അസ്ഥിരതകൾക്കൊടുവിൽ ആഭ്യന്തര വിപണി ചുവപ്പിൽ ക്ലോസ് ചെയ്തു

അസ്ഥിരമായ വ്യാപാരത്തിനൊടുവിൽ ആഭ്യന്തര വിപണി നേരിയ ഇടിവോടെയാണ് വ്യാപാരം അവസാനിപ്പിച്ചത്. സെൻസെക്സ് 110.64 പോയൻ്റ് അഥവാ 0.15 ശതമാനം താഴ്ന്ന് 73,903.91ലും നിഫ്റ്റി 8.70 പോയൻ്റ് അഥവാ 0.04 ശതമാനം നഷ്ടത്തിൽ 22,453.30ലുമാണ് ക്ലോസ് ചെയ്തത്. യുഎസ് വിപണികളിൽ നിന്നുള്ള ദുർബലമായ വ്യാപാരം, വിദേശ നിക്ഷേപകരുടെ വില്പന എന്നിവ വിപണിയുടെ ഇടിവിലേക്ക് നയിച്ചു. സ്വകാര്യ ബാങ്കുകളുടെയും ഓട്ടോ ഓഹരികളിലെയും ലാഭമെടുപ്പും ഇടിവിന് കാരണമായി.

"ഇന്നലെ പുതിയ റെക്കോർഡ് നേട്ടം കൈവരിച്ചതിന് ശേഷം ആഭ്യന്തര വിപണി ഇന്ന് ഇടിവിലിലെത്തി. ഡോളറിൻ്റെ വർദ്ധനവ്, യുഎസ് ബോണ്ട് വരുമാനം വർധിപ്പിക്കൽ, ക്രൂഡ് ഓയിൽ വിലയിലെ ഉയർച്ച തുടങ്ങിയ ഘടകങ്ങൾ നിക്ഷേപകരുടെ വികാരത്തെ തളർത്തി," ജിയോജിത് ഫിനാൻഷ്യൽ സർവീസസ് റിസർച്ച് മേധാവി വിനോദ് നായർ പറഞ്ഞു.

നിഫ്റ്റിയിൽ ടാറ്റ കൺസ്യുമർ പ്രോഡക്ട്, മഹീന്ദ്ര ആൻഡ് മഹീന്ദ്ര, ഭാരത് പെട്രോളിയം, ബജാജ് ഓട്ടോ, അദാനി പോർട്സ്, ടാറ്റ മോട്ടോർസ് എന്നിവ നേട്ടത്തോടെ ക്ലോസ് ചെയ്തപ്പോൾ ഹീറോ മോട്ടോകോർപ്പ്, എച്ച്‌സിഎൽ ടെക്‌നോളജീസ്, കൊട്ടക് മഹീന്ദ്ര ബാങ്ക്, ഐസിഐസിഐ ബാങ്ക്, എസ്‌ബിഐ ലൈഫ് ഇൻഷുറൻസ് തുടങ്ങിയവ ഇടിഞ്ഞു.

സെക്ടറൽ സൂചികകളിൽ, റിയൽറ്റി, മെറ്റൽ, ഓയിൽ ആൻഡ് ഗ്യാസ്, മീഡിയ, പവർ, ഓട്ടോ എന്നിവ 1-2 ശതമാനം ഉയർന്നപ്പോൾ ഐടി, ടെലികോം സൂചികകൾ 0.5 ശതമാനം വീതം ഇടിഞ്ഞു. ബിഎസ്ഇ മിഡ്ക്യാപ്, സ്മോൾക്യാപ് സൂചികകൾ ഒരു ശതമാനം വീതം ഉയർന്നു.

ഡോളറിനെതിരെ രൂപയുടെ മൂല്യം നാല് പൈസ ഇടിഞ്ഞ് 83.43ൽ എത്തി. ബ്രെൻ്റ് ക്രൂഡ് 1.61 ശതമാനം ഉയർന്ന് ബാരലിന് 88.83 ഡോളറിലെത്തി. സ്വർണം ട്രോയ് ഔൺസിന് 1.17 ശതമാനം ഉയർന്ന് 2283.80 ഡോളറിലെത്തി.

ഏഷ്യൻ വിപണികളിൽ ഷാങ്ഹായ് ഇടിഞ്ഞു. ടോക്കിയോ, സിയോൾ, ഹോങ്കോങ് എന്നിവ നേട്ടത്തോടെ ക്ലോസ് ചെയ്തു. യൂറോപ്യൻ വിപണികളിൽ മിക്കതും പച്ചയിൽ വ്യാപാരം തുടരുന്നു. തിങ്കളാഴ്ച യുഎസ് വിപണികൾ നഷ്ടത്തിലാണ് അവസാനിച്ചത്.

വിദേശ നിക്ഷേപ സ്ഥാപനങ്ങൾ (എഫ്ഐഐ) തിങ്കളാഴ്ച 522.30 കോടി രൂപയുടെ ഓഹരികൾ വിറ്റു.

2020 ഒക്‌ടോബറിനു ശേഷമുള്ള ഉൽപ്പാദനത്തിലും പുതിയ ഓർഡറുകളിലും ശക്തമായ വർധനവുണ്ടായതിൻ്റെ പശ്ചാത്തലത്തിൽ ഇന്ത്യയുടെ ഉൽപ്പാദന മേഖലയുടെ വളർച്ച മാർച്ചിൽ 16 വർഷത്തെ ഏറ്റവും ഉയർന്ന നിലയിലേക്ക് എത്തിയതായി ഒരു പ്രതിമാസ സർവേ ചൊവ്വാഴ്ച അറിയിച്ചു.

കാലാനുസൃതമായി ക്രമീകരിച്ച എച്ച്എസ്ബിസി ഇന്ത്യ മാനുഫാക്ചറിംഗ് പർച്ചേസിംഗ് മാനേജർമാരുടെ സൂചിക (പിഎംഐ) ഫെബ്രുവരിയിലെ 56.9ൽ നിന്ന് മാർച്ചിൽ 16 വർഷത്തെ ഏറ്റവും ഉയർന്ന 59.1 ലേക്കെത്തി. ഇത് പുതിയ ഓർഡറുകൾ, ഔട്ട്പുട്ട്, ഇൻപുട്ട് സ്റ്റോക്കുകൾ എന്നിവയുടെ ശക്തമായ വളർച്ചയെ പ്രതിഫലിപ്പിക്കുന്നു.

പർച്ചേസിംഗ് മാനേജർമാരുടെ സൂചിക (പിഎംഐ) , 50-ന് മുകളിൽ ആണെങ്കിൽ വിപുലീകരണത്തെ അർത്ഥമാക്കുന്നു, 50-ൽ താഴെയാണെങ്കിൽ സങ്കോചത്തെ സൂചിപ്പിക്കുന്നു.

സെൻസെക്സ് 363.20 പോയിൻ്റ് അല്ലെങ്കിൽ 0.49 ശതമാനം ഉയർന്ന് 74,014.55 ലും നിഫ്റ്റി 135.10 പോയിൻ്റ് അല്ലെങ്കിൽ 0.61 ശതമാനം ഉയർന്ന് 22,462 ലയമാണ് തിങ്കളാഴ്‌ച ക്ലോസ് ചെയ്തത്.