ഓഹരിവിപണിയില്‍ കനത്ത ഇടിവ്; ഐടി ഓഹരികളില്‍ വന്‍ വീഴ്ച

എഐ-അധിഷ്ഠിത പിരിച്ചുവിടലും യുഎസില്‍ നിന്നുള്ള താരിഫ് ആശങ്കകളും കാരണം ഐടി ഓഹരികള്‍ ഇടിഞ്ഞതോടെ ബെഞ്ച്മാര്‍ക്ക് ഓഹരി വിപണി സൂചികകള്‍ ചൊവ്വാഴ്ച കനത്ത നഷ്ടത്തില്‍ ക്ലോസ് ചെയ്തു. സെന്‍സെക്‌സ് 1,068.74 പോയിന്റ് കുറഞ്ഞ് 82,225.92 ലും നിഫ്റ്റി 288.35 പോയിന്റ് കുറഞ്ഞ് 25,424.65 ലും വ്യാപാരം അവസാനിപ്പിച്ചു. ഇതുവഴി നിക്ഷേപകരുടെ ആറുലക്ഷം കോടിയിലധികം രൂപയാണ് ഇല്ലാതായത്.

ഐടി ഓഹരികളിലെ തകര്‍ച്ചയാണ് വിപണികളില്‍ കുത്തനെ ഇടിവ് ഉണ്ടാകാന്‍ കാരണമെന്ന് ജിയോജിത് ഇന്‍വെസ്റ്റ്മെന്റ്സ് ലിമിറ്റഡിന്റെ ഗവേഷണ മേധാവി വിനോദ് നായര്‍ പറഞ്ഞു. 'വ്യാപാര കരാറുകളെക്കുറിച്ചുള്ള ട്രംപിന്റെ മുന്നറിയിപ്പുകളും ദേശീയ സുരക്ഷാ താരിഫുകളെക്കുറിച്ചുള്ള റിപ്പോര്‍ട്ടുകളും അധിക സമ്മര്‍ദ്ദം സൃഷ്ടിച്ചതോടെ, ആഗോള വ്യാപാര, താരിഫ് ആശങ്കകള്‍ വീണ്ടും ഉയര്‍ന്നുവന്നു,' അദ്ദേഹം കൂട്ടിച്ചേര്‍ത്തു.

വിദേശ സ്ഥാപന നിക്ഷേപകരുടെ (എഫ്ഐഐ) വന്‍തോതിലുള്ള പലായനവും ആഗോള പണപ്പെരുപ്പ ഡാറ്റയെച്ചൊല്ലിയുള്ള വര്‍ദ്ധിച്ചുവരുന്ന ആശങ്കകളും വിപണിയെ ബാധിച്ചു. വിദേശ നിക്ഷേപകര്‍ ഇപ്പോള്‍ ബെയ്ജിംഗിലേക്കാണ് കൂടുമാറുന്നത്. യുഎസ് ഫെഡറല്‍ റിസര്‍വ് പലിശ നിരക്ക് കുറയ്ക്കുന്നതിനെക്കുറിച്ചുള്ള ആശങ്കകളും വിപണിയില്‍ പ്രതിഫലിച്ചു.

എച്ച്‌സിഎല്‍ ടെക്നോളജീസ്, ഇന്‍ഫോസിസ്, ടിസിഎസ്, എച്ച്ഡിഎഫ്സി ബാങ്ക്, ഐസിഐസിഐ ബാങ്ക് ഓഹരികളാണ് പ്രധാനമായി നഷ്ടം നേരിട്ടത്. രണ്ട് ഓഹരികളും 6% വീതം ഇടിഞ്ഞു. ബാങ്കിംഗ്, ഓട്ടോ എന്നിവയുള്‍പ്പെടെ മറ്റ് പ്രധാന മേഖലകളും കടുത്ത നഷ്ടത്തില്‍ അവസാനിച്ചു. എന്‍ടിപിസി, ജെഎസ് ഡബ്ല്യൂ സ്റ്റീല്‍, ഹിന്‍ഡാല്‍കോ, ടാറ്റ സ്റ്റീല്‍ ഓഹരികള്‍ നേട്ടം ഉണ്ടാക്കി.