എട്ട് മുന്‍നിര കമ്പനികള്‍ക്ക് വമ്പന്‍ നഷ്ടം; എസ്ബിഐയ്ക്ക് കനത്ത തിരിച്ചടി

ഓഹരി വിപണിയില്‍ കരിനിഴല്‍ വീഴ്ത്തി കഴിഞ്ഞ ഒരാഴ്ചക്കിടെ ഇന്ത്യയിലെ മുന്‍നിര കമ്പനികള്‍ക്ക് വന്‍ തിരിച്ചടി. വിപണി മൂല്യത്തില്‍ ഒന്നാമതുള്ള പത്ത് കമ്പനികളില്‍ എട്ടെണ്ണത്തിനും കൂടി 2,81,581.53 കോടി രൂപയുടെ നഷ്ടമാണ് സംഭവിച്ചത്. സെന്‍സെക്‌സ് സൂചിക 2,368 പോയിന്റ് താഴേക്ക് പതിച്ചതോടെ നിക്ഷേപകരുടെ ആത്മവിശ്വാസം വന്‍തോതില്‍ ഇടിഞ്ഞു.

പശ്ചിമേഷ്യയിലെ യുദ്ധസമാനമായ സാഹചര്യങ്ങളും അസംസ്‌കൃത എണ്ണവിലയിലുണ്ടായ കുത്തനെയുള്ള വര്‍ദ്ധനവുമാണ് വിപണിയെ പിടിച്ചുലച്ചത്. ബാങ്കിംഗ് മേഖലയ്ക്കാണ് ഏറ്റവും വലിയ പ്രഹരമേറ്റത്. സ്റ്റേറ്റ് ബാങ്ക് ഓഫ് ഇന്ത്യ മാത്രം 53,952 കോടി രൂപയുടെ മൂല്യമിടിവ് നേരിട്ടു. ഐസിഐസിഐ ബാങ്ക്, എച്ച്ഡിഎഫ്‌സി ബാങ്ക് എന്നിവയും സമാനമായ രീതിയില്‍ വലിയ തുകയുടെ നഷ്ടം രേഖപ്പെടുത്തി.

നിക്ഷേപകര്‍ക്ക് ആശ്വാസമേകാന്‍ ഈ തകര്‍ച്ചയ്ക്കിടയിലും രണ്ട് വമ്പന്മാര്‍ കരുത്തുകാട്ടി. റിലയന്‍സ് ഇന്‍ഡസ്ട്രീസും ഇന്‍ഫോസിസും മാത്രമാണ് നേട്ടമുണ്ടാക്കിയ കമ്പനികള്‍. റിലയന്‍സിന്റെ വിപണി മൂല്യം 14,750 കോടി രൂപ വര്‍ധിച്ച് 19.01 ലക്ഷം കോടി രൂപയിലെത്തി. ഐടി രംഗത്തെ പ്രമുഖരായ ഇന്‍ഫോസിസ് 3,459 കോടിയുടെ നേട്ടമുണ്ടാക്കി വിപണിയിലെ ഈ പ്രതിസന്ധി ഘട്ടത്തിലും പിടിച്ചുനിന്നു.

നിലവിലെ കണക്കുകള്‍ പ്രകാരം ഇന്ത്യയിലെ ഏറ്റവും മൂല്യമുള്ള കമ്പനിയായി റിലയന്‍സ് ഇന്‍ഡസ്ട്രീസ് ഒന്നാം സ്ഥാനം നിലനിര്‍ത്തുന്നു. തൊട്ടുപിന്നാലെ എച്ച്ഡിഎഫ്‌സി ബാങ്ക്, ഭാരതി എയര്‍ടെല്‍ എന്നിവരുണ്ട്. ടാറ്റ കണ്‍സള്‍ട്ടന്‍സി , എല്‍ ആന്‍ഡ് ടി, ഹിന്ദുസ്ഥാന്‍ യൂണിലിവര്‍ തുടങ്ങിയ വന്‍കിട കമ്പനികള്‍ വരും ആഴ്ചകളില്‍ വിപണിയിലെ തിരിച്ചുവരവ് പ്രതീക്ഷിച്ചിരിക്കുകയാണ്.