ശുഭപ്രതീക്ഷയില്‍ ഇന്ത്യന്‍ വിപണി; റിലയന്‍സ് ഓഹരികള്‍ ശ്രദ്ധയില്‍

ഇന്ത്യന്‍ ഓഹരി വിപണി ഇന്ന് ഉണര്‍വ്വോടെ തുടങ്ങുമെന്നാണ് വിപണി നിരീക്ഷകരുടെ വിലയിരുത്തല്‍. കഴിഞ്ഞ ദിവസങ്ങളിലെ ആഗോള തലത്തിലെ പോസിറ്റീവ് സൂചനകളും, പ്രത്യേകിച്ച് യു.എസ്. ചൈന വ്യാപാരബന്ധങ്ങളിലെ മഞ്ഞുരുകലും ഇന്ത്യന്‍ ഓഹരികളെ സ്വാധീനിക്കാന്‍ സാധ്യതയുണ്ട്. നിലവിലെ ട്രെന്‍ഡ് തുടരുമെന്ന് സൂചന നല്‍കിക്കൊണ്ട് നിഫ്റ്റി 50-യും ബാങ്ക് നിഫ്റ്റിയും സുപ്രധാനമായ ടെക്‌നിക്കല്‍ നിലവാരങ്ങള്‍ നിലനിര്‍ത്തുന്നു എന്നത് നിക്ഷേപകര്‍ക്ക് ആത്മവിശ്വാസം നല്‍കുന്ന ഘടകമാണ്.

ആഗോള സൂചകങ്ങളും വിപണിയുടെ ആത്മവിശ്വാസവും

കഴിഞ്ഞ ആഴ്ച യു.എസ്. ഓഹരി വിപണി റെക്കോര്‍ഡ് ഉയരത്തിലാണ് വ്യാപാരം അവസാനിപ്പിച്ചത്. പണപ്പെരുപ്പ ഡാറ്റ പ്രതീക്ഷിച്ചതിലും കുറഞ്ഞത് 2025-ല്‍ യു.എസ്. ഫെഡറല്‍ റിസര്‍വ് പലിശ നിരക്കുകള്‍ കുറയ്ക്കും എന്ന പ്രതീക്ഷക്ക് തിരികൊളുത്തിയിരിക്കുന്നു. ഇത് ആഗോള തലത്തില്‍ നിക്ഷേപകരുടെ റിസ്‌ക് എടുക്കാനുള്ള മനോഭാവം വര്‍ദ്ധിപ്പിച്ചു. യുഎസ്‌ചൈന വ്യാപാര ചര്‍ച്ചകളിലെ പുരോഗതിയുടെ റിപ്പോര്‍ട്ടുകള്‍ ഏഷ്യന്‍ വിപണികള്‍ക്ക് നേട്ടമുണ്ടാക്കി. ഈ അനുകൂല സാഹചര്യം നമ്മുടെ ആഭ്യന്തര വിപണികള്‍ക്ക് ഇന്ന് ശക്തമായ പിന്തുണ നല്‍കും.

നിഫ്റ്റിയും ബാങ്ക് നിഫ്റ്റിയും

വിപണിയുടെ മൊത്തത്തിലുള്ള മാക്രോ തലത്തിലുള്ള കാഴ്ചപ്പാട് പോസിറ്റീവായി തുടരുകയാണ്.

നിഫ്റ്റി 50 ഫ്യൂച്ചേഴ്‌സ് നിലവില്‍ 25,946-ന് അടുത്ത് പോസിറ്റീവ് ബയാസിലാണ് വ്യാപാരം ചെയ്യുന്നത്. 21,737-ല്‍ നിന്ന് ആരംഭിച്ച ശക്തമായ മുന്നേറ്റം തുടരുന്നതായാണ് സൂചനകള്‍. എന്നാല്‍, 26,30026,350 തലങ്ങളില്‍ ഒരു ചെറിയ പ്രതിരോധം നേരിടാന്‍ സാധ്യതയുണ്ട്.

റിലേറ്റീവ് സ്‌ട്രെങ്ത് ഇന്‍ഡക്‌സ് ഓവര്‍ബോട്ട് സോണിന് അടുത്ത് എത്തുന്നത് ചെറിയ തോതിലുള്ള ലാഭമെടുപ്പിന് കാരണമായേക്കാം. എങ്കിലും, 25,300-ന് മുകളില്‍ നിലനില്‍ക്കുന്നിടത്തോളം കാലം നിഫ്റ്റിയുടെ ബുള്ളിഷ് ഘടന ശക്തമായി തുടരും. ഈ നിലവാരം ട്രേഡര്‍മാര്‍ക്ക് ഒരു സുപ്രധാന സ്റ്റോപ്പ് ലോസ് ആയി പരിഗണിക്കാവുന്നതാണ്.

ബാങ്ക് നിഫ്റ്റി ഫ്യൂച്ചേഴ്‌സും ശക്തമായ മുന്നേറ്റം തുടരുകയാണ്. 57,700-നടുത്ത് വ്യാപാരം നടക്കുന്ന സൂചിക, 58,000-58,640 തലങ്ങളിലെ പ്രതിരോധം മറികടന്നാല്‍ 60,000 ലക്ഷ്യമാക്കി നീങ്ങാന്‍ സാധ്യതയുണ്ട്. കുറഞ്ഞ വിലകളില്‍ വാങ്ങി മുന്നോട്ട് പോവുക എന്ന സമീപനം സ്വീകരിക്കുന്ന ട്രേഡര്‍മാര്‍ക്ക് 56,400-56,600 നിലവാരങ്ങള്‍ നിക്ഷേപത്തിന് പരിഗണിക്കാവുന്നതാണെന്നാണ് വിദഗാധരുടെ നിരീക്ഷണം.

റിലയന്‍സ് ഇന്‍ഡസ്ട്രീസ് : പ്രത്യേക ശ്രദ്ധയില്‍

ഇന്നത്തെ വിപണിയില്‍ റിലയന്‍സ് ഇന്‍ഡസ്ട്രീസ് ഓഹരികള്‍ പ്രത്യേക നിരീക്ഷണത്തിലായിരിക്കും. ഫേസ്ബുക്ക് ഓവര്‍സീസുമായി ചേര്‍ന്നുള്ള പുതിയ സംയുക്ത സംരംഭം പ്രഖ്യാപിച്ചതാണ് ഇതിന് കാരണം. 'റിലയന്‍സ് എന്റര്‍പ്രൈസ് ഇന്റലിജന്‍സ് എന്ന് പേരിട്ടിരിക്കുന്ന ഈ സംരംഭത്തില്‍ റിലയന്‍സിന് 70% ഓഹരി പങ്കാളിത്തമുണ്ട്. ഡിജിറ്റല്‍ ഇന്റലിജന്‍സ് രംഗത്ത് കമ്പനിയുടെ സാന്നിധ്യം ശക്തമാക്കാന്‍ ലക്ഷ്യമിട്ടുള്ള ഈ നീക്കം, ദീര്‍ഘകാലാടിസ്ഥാനത്തില്‍ റിലയന്‍സിന്റെ വളര്‍ച്ചക്ക് നിര്‍ണായകമായേക്കാം.

മറ്റ് ശ്രദ്ധേയമായ ഓഹരികള്‍

കോഫോര്‍ജ്: രണ്ടാം പാദത്തില്‍ പ്രതീക്ഷിച്ചതിലും മികച്ച ലാഭം രേഖപ്പെടുത്തി.

ഡോ. റെഡ്ഡീസ്, കോട്ടക് മഹീന്ദ്ര ബാങ്ക്, എസ്ബിഐ കാര്‍ഡ്: രണ്ടാം പാദത്തിലെ ലാഭം പ്രതീക്ഷിച്ചതിലും കുറവായിരുന്നു.

ആഗോളതലത്തിലെ നല്ല വാര്‍ത്തകളും അനുകൂലമായ ടെക്‌നിക്കല്‍ ഘടനയും കണക്കിലെടുക്കുമ്പോള്‍, ഇന്ത്യന്‍ വിപണി ഇന്ന് പോസിറ്റീവായ ഒരു ദിവസത്തിന് സാക്ഷ്യം വഹിക്കാനാണ് സാധ്യത. എന്നിരുന്നാലും, പ്രധാന പ്രതിരോധ നിലവാരങ്ങള്‍ പരീക്ഷിക്കുമ്പോള്‍ ഇടയ്ക്കിടെ ലാഭമെടുക്കാനുള്ള സാധ്യതയും തള്ളിക്കളയാനാവില്ല.