Login 
പഠിക്കാം & സമ്പാദിക്കാം 
Home
5 April 2026 1:45 PM IST
stock market: രണ്ട് ദിവസം, പിന്വലിച്ചത് 19,837 കോടി; വില്പ്പന വര്ധിപ്പിച്ച് വിദേശ നിക്ഷേപകര്
MyFin Desk
Summary
രൂപയുടെ മൂല്യം റെക്കോര്ഡ് താഴ്ചയിലേക്ക് ഇടിഞ്ഞതും ഡോളര് കരുത്താര്ജ്ജിച്ചതും വിദേശ നിക്ഷേപകരെ ഇന്ത്യന് വിപണിയില് നിന്ന് പിന്മാറാന് പ്രേരിപ്പിച്ചു
പശ്ചിമേഷ്യാ സംഘര്ഷവും ആഗോള സാമ്പത്തിക അനിശ്ചിതത്വവും ഇന്ത്യന് ഓഹരി വിപണിയെ പിടിച്ചുലയ്ക്കുന്നു. ഏപ്രിലിലെ വെറും രണ്ട് വ്യാപാര സെഷനുകള് പിന്നിടുമ്പോള് വിദേശ പോര്ട്ട്ഫോളിയോ നിക്ഷേപകര് (എഫ്പിഐ) 19,837 കോടി രൂപയാണ് (2.1 ബില്യണ് ഡോളര്) വിപണിയില് നിന്ന് പിന്വലിച്ചത്. റെക്കോര്ഡ് തകര്ച്ച നേരിട്ട മാര്ച്ച് മാസത്തിന് പിന്നാലെ ഏപ്രിലിലും നിക്ഷേപകര് കൂട്ടത്തോടെ ഓഹരികള് വിറ്റൊഴിയുന്നത് ദലാല് സ്ട്രീറ്റിനെ കടുത്ത ആശങ്കയിലാഴ്ത്തിയിരിക്കുകയാണ്.
യുദ്ധം കടുക്കുന്നതോടെ ക്രൂഡ് ഓയില് വില വീണ്ടും 100 ഡോളറിന് മുകളിലേക്ക് കുതിച്ചുയര്ന്നതാണ് വില്ലനായത്. ഇതിന് പിന്നാലെ രൂപയുടെ മൂല്യം റെക്കോര്ഡ് താഴ്ചയിലേക്ക് ഇടിഞ്ഞതും ഡോളര് കരുത്താര്ജ്ജിച്ചതും വിദേശ നിക്ഷേപകരെ ഇന്ത്യന് വിപണിയില് നിന്ന് പിന്മാറാന് പ്രേരിപ്പിച്ചു. യുദ്ധം തുടങ്ങിയതിന് ശേഷം രൂപയുടെ മൂല്യത്തില് ഏകദേശം 4 ശതമാനത്തോളം ഇടിവാണ് രേഖപ്പെടുത്തിയിരിക്കുന്നത്. ഇതോടെ നിക്ഷേപകര് കൂടുതല് സുരക്ഷിതമായ അമേരിക്കന് ബോണ്ടുകളിലേക്ക് ചേക്കേറുകയാണെന്ന് മോര്ണിംഗ്സ്റ്റാര് ഇന്വെസ്റ്റ്മെന്റ് റിസര്ച്ച് ഇന്ത്യയിലെ പ്രിന്സിപ്പല് മാനേജര് റിസര്ച്ച് ഹിമാന്ഷു ശ്രീവാസ്തവ പറഞ്ഞു.
മാര്ച്ച് മാസത്തില് മാത്രം 1.17 ട്രില്യണ് രൂപയാണ് വിപണിയില് നിന്ന് ഒഴുകിപ്പോയത്. ഇത് ഇന്ത്യന് ഓഹരി വിപണിയുടെ ചരിത്രത്തിലെ ഏറ്റവും മോശം പ്രതിമാസ പിന്വലിക്കലുകളില് ഒന്നായി മാറി. ഫെബ്രുവരിയില് 17 മാസത്തെ ഏറ്റവും ഉയര്ന്ന നിക്ഷേപം രേഖപ്പെടുത്തിയ സ്ഥാനത്താണ് ഇപ്പോള് ഈ വന് തിരിച്ചടി. 2026-ല് ഇതുവരെ മാത്രം 1.5 ട്രില്യണ് രൂപയുടെ വിദേശ നിക്ഷേപം വിപണിയില് നിന്ന് അപ്രത്യക്ഷമായതായി എന്എസ്ഡിഎല് കണക്കുകള് വ്യക്തമാക്കുന്നു.
യുദ്ധമുന്നണിയില് സമാധാനം പുലരുകയും ക്രൂഡ് ഓയില് വില താഴുകയും ചെയ്താല് മാത്രമേ വിദേശ നിക്ഷേപം വിപണിയിലേക്ക് തിരിച്ചെത്തുകയുള്ളൂ എന്നാണ് ജിയോജിത് ഇന്വെസ്റ്റ്മെന്റിലെ ചീഫ് ഇന്വെസ്റ്റ്മെന്റ് സ്ട്രാറ്റജിസ്റ്റ് വി കെ വിജയകുമാര് പറയുന്നത്.വിദഗ്ധരുടെ വിലയിരുത്തല്. എങ്കിലും, വിദേശ നിക്ഷേപകരുടെ പിന്മാറ്റം മൂലം ഓഹരി വിലകള് കുറഞ്ഞത് ദീര്ഘകാല നിക്ഷേപകര്ക്ക് ചില വിഭാഗങ്ങളില് മികച്ച അവസരമൊരുക്കുന്നുണ്ടെന്നും വിപണി നിരീക്ഷകര് ചൂണ്ടിക്കാട്ടുന്നു. രൂപയുടെ മൂല്യത്തകര്ച്ച തുടര്ന്നാല് വരും ദിവസങ്ങളിലും വിപണിയില് വന് ചാഞ്ചാട്ടം പ്രതീക്ഷിക്കാം.