദിവസങ്ങളില്‍ മാത്രമാണ് സ്വര്‍ണ വിലയില്‍ വര്‍ധന രേഖപ്പെടുത്തിയത്. ജൂലൈയില്‍ പൊതുവേ ചാഞ്ചാട്ടമാണ് വിലയില്‍ കണ്ടത്. ഓഗസ്റ്റില്‍ വീണ്ടും ഇടിവ് പ്രകടമാകുന്നു.

സംസ്ഥാനത്തെ വെള്ളിവിലയില്‍ ഇന്ന് വര്‍ധനയാണ് ഉണ്ടായത്. ഗ്രാമിന് 1 രൂപയുടെ ഉയര്‍ച്ചയോടെ 76.70 രൂപയില്‍ എത്തി. എട്ട് ഗ്രാം വെള്ളിക്ക് 613.60 രൂപ, 8 രൂപയുടെ വര്‍ധന. ഡോളറിനെതിരേ രൂപയുടെ മൂല്യം ഇന്ന് നേരിയ തോതില്‍ മെച്ചപ്പെട്ടു. 1 ഡോളറിന് 83.10 രൂപ എന്ന നിലയാണ് ഇന്ന് കറന്‍സി വിനിമയം പുരോഗമിക്കുന്നത്.