സെന്‍സെക്സും നിഫ്റ്റിയും കനത്ത ഇടിവില്‍; നിക്ഷേപകര്‍ക്ക് നഷ്ടം 3 ലക്ഷം കോടിക്കു മേല്‍

ദുർബലമായ ആഗോള വിപണി പ്രവണതകൾക്കും തുടർച്ചയായ വിദേശ ഫണ്ടുകളുടെ ഒഴുക്കിനും ഇടയിൽ ആഭ്യന്തര ഓഹരി വിപണി സൂചികകളി‍ല്‍‌ ഇന്ന് രേഖപ്പെടുത്തിയത് കനത്ത ഇടിവ്. ഇരു വിപണികളിലും ഒരു ശതമാനത്തിനു മുകളിലുള്ള ഇടിവ് ഉണ്ടായി. 30-ഷെയർ ബിഎസ്ഇ സെൻസെക്‌സ് 676.53 പോയിന്റ് അഥവാ 1.02 ശതമാനം ഇടിഞ്ഞ് 65,782.78ല്‍ എത്തി. എൻഎസ്ഇ നിഫ്റ്റി 207.00 പോയിന്റ് അഥവാ 1.05 ശതമാനം താഴ്ന്ന് 19,526.55ൽ എത്തി. 3 ലക്ഷം കോടിക്ക് മുകളില്‍ നഷ്ടം ഇന്നത്തെ വ്യാപാര സെഷനില്‍ നിക്ഷേപകര്‍ക്ക് ഉണ്ടായി.

യുഎസിന്‍റെ ക്രെഡിറ്റ് റേറ്റിംഗ് താഴ്ത്തിയ ഫിച്ച് റേറ്റിംഗ്സിന്‍റെ നടപടിയും പുതിയ കയറ്റുമതി നിയന്ത്രണങ്ങളും ജൂലൈയിലെ പണപ്പെരുപ്പം സംബന്ധിച്ച ആശങ്കകളും നിക്ഷേപകരുടെ വികാരത്തെ ബാധിച്ചു. ഏഷ്യൻ വിപണികളിൽ സിയോൾ, ടോക്കിയോ, ഷാങ്ഹായ്, ഹോങ്കോങ് എന്നിവ താഴ്ന്ന തലത്തിലാണ് വ്യാപാരം അവസാനിപ്പിച്ചത്. ചൊവ്വാഴ്ച യുഎസ് വിപണികൾ മിക്കവാറും നെഗറ്റീവ് ആയാണ് അവസാനിച്ചത്.

"ഇന്ത്യൻ വിപണി വിശാല അടിസ്ഥാനത്തിലുള്ള ഇറക്കത്തിന് സാക്ഷ്യം വഹിച്ചു. യുഎസ് റേറ്റിംഗ് താഴ്ത്തിയതു സംബന്ധിച്ച നെഗറ്റീവ് വാർത്തകളും യൂറോപ്പില്‍ നിന്നും ചൈനയിൽ നിന്നുമുള്ള ദുർബലമായ ഫാക്ടറി പ്രവർത്തന ഡാറ്റയും ലോകമെമ്പാടും വ്യാപകമായ ആശങ്കകളിലേക്ക് നയിച്ചു. കൂടാതെ, യുഎസ് ബോണ്ട് യീൽഡിലെ വർദ്ധന മൂലം എഫ്‌ഐഐ വിൽപ്പന തുടരുന്നതും ആഭ്യന്തര വിപണിയുടെ വികാരത്തെ നെഗറ്റിവായി ബാധിച്ചു," ജിയോജിത് ഫിനാൻഷ്യൽ സർവീസസിലെ റിസർച്ച് മേധാവി വിനോദ് നായർ പറഞ്ഞു.

സെൻസെക്‌സില്‍ ടാറ്റ സ്റ്റീൽ 3.45 ശതമാനം ഇടിഞ്ഞു, ടാറ്റ മോട്ടോഴ്‌സ് 3.19 ശതമാനം ഇടിഞ്ഞു. ബജാജ് ഫിൻസെർവ്, എൻടിപിസി, ജെഎസ്ഡബ്ല്യു സ്റ്റീൽ, സ്റ്റേറ്റ് ബാങ്ക് ഓഫ് ഇന്ത്യ, ലാർസൻ ആൻഡ് ടൂബ്രോ, ഭാരതി എയർടെൽ എന്നിവയാണ് നഷ്ടം രേഖപ്പെടുത്തിയ മറ്റ് ഓഹരികള്‍. നെസ്‌ലെ, ഏഷ്യൻ പെയിന്റ്‌സ്, ഹിന്ദുസ്ഥാൻ യുണിലിവർ, ടെക് മഹീന്ദ്ര തുടങ്ങിയ ഓഹരികൾ നേട്ടത്തിലായിരുന്നു.

ചൊവ്വാഴ്ചത്തെ വളരെ അസ്ഥിരമായ വ്യാപാരത്തിൽ, സെൻസെക്സ് 68.36 പോയിന്റ് അല്ലെങ്കിൽ 0.10 ശതമാനം ഇടിഞ്ഞ് 66,459.31 ൽ എത്തി. നിഫ്റ്റി 20.25 പോയിന്റ് അഥവാ 0.10 ശതമാനം ഇടിഞ്ഞ് 19,733.55 ൽ അവസാനിച്ചു.

വിദേശ സ്ഥാപന നിക്ഷേപകർ (എഫ്‌ഐഐ) 92.85 കോടി രൂപയുടെ ഓഹരികൾ ഇന്നലെ വിറ്റു, ആഭ്യന്തര സ്ഥാപന നിക്ഷേപകർ (ഡിഐഐ) ഓഗസ്റ്റ് ഒന്നിന് 1,035.69 കോടി രൂപയുടെ ഓഹരികൾ വാങ്ങിയെന്നും നാഷണൽ സ്റ്റോക്ക് എക്‌സ്‌ചേഞ്ചിന്റെ (എൻഎസ്‌ഇ) താൽക്കാലിക കണക്കുകൾ കാണിക്കുന്നു. 774.18 കോടി രൂപയുടെ അറ്റ വില്‍പ്പനയാണ് ഇന്നലെ വിദേശ പോര്‍ട്ട്ഫോളിയോ നിക്ഷേപകര്‍ ആഭ്യന്തര ഓഹരി വിപണികളില്‍ നടത്തിയത്. ഡെറ്റ് വിപണിയില്‍ 26.49 കോടി രൂപയുടെ അറ്റ വില്‍പ്പനയും നടത്തി.