കുതിപ്പിനൊരുങ്ങി വിപണി? India-US കരാര്‍ മുതല്‍ Q3 വരെ; നിഫ്റ്റിയെ സ്വാധീനിക്കുന്ന 5 ഘടകങ്ങള്‍

പുതിയ വാരം വിപണിയുടെ ഗതി നിശ്ചയിക്കാന്‍ പോകുന്ന അഞ്ച് പ്രധാന ഘടകങ്ങള്‍ ഏതൊക്കെയെന്ന് നോക്കാം.

1. ഇന്ത്യ-യുഎസ് വ്യാപാര കരാര്‍

വിപണിയില്‍ വരാനിരിക്കുന്ന ഏറ്റവും വലിയ പോസിറ്റീവ് ഘടകം ഇന്ത്യയും അമേരിക്കയും തമ്മിലുള്ള ഇടക്കാല വ്യാപാര കരാറാണ്. ഇന്ത്യന്‍ കയറ്റുമതി സാധനങ്ങള്‍ക്കുള്ള താരിഫ് 18 ശതമാനമായി അമേരിക്ക കുറച്ചത് ഐടി, ഫാര്‍മ, ഓട്ടോമൊബൈല്‍ മേഖലകള്‍ക്ക് വന്‍ കുതിപ്പുണ്ടാക്കും. വിദേശ നിക്ഷേപകര്‍ ഇന്ത്യന്‍ വിപണിയിലേക്ക് കൂടുതല്‍ സജീവമായി തിരികെയെത്താന്‍ ഇത് കാരണമാകും.

2. പുതിയ പണപ്പെരുപ്പ കണക്കുകള്‍

ഫെബ്രുവരി 12-ന് പുറത്തുവരുന്ന റീട്ടെയില്‍ ഇന്‍ഫ്‌ലേഷന്‍ ഡാറ്റ വിപണി ഉറ്റുനോക്കുകയാണ്. ഇത്തവണത്തെ പ്രത്യേകത, 2024 അടിസ്ഥാന വര്‍ഷമായി കണക്കാക്കിയുള്ള പുതിയ രീതിയിലുള്ള ഡേറ്റയാണ് പുറത്തുവിടുന്നത്. ഇത് രാജ്യത്തെ ഉപഭോഗ രീതികളെ കൂടുതല്‍ കൃത്യമായി പ്രതിഫലിപ്പിക്കുമെന്നതിനാല്‍ റിസര്‍വ് ബാങ്കിന്റെ പലിശ നിരക്ക് തീരുമാനങ്ങളില്‍ ഇത് നിര്‍ണ്ണായകമാകും.

3. മൂന്നാം പാദ ഫലങ്ങള്‍

കോര്‍പ്പറേറ്റ് വരുമാന സീസണിന്റെ അഞ്ചാം വാരമാണിത്. ടൈറ്റന്‍, മഹീന്ദ്ര & മഹീന്ദ്ര, ഹിന്ദുസ്ഥാന്‍ യൂണിലിവര്‍, അപ്പോളോ ഹോസ്പിറ്റല്‍സ്, ബിഎസ്ഇ തുടങ്ങിയ വമ്പന്‍ കമ്പനികള്‍ ഈ വാരം തങ്ങളുടെ ലാഭവിവരങ്ങള്‍ പുറത്തുവിടും. പ്രമുഖ കമ്പനികളുടെ പ്രകടനം ആ സെക്ടറുകളുടെ ഗതി നിശ്ചയിക്കും.

4. സ്വര്‍ണ്ണവും വെള്ളിയും

ആഗോള വിപണിയില്‍ സ്വര്‍ണ്ണവിലയില്‍ ചെറിയ മുന്നേറ്റം ദൃശ്യമാണ്. അമേരിക്ക-ഇറാന്‍ ചര്‍ച്ചകള്‍ ഒമാനില്‍ പുരോഗമിക്കുന്നതും ഡോളറിന്റെ നേരിയ തളര്‍ച്ചയും സ്വര്‍ണ്ണവിലയെ സ്വാധീനിക്കുന്നുണ്ട്. സ്‌പോട്ട് ഗോള്‍ഡ് വില ഔണ്‍സിന് 4,954 ഡോളറിലേക്ക് തിരികെയെത്തിയത് കമ്മോഡിറ്റി വിപണിയില്‍ ചലനമുണ്ടാക്കും.

5. വിദേശ നിക്ഷേപകരുടെ വരവ്

ഏറ്റവും പ്രധാനപ്പെട്ട മറ്റൊരു മാറ്റം വിദേശ നിക്ഷേപകര്‍ വീണ്ടും ബൈയര്‍മാരായി മാറിയിരിക്കുന്നു എന്നതാണ്. ഫെബ്രുവരി ആദ്യവാരത്തില്‍ മാത്രം ആയിരക്കണക്കിന് കോടി രൂപയുടെ നിക്ഷേപം വിദേശ ഫണ്ടുകളില്‍ നിന്ന് വിപണിയിലെത്തി. രൂപയുടെ മൂല്യം ഡോളറിനെതിരെ 90 നിലവാരത്തിലേക്ക് മെച്ചപ്പെടുന്നത് ഇനിയും കൂടുതല്‍ നിക്ഷേപം വരാന്‍ വഴിയൊരുക്കും.

ടെക്‌നിക്കല്‍ സൂചന

പ്രമുഖ ബ്രോക്കിംഗ് സ്ഥാപനമായ റിലീഗയര്‍ ബ്രോക്കിംഗിലെ സീനിയര്‍ വൈസ് പ്രസിഡന്റ് അജിത് മിശ്രയുടെ നിരീക്ഷണത്തില്‍ നിഫ്റ്റി നിലവില്‍ ഒരു പോസിറ്റീവ് ട്രെന്‍ഡിലാണ്. ഇതിലെ പ്രധാന ഘടകങ്ങള്‍ ഇവയാണ്:നിഫ്റ്റി 25,400 എന്ന നിലവാരത്തിന് മുകളില്‍ നില്‍ക്കുന്നിടത്തോളം വിപണിയില്‍ വലിയ ഇടിവ് ഭയപ്പെടേണ്ടതില്ല. ഇതൊരു ശക്തമായ താങ്ങായി പ്രവര്‍ത്തിക്കും.ഒരുപക്ഷേ 25,400-ന് താഴേക്ക് സൂചിക പോവുകയാണെങ്കില്‍, നിഫ്റ്റി 25,100 എന്ന നിലവാരത്തിലേക്ക് എത്തിയേക്കാം.നിഫ്റ്റി 26,000 എന്ന കടമ്പ വിജയകരമായി മറികടന്നാല്‍, വിപണിയില്‍ പുതിയൊരു കുതിപ്പ് ഉണ്ടാകുകയും അത് 26,400 എന്ന റെക്കോര്‍ഡ് ഉയരത്തിലേക്ക് സൂചികയെ നയിക്കുകയും ചെയ്യും.ബാങ്കിംഗ് ഓഹരികള്‍ മികച്ച മുന്നേറ്റം കാഴ്ചവെക്കുന്നതായി അദ്ദേഹം നിരീക്ഷിക്കുന്നു.ബാങ്ക് നിഫ്റ്റി 60,500 എന്ന ലെവലിന് മുകളില്‍ തുടര്‍ച്ചയായി വ്യാപാരം നടത്തുകയാണെങ്കില്‍, അത് വളരെ വേഗത്തില്‍ 61,500 എന്ന പുതിയ ഉയരങ്ങളിലേക്ക് എത്തും.താഴോട്ട് പോവുകയാണെങ്കില്‍ 59,000 മുതല്‍ 59,500 വരെയുള്ള മേഖല ബാങ്ക് നിഫ്റ്റിക്ക് ശക്തമായ പിന്തുണ നല്‍കും. സെന്‍സെക്‌സ് നിലവില്‍ 83,00083,300 നിലവാരത്തില്‍ ശക്തമായ പിന്തുണ കണ്ടെത്തുന്നുവെന്ന് എന്റിച്ച് മണി സിഇഒ പൊന്മുടി ആര്‍ വ്യക്തമാക്കുന്നു.മുകളിലേക്ക് കയറാന്‍ 84,000-84,500 എന്ന പ്രതിരോധം മറികടക്കേണ്ടതുണ്ട്.