കൂട്ടവിൽപ്പന തുടർന്ന് വിദേശ നിക്ഷേപകർ; രൂപ കൂടുതൽ കൂപ്പുകുത്തുമോ?

ഓഹരി വിപണിയിൽ നിന്ന് വിദേശ നിക്ഷേപക‍ർ പണം പിൻവലിക്കുന്നത് തുടരുന്നു. വിദേശ നിക്ഷേപകർ വെള്ളിയാഴ്ച 6,030 കോടി രൂപ മൂല്യമുള്ള ഓഹരികൾ വിറ്റഴിച്ചിരുന്നു. എണ്ണവിലയിലെ വർദ്ധനവും ആഗോള അനിശ്ചിതത്വവും ഇന്ത്യ പോലുള്ള വിപണികളിൽ നിന്ന് നിക്ഷേപം പിൻവലിക്കാൻ കാരണമായി. നിഫ്റ്റി ഇതിനകം തന്നെ സാങ്കേതികമായി ബലഹീനമാണ്.

കഴിഞ്ഞ ബുധനാഴ്ച വിദേശ സ്ഥാപന നിക്ഷേപകർ ഇന്ത്യൻ ഓഹരികളിൽ ഏകദേശം 8,752 കോടി രൂപ നിക്ഷേപിച്ചിരുന്നു. ഇത്അസംസ്കൃത എണ്ണവില ബാരലിന് 116 ഡോളറിനു മുകളിലേക്ക് ഉയർന്നത് ഇന്ത്യയെ സംബന്ധിച്ചിടത്തോളം ആശാവഹമല്ല. ഇത് രാജ്യത്ത് പണപ്പെരുപ്പ സമ്മർദ്ദം ഉയരാനും കറന്റ് അക്കൗണ്ട് കമ്മി ഉയരാനും കാരണമാകും. ഇത് വിദേശ നിക്ഷേപം നിർണ്ണയിക്കുന്ന ഘടകങ്ങളാണ്. യുഎസ് ഡോളർ സൂചിക കരുത്താർജിച്ചതിനാൽ ആഗോള നിക്ഷേപകർ വളർന്നുവരുന്ന വിപണികളിൽ നിന്ന് പിൻവലിയുന്നു.

2026 ന്റെ തുടക്കത്തിൽ വളർന്നുവരുന്ന വിപണികൾ കൂടുതൽ നിക്ഷേപം ആകർഷിച്ചിരുന്നെങ്കിൽ ഇപ്പോൾ സ്ഥിതി വ്യത്യസ്തമാണ്. തുടർച്ചയായ പശ്ചിമേൻ സംഘർഷവും ഉയർന്ന എണ്ണവിലയും ഇന്ത്യയുടെ സാമ്പത്തിക സ്ഥിരതയ്ക്ക് അപകടസാധ്യത സൃഷ്ടിക്കുന്നുണ്ട്. ഇത് കോർപ്പറേറ്റ് വരുമാനത്തെയും കറൻസി മൂല്യത്തെയും പ്രതീക്ഷിച്ചതിലും ഗുരുതരമായി ബാധിക്കാൻ സാധ്യതയുണ്ടെന്ന് നിരീക്ഷകർ സൂചിപ്പിക്കുന്നു.

രൂപ വീണ്ടും റെക്കോഡ് മൂല്യത്തകർച്ചയിലേക്ക്

രൂപയുടെ മൂല്യത്തകർച്ചയും ഇറക്കുമതി ചെലവുകൾ വർദ്ധിപ്പിക്കുകയും പണപ്പെരുപ്പം വർദ്ധിപ്പിക്കുകയും ചെയ്യും. മാർച്ച് ഒൻപത് തിങ്കളാഴ്ച വ്യാപാരത്തിനിടയിൽ 92 .52 നിലവാരത്തിലേക്ക് രൂപയുടെ മൂല്യം ഇടിഞ്ഞിരുന്നു. മുൻവർഷങ്ങളിലെ സ്ഥിതി പരിശോധിച്ചാൽ 2024 ഒക്ടോബറിലും 2025 ജനുവരിയിലുമുണ്ടായ ശക്തമായ വിദേശ നിക്ഷേപകരുടെ പിൻമാറ്റം ഓഹരി വിപണിയിലെ ഇടിവിനും കറൻസി തകർച്ചക്കും കാരണമായിരുന്നു.

പശ്ചിമേഷ്യൻ സംഘർഷം തുടർന്നാൽ ഓഹരി വിപണി കൂടുതൽ ഇടിഞ്ഞേക്കാം. 2025 ഫെബ്രുവരിക്ക് ശേഷമുള്ള ഏറ്റവും വലിയ പ്രതിദിന പിൻവലിക്കലാണ് ഇപ്പോഴുള്ളത്. വിദേശ നിക്ഷേപകർ ഗണ്യമായി പിൻവാങ്ങിയിട്ടും, ആഭ്യന്തര സ്ഥാപന നിക്ഷേപകർ സജീവമായതാണ് നേരത്തെ വിൽപ്പന സമ്മർദ്ദം ലഘൂകരിച്ചത്. എന്നാൽ ഈ ആഴ്ച വിപണി കൂടുതൽ ഇടിയുകയാണ്. രൂപയുടെ കനത്ത മൂല്യം ഇടിവും തുടരുന്നു. വിദേശ നിക്ഷേപകരുടെ വിൽപ്പന വരും ദിവസങ്ങളിൽ വിപണിക്ക് നിർണായകമാകും.