വിപണികളുടെ തുടക്കം ഇടിവില്‍; അനിശ്ചിതത്വം തുടരുന്നു

തുടർച്ചയായ വിദേശ ഫണ്ട് ഒഴുക്കിന്‍റെയും ആഗോള വിപണിയിൽ നിന്നുള്ള സമ്മിശ്ര പ്രവണതകളുടെയും പശ്ചാത്തലത്തില്‍ വ്യാഴാഴ്ച ആദ്യ വ്യാപാരത്തിൽ ബെഞ്ച്മാർക്ക് ഇക്വിറ്റി സൂചികകൾ ഇടിഞ്ഞു. 30-ഷെയർ ബിഎസ്ഇ സെൻസെക്‌സ് 102.13 പോയിന്റ് താഴ്ന്ന് 64,873.48 എന്ന നിലയിലെത്തി. നിഫ്റ്റി 34.35 പോയിന്റ് താഴ്ന്ന് 19,409.15 ലെത്തി. എന്നാല്‍ തുടര്‍ന്ന് ചാഞ്ചാട്ടത്തിലേക്ക് നീങ്ങിയ സൂചികകള്‍ രാവിലെ 10 .08നുള്ള നില അനുസരിച്ച് നേരിയ നേട്ടത്തിലാണ്.

സെൻസെക്‌സ് സ്ഥാപനങ്ങളിൽ ടെക് മഹീന്ദ്ര, റിലയൻസ് ഇൻഡസ്‌ട്രീസ്, ഹിന്ദുസ്ഥാൻ യുണിലിവർ, എച്ച്‌ഡിഎഫ്‌സി ബാങ്ക്, ഇൻഫോസിസ്, ജെഎസ്ഡബ്ല്യു സ്റ്റീൽ എന്നിവയാണ് പ്രധാനമായും ഇടിവ് നേരിടുന്നത്. മഹീന്ദ്ര ആൻഡ് മഹീന്ദ്ര, ഐസിഐസിഐ ബാങ്ക്, മാരുതി, വിപ്രോ, ലാർസൺ ആൻഡ് ടൂബ്രോ, ടാറ്റ മോട്ടോഴ്‌സ് തുടങ്ങിയ ഓഹരികൾ നേട്ടത്തിലാണ്.

ഏഷ്യൻ വിപണികളിൽ, സിയോൾ, ടോക്കിയോ, ഷാങ്ഹായ് എന്നിവ പോസിറ്റീവ് ടെറിട്ടറിയിൽ വ്യാപാരം നടത്തുമ്പോൾ ഹോങ്കോംഗ് താഴ്ന്ന നിലയിലാണ്. യുഎസ് വിപണികൾ ബുധനാഴ്ച സമ്മിശ്രമായ നിലയിലായിരുന്നു.ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.23 ശതമാനം ഉയർന്ന് ബാരലിന് 79.72 ഡോളറിലെത്തി.

വിദേശ സ്ഥാപന നിക്ഷേപകർ (എഫ്‌ഐഐ) ബുധനാഴ്ച ഇക്വിറ്റികളില്‍ 84.55 കോടി രൂപയുടെ അറ്റ വില്‍പ്പന നടത്തിയെന്ന് എക്സ്ചേഞ്ച് ഡാറ്റ വ്യക്തമാക്കുന്നു. ബിഎസ്ഇ ബെഞ്ച്മാർക്ക് 33.21 പോയിന്റ് (0.05 ശതമാനം) ഉയർന്ന് 64,975.61 എന്ന നിലയിലെത്തി. നിഫ്റ്റി 36.80 പോയിന്റ് (0.19 ശതമാനം) ഉയർന്ന് 19,443.50 ലെത്തി.