Login 
പഠിക്കാം & സമ്പാദിക്കാം 
Home
1 March 2026 2:57 PM IST
വിപണിയിലേക്ക് വിദേശ നിക്ഷേപകരുടെ വന് തിരിച്ചുവരവ്; എത്തിയത് 22,615 കോടി
MyFin Desk
Summary
കഴിഞ്ഞ 17 മാസത്തിനിടയിലെ ഏറ്റവും ഉയര്ന്ന പ്രതിമാസ നിക്ഷേപമാണ് കഴിഞ്ഞമാസമെത്തിയത്. ഇത് ഇന്ത്യന് വിപണിയിലുള്ള വിദേശികളുടെ വിശ്വാസം വീണ്ടെടുക്കുന്നതിന്റെ വ്യക്തമായ സൂചനയാണ്
ഇന്ത്യന് ഓഹരി വിപണിയില് വിദേശ നിക്ഷേപകരുടെ വന് തിരിച്ചുവരവ്. തുടര്ച്ചയായ മൂന്ന് മാസത്തെ വലിയ വിറ്റഴിക്കലിന് ശേഷം, വിദേശ പോര്ട്ട്ഫോളിയോ നിക്ഷേപകര് ഇന്ത്യന് ഇക്വിറ്റികളില് ഫെബ്രുവരിയില് നിക്ഷേപിച്ചത് 22,615 കോടി രൂപയാണ്. കഴിഞ്ഞ 17 മാസത്തിനിടയിലെ ഏറ്റവും ഉയര്ന്ന പ്രതിമാസ നിക്ഷേപമാണിത്. ഇത് ഇന്ത്യന് വിപണിയിലുള്ള വിദേശികളുടെ വിശ്വാസം വീണ്ടെടുക്കുന്നതിന്റെ സൂചനയാണ്.
തിരിച്ചുവരവിന് പിന്നിലെ പ്രധാന കാരണങ്ങള്
ഇന്ത്യയും യുഎസും തമ്മിലുള്ള ഇടക്കാല വ്യാപാര കരാര്, ആഭ്യന്തര വിപണിയിലെ ഓഹരി വിലകളില് വന്ന തിരുത്തലുകള്, മൂന്നാം പാദത്തിലെ ശക്തമായ കോര്പ്പറേറ്റ് വരുമാനം എന്നിവയാണ് നിക്ഷേപം വര്ധിക്കാന് കാരണമായത്. ഈ ഘടകങ്ങള് നിക്ഷേപകരുടെ ആത്മവിശ്വാസം വലിയ തോതില് വര്ധിപ്പിച്ചു.
റെക്കോര്ഡ് വില്പ്പനയ്ക്ക് ശേഷമുള്ള ഈമാറ്റം
ഫെബ്രുവരിയിലെ ഈ നിക്ഷേപം ശ്രദ്ധേയമാകുന്നത് കഴിഞ്ഞുപോയ മാസങ്ങളിലെ കണക്കുകള് പരിശോധിക്കുമ്പോഴാണ്. ജനുവരിയില് 35,962 കോടി രൂപയും, ഡിസംബറില് 22,611 കോടി രൂപയും, നവംബറില് 3,765 കോടി രൂപയുമാണ് വിദേശ നിക്ഷേപകര് പിന്വലിച്ചിരുന്നത്. 2025-ല് ആകെ 1.66 ട്രില്യണ് രൂപ പിന്വലിച്ചതിന് ശേഷം വിപണിയില് ഉണ്ടാകുന്ന വലിയൊരു വഴിത്തിരിവാണിത്.
ഐടി മേഖലയില് വില്പ്പന, ബാങ്കിംഗില് ആവേശം
നിക്ഷേപത്തില് മേഖല തിരിച്ചുള്ള വ്യത്യാസങ്ങള് പ്രകടമാണ്. ഐടി മേഖലയില് എഐ മൂലം ഉണ്ടാകാനിടയുള്ള ഭീഷണികള് കണക്കിലെടുത്ത് എഫ്പിഐകള് 10,956 കോടി രൂപയുടെ ഓഹരികള് വിറ്റൊഴിഞ്ഞു. എന്നാല്, ധനകാര്യ സേവനങ്ങള്, മൂലധന ഉല്പ്പന്നങ്ങള് (Capital Goods) എന്നീ മേഖലകളില് വന്തോതില് ഓഹരികള് വാങ്ങിക്കൂട്ടി.
ഭാവിയിലെ സൂചനകള്
വിദേശികള് നിക്ഷേപം തുടരുമെങ്കിലും, ഭാവിയില് അവര് കുറച്ചുകൂടി ശ്രദ്ധയോടെയുള്ള സമീപനമാണ് സ്വീകരിക്കുകയെന്ന് സാമ്പത്തിക വിദഗ്ധര് അഭിപ്രായപ്പെടുന്നു. എങ്കിലും, മെച്ചപ്പെട്ട ജിഡിപി വളര്ച്ചയും, ആരോഗ്യകരമായ കോര്പ്പറേറ്റ് വരുമാനവും ഇന്ത്യന് വിപണിക്ക് മുന്നോട്ടുള്ള പ്രയാണത്തില് വലിയ പിന്തുണ നല്കും.