വിപണിയില്‍ കനത്ത വില്‍പ്പന സമ്മര്‍ദ്ദം; സെന്‍സെക്സും നിഫ്റ്റിയും നഷ്ടത്തില്‍

ചൊവ്വാഴ്ചത്തെ വ്യാപാരത്തിനൊടുവില്‍ ഇന്ത്യന്‍ ഓഹരി വിപണികള്‍ നഷ്ടത്തില്‍ വ്യാപാരം അവസാനിപ്പിച്ചു. ബിഎസ്ഇ സെന്‍സെക്‌സ് 238 പോയിന്റ് ഇടിഞ്ഞ് 77,470 ലും, എന്‍എസ്ഇ നിഫ്റ്റി 50 സൂചിക 51 പോയിന്റ് നഷ്ടത്തില്‍ 24,187.70 എന്ന നിലവാരത്തിലുമാണ് ക്ലോസ് ചെയ്തത്. അതിനിര്‍ണ്ണായകമായ 24,200 മാര്‍ക്കിന് താഴെയാണ് നിഫ്റ്റി വീണ്ടും നിലയുറപ്പിച്ചത്. ആഗോള സാമ്പത്തിക രംഗത്തെ അനിശ്ചിതത്വങ്ങള്‍, ഉയര്‍ന്ന ബ്രെന്റ് ക്രൂഡ് ഓയില്‍ വില, തുടരുന്ന ഒന്നാം പാദ സാമ്പത്തിക ഫലങ്ങള്‍ എന്നിവ നിക്ഷേപകരെ ജാഗ്രതയുള്ളവരാക്കി മാറ്റി.

പ്രധാന സൂചികകളില്‍ മന്ദഗതിയായിരുന്നെങ്കിലും പൊതുവിപണിയില്‍ പോസിറ്റീവ് താല്പര്യം പ്രകടമായിരുന്നു. ദേശീയ സ്റ്റോക്ക് എക്‌സ്‌ചേഞ്ചില്‍ 2,087 ഓഹരികള്‍ നേട്ടമുണ്ടാക്കിയപ്പോള്‍ 1,942 ഓഹരികള്‍ ഇടിവും 180 ഓഹരികള്‍ മാറ്റമില്ലാതെയും തുടരുകയും ചെയ്തു.

മേഖല തിരിച്ചുള്ള പ്രകടനവും വിപണി സാധ്യതയും

മിഡ്ക്യാപ് & സ്‌മോള്‍ക്യാപ്: ബെഞ്ച്മാര്‍ക്ക് സൂചികകളേക്കാള്‍ മികച്ച പ്രകടനമാണ് പൊതുവിപണി കാഴ്ചവെച്ചത്. നിഫ്റ്റി മിഡ്ക്യാപ് സൂചിക 0.3% നേട്ടവും, സ്‌മോള്‍ക്യാപ് സൂചിക 0.5% ഉയര്‍ച്ചയും രേഖപ്പെടുത്തി.കമ്പനികള്‍ കേന്ദ്രീകരിച്ചുള്ള കൃത്യമായ വാങ്ങലുകളും പ്രധാനപ്പെട്ട ചില കമ്പനികളുടെ തൃപ്തികരമായ പാദഫലങ്ങളുമാണ് പ്രധാന സൂചികകളുടെ തകര്‍ച്ചയിലും ചെറുകിട-ഇടത്തരം ഓഹരികളെ താങ്ങിനിര്‍ത്തിയത്.

പ്രധാനപ്പെട്ട വന്‍കിട ബാങ്കിംഗ്, ഐടി ഓഹരികളിലെ തളര്‍ച്ച സെന്‍സെക്‌സിനെയും നിഫ്റ്റിയെയും സമ്മര്‍ദ്ദത്തിലാക്കുന്നുണ്ടെങ്കിലും, മിഡ്ക്യാപ്-സ്‌മോള്‍ക്യാപ് മേഖലകളിലെ പോസിറ്റീവ് ചലനങ്ങള്‍ വിപണിയില്‍ ഇപ്പോഴും നിക്ഷേപകരുടെ താല്പര്യം നിലനില്‍ക്കുന്നുണ്ടെന്ന് വ്യക്തമാക്കുന്നു.

ബുള്ളിഷ് സൂചനകളുമായി നിഫ്റ്റി

ഡെയ്ലി ചാര്‍ട്ട് പ്രകാരം, നിഫ്റ്റി 50 സൂചിക നിലവില്‍ 24,188 നിലവാരത്തില്‍ കണ്‍സോളിഡേഷന്‍ ഘട്ടം തുടരുകയാണ്. സൂചിക ബോളിംഗര്‍ ബാന്റിന്റെ മിഡില്‍ ലൈനായ 24,111ന് മുകളില്‍ വ്യാപാരം നടത്തുന്നത് ഹ്രസ്വകാലാടിസ്ഥാനത്തില്‍ പോസിറ്റീവ് മോമെന്റം നിലനില്‍ക്കുന്നു എന്നതിന്റെ സാങ്കേതിക സൂചനയാണ്. എന്നാല്‍ മുകളിലോട്ട് പോകുമ്പോള്‍ 24,373-24,451 എന്ന കടുത്ത റെസിസ്റ്റന്‍സ് മേഖലയ്ക്ക് താഴെ സൂചിക നില്‍ക്കുന്നത് ശക്തമായ ഒരു ബ്രേക്കൗട്ടിന് നിലവില്‍ തടസ്സമായി നില്‍ക്കുന്നു. നിഫ്റ്റി 24,10024,000 സപ്പോര്‍ട്ട് മേഖലയ്ക്ക് മുകളില്‍ നിലനില്‍ക്കുന്നിടത്തോളം കാലം സാങ്കേതിക ഘടന പോസിറ്റീവ് ബയസോടെ ഒരു റേഞ്ച്-ബൗണ്ട് അവസ്ഥയില്‍ തുടരും.

നിഫ്റ്റി ഐടിയും പിഎസ് യു ബാങ്കുകളും തളര്‍ച്ചയില്‍

ചൊവ്വാഴ്ചത്തെ വ്യാപാരത്തില്‍ പ്രമുഖ വിപണി മേഖലകള്‍ സമ്മിശ്രമായ പ്രകടനമാണ് കാഴ്ചവെച്ചത്. ബെഞ്ച്മാര്‍ക്ക് സൂചികകളെ താഴേക്ക് വലിച്ചുകൊണ്ട് നിഫ്റ്റി ഐടി , പിഎസ് യു ബാങ്ക് സൂചികകള്‍ ഏകദേശം 1 ശതമാനം വീതം ഇടിഞ്ഞു. അതേസമയം, നിഫ്റ്റി റിയല്‍റ്റി , ഓട്ടോ സൂചികകള്‍ 1 ശതമാനത്തിലധികം മുന്നേറി വിപണിയിലെ പ്രധാന നേട്ടക്കാരായി മാറി. റിപ്പബ്ലിക് ഇന്‍ഡസ്ട്രീസ് , ഇന്‍ഫോസിസ് എന്നീ ഹെവിവെയ്റ്റ് ഓഹരികളില്‍ 2 ശതമാനം വരെ നേരിട്ട ഇടിവാണ് പ്രധാന സൂചികകളില്‍ കൂടുതല്‍ സമ്മര്‍ദ്ദം സൃഷ്ടിച്ചത്.

പാദഫലങ്ങള്‍ മിന്നിച്ച് കോര്‍പ്പറേറ്റ് നിര

ത്രൈമാസ സാമ്പത്തിക ഫലങ്ങള്‍ക്ക് പിന്നാലെ വിപണിയില്‍ വലിയ ചലനമുണ്ടാക്കിയ ഓഹരികള്‍: അദാനി എനര്‍ജി സൊല്യൂഷന്‍സ് : മികച്ച ഒന്നാം പാദ പ്രവര്‍ത്തന ഫലങ്ങള്‍ക്ക് പിന്നാലെ ഓഹരി വില 3% വരെ ഉയര്‍ന്നു. കമ്പനിയുടെ ഏകീകൃത അറ്റാദായം മുന്‍വര്‍ഷത്തെ അപേക്ഷിച്ച് 124% വര്‍ധിച്ച് 1,149 കോടിയായി. പ്രവര്‍ത്തന വരുമാനം 42.4% ഉയര്‍ന്ന് 9,711 കോടിയിലെത്തിയപ്പോള്‍ എബിറ്റാ 30% വര്‍ധിച്ച് 3,008 കോടിയായി രേഖപ്പെടുത്തി.

ടിവിഎസ് മോട്ടാര്‍ കമ്പനി : ശക്തമായ പാദഫലങ്ങളുടെ പിന്‍ബലത്തില്‍ ഓഹരി വില ഏകദേശം 5% വര്‍ദ്ധിച്ച് മികച്ച മുന്നേറ്റം നടത്തി. കമ്പനിയുടെ അറ്റാദായം 67% ഉയര്‍ന്ന് 1,019 കോടിയിലെത്തി. വരുമാനം 33.5% വര്‍ധിച്ച് 16,295 കോടിയും എബിറ്റാ എക്കാലത്തെയും ഉയര്‍ന്ന നിരക്കായ 1,779 കോടിയും രേഖപ്പെടുത്തി. ഇരുചക്ര-മുചക്ര വാഹന വില്‍പനയില്‍ ഉണ്ടായ 28% വളര്‍ച്ചയാണ് ഈ നേട്ടത്തിന് അടിത്തറയായത്.

പ്രധാന സൂചികകള്‍ ദുര്‍ബലമായെങ്കിലും മിഡ്ക്യാപ്, സ്‌മോള്‍ക്യാപ് ഓഹരികള്‍ കാണിച്ച പ്രതിരോധവും സാമ്പത്തിക ഫലങ്ങളുടെ അടിസ്ഥാനത്തിലുള്ള പോസിറ്റീവ് നീക്കങ്ങളും വിപണിക്ക് താങ്ങായി നിലകൊള്ളുന്നു. വരും ദിവസങ്ങളില്‍ കമ്പനികളുടെ ഒന്നാം പാദ സാമ്പത്തിക ഫലങ്ങള്‍, ക്രൂഡ് ഓയില്‍ വിലയിലെ മാറ്റങ്ങള്‍, പശ്ചിമേഷ്യന്‍ ഭൗമരാഷ്ട്രീയ സംഭവവികാസങ്ങള്‍, എഫ്‌ഐഐ ഫണ്ടുകളുടെ വരവ് എന്നിവയായിരിക്കും വിപണിയുടെ അന്തിമ ദിശ നിശ്ചയിക്കുക .