Login 
പഠിക്കാം & സമ്പാദിക്കാം 
Home
1 Nov 2026 12:19 PM IST
The Great Indian Exit! വിദേശ നിക്ഷേപകര്‍ വിറ്റൊഴിഞ്ഞത് 34,843 കോടി, അവസാനം ട്വിസ്റ്റ്
MyFin Desk
Summary
ഒക്ടോബര്‍ 26 മുതല്‍ 30 വരെ അവസാന 5 ദിവസം കൊണ്ട് വിദേശികള്‍ 6,300 കോടി രൂപയുടെ നിക്ഷേപവുമായി തിരികെ വന്നു
ഇന്ത്യന്‍ ഓഹരി വിപണിയില്‍ നിന്ന് വിദേശ നിക്ഷേപകര്‍ കൂട്ടത്തോടെ പിന്‍വാങ്ങുന്നു! ഒക്ടോബറില്‍ മാത്രം വിദേശ പോര്‍ട്ട്‌ഫോളിയോ നിക്ഷേപകര്‍ (എഫ്പിഐ) വിറ്റത് 34,843 കോടി രൂപയുടെ ഓഹരികള്‍. സെപ്റ്റംബറില്‍ 35,861 കോടി വിറ്റതിന് പിന്നാലെയാണ് തുടര്‍ച്ചയായ രണ്ടാം മാസവും വന്‍ വില്‍പ്പന. ഇതോടെ 2026-ല്‍ മാത്രം ഇന്ത്യയില്‍ നിന്ന് പിന്‍വലിച്ചത് 2.95 ലക്ഷം കോടി രൂപ! ഉയര്‍ന്ന ക്രൂഡ് ഓയില്‍ വില, ആഗോള പലിശനിരക്ക്, കോര്‍പ്പറേറ്റ് വരുമാനത്തിലെ അനിശ്ചിതത്വമാണ് വിദേശികളെ പേടിപ്പിക്കുന്നത്.
മാസാവസാനം വിപണിയുടെ ചിത്രം പാടെ മാറി. ഒക്ടോബര്‍ 26 മുതല്‍ 30 വരെ അവസാന 5 ദിവസം കൊണ്ട് വിദേശികള്‍ 6,300 കോടി രൂപയുടെ നിക്ഷേപവുമായി തിരികെ വന്നു! ഒക്ടോബര്‍ 23-ന് അവസാനിച്ച ആഴ്ചയില്‍ 2,700 കോടി വാങ്ങിയതിന് പിന്നാലെയാണിത്. അവസാന 4 സെഷനില്‍ 3-ലും അവര്‍ വാങ്ങുന്നവരായി. ഈ തിരിച്ചുവരവാണ് നിഫ്റ്റിയെ വീണ്ടും 23,000ന് മുകളില്‍ എത്തിച്ചത്. പക്ഷെ ഇത് സ്ഥിരമാകുമോ എന്ന് പറയാന്‍ ഇനിയും സമയമായിട്ടില്ലെന്ന് വിദഗ്ധര്‍ പറയുന്നു.
അമേരിക്കന്‍ ഫെഡ് പലിശ നിരക്ക് മാറ്റാതെ നിലനിര്‍ത്തിയതും, ഇന്ത്യന്‍ വന്‍കിട ഓഹരികള്‍ വില കുറഞ്ഞ് ആകര്‍ഷകമായതും, ആഭ്യന്തര വളര്‍ച്ചയുടെ സൂചനകളുമാണ് ഇതിന് കാരണമെന്ന് ജിയോജിത്തിലെ വി.കെ. വിജയകുമാര്‍ പറയുന്നു. രസകരമായ കാര്യം, വന്‍കിട ബാങ്ക് ഓഹരികള്‍ വിറ്റപ്പോഴും ഫാര്‍മ, ഹെല്‍ത്ത്‌കെയര്‍, ഡിജിറ്റല്‍ പ്ലാറ്റ്‌ഫോം ഓഹരികള്‍ അവര്‍ വാങ്ങിക്കൂട്ടി. വിദേശികള്‍ വിറ്റപ്പോഴെല്ലാം വിപണിയെ താങ്ങി നിര്‍ത്തിയത് നമ്മുടെ സ്വന്തം ആഭ്യന്തര നിക്ഷേപകരാണെന്ന് മിറ മണിയിലെ ആനന്ദ് രതി പറഞ്ഞു.
എല്ലാ കണ്ണുകളും ക്രൂഡ് ഓയിലിലേക്കും ലോക രാഷ്ട്രീയത്തിലേക്കുമാണ്. ബ്രെന്റ് ക്രൂഡ് വില, യുഎസ് ഇടക്കാല തിരഞ്ഞെടുപ്പ്, യുഎസ്-ഇറാന്‍, റഷ്യ-ഉക്രെയ്ന്‍ സംഘര്‍ഷങ്ങള്‍, കമ്പനികളുടെ ലാഭക്കണക്ക് - ഇതെല്ലാമാകും ഇനി വിപണിയെ നയിക്കുകയെന്ന് ബജാജ് ബ്രോക്കിംഗിലെ പാബിട്രോ മുഖര്‍ജി പറയുന്നു. മാസാവസാനത്തെ 6,300 കോടിയുടെ വാങ്ങല്‍ ഒരു ആശ്വാസമാണ്.