ചര്‍ച്ചയില്ലെന്ന് ഇറാന്‍: തീപിടിച്ച് എണ്ണ വില, ഇന്ത്യയ്ക്ക് ആശങ്ക!

അന്താരാഷ്ട്ര വിപണിയില്‍ എണ്ണവിലക്ക് വീണ്ടും തീപിടിക്കുന്നു. സമാധാന ചര്‍ച്ചകളെക്കുറിച്ചുള്ള യുഎസ് അവകാശവാദങ്ങള്‍ ഇറാന്‍ തള്ളിയതോടെ, വെറും മണിക്കൂറുകള്‍ക്കുള്ളില്‍ ബ്രെന്റ് ക്രൂഡ് വില 4 ശതമാനത്തിലധികം വര്‍ധിച്ച് ബാരലിന് 103.98 ഡോളറിലെത്തി. ലോകം ഉറ്റുനോക്കുന്ന ഹോര്‍മുസ് കടലിടുക്കിലെ സുരക്ഷ വീണ്ടും ആശങ്കയിലായതോടെ ഇന്ത്യന്‍ സമ്പദ്‍വ്യവസ്ഥക്കും ഇത് വലിയ വെല്ലുവിളിയാവുകയാണ്.

എന്താണ് സംഭവിച്ചത്?

ഇറാനുമായുള്ള സംഘര്‍ഷം അവസാനിപ്പിക്കാന്‍ ക്രിയാത്മകമായ ചര്‍ച്ചകള്‍ നടക്കുന്നുണ്ടെന്നും, അഞ്ച് ദിവസത്തേക്ക് ഇറാനിയന്‍ ഊര്‍ജ്ജ നിലയങ്ങള്‍ക്ക് നേരെയുള്ള ആക്രമണം നിര്‍ത്തിവെക്കുകയാണെന്നും യുഎസ് പ്രസിഡന്റ് ഡൊണാള്‍ഡ് ട്രംപ് പ്രഖ്യാപിച്ചിരുന്നു. ഇതിനെത്തുടര്‍ന്ന് എണ്ണവിലയില്‍ 7 ശതമാനത്തോളം ഇടിവ് രേഖപ്പെടുത്തിയതുമാണ്.

എന്നാല്‍, ട്രംപിന്റെ ഈ പ്രസ്താവന പൂര്‍ണ്ണമായും തള്ളിക്കളഞ്ഞ ഇറാന്‍, അമേരിക്കയുമായി യാതൊരുവിധ ചര്‍ച്ചകളും നടന്നിട്ടില്ലെന്ന് വ്യക്തമാക്കി. എന്ന് മാത്രമല്ല, യുഎസ് ലക്ഷ്യങ്ങള്‍ക്ക് നേരെ ഇറാന്‍ റവല്യൂഷണറി ഗാര്‍ഡ് പുതിയ ആക്രമണങ്ങള്‍ അഴിച്ചുവിട്ടത് സ്ഥിതിഗതികള്‍ വീണ്ടും വഷളാക്കി.

എണ്ണ വില കുതിക്കുന്നു

ഈ അനിശ്ചിതത്വം വിപണിയില്‍ പെട്ടെന്നുള്ള ചലനമുണ്ടാക്കി. ചൊവ്വാഴ്ച രാവിലെ ബ്രെന്റ് ക്രൂഡ് 4.04% ഉയര്‍ന്ന് 103.98 ഡോളറിലും, വെസ്റ്റ് ടെക്‌സസ് ഇന്റര്‍മീഡിയറ്റ് 3.87% വര്‍ധിച്ച് 91.42 ഡോളറിലുമാണ് വ്യാപാരം നടക്കുന്നത്. ആഗോള എണ്ണ-വാതക വ്യാപാരത്തിന്റെ 20 ശതമാനവും കടന്നുപോകുന്ന ഹോര്‍മുസ് കടലിടുക്ക് ഇറാന്‍ തടസ്സപ്പെടുത്തിയാല്‍ വില ഇനിയും കുതിച്ചുയരാന്‍ സാധ്യതയുണ്ട്.ഇന്ത്യയെ സംബന്ധിച്ചിടത്തോളം ഈ സാഹചര്യം ഏറെ നിര്‍ണ്ണായകമാണ്. നമ്മുടെ അസംസ്‌കൃത എണ്ണ ആവശ്യകതയുടെ 90 ശതമാനവും ഇറക്കുമതിയെ ആശ്രയിച്ചാണ് ഇരിക്കുന്നത്. എണ്ണവിലയില്‍ ഉണ്ടാകുന്ന ഓരോ ഒരു ഡോളറിന്റെ വര്‍ധനവും ഇന്ത്യയുടെ വാര്‍ഷിക ഇറക്കുമതി ബില്ലില്‍ ഏകദേശം 16,000 കോടി രൂപയുടെ അധിക ബാധ്യതയാണ് ഉണ്ടാക്കുന്നത്. ഇത് രാജ്യത്തെ പണപ്പെരുപ്പത്തെയും ധനക്കമ്മിയെയും നേരിട്ട് ബാധിക്കും.

ഷിപ്പിംഗ് റൂട്ടുകള്‍ നിരീക്ഷിച്ച് ഇന്ത്യ

പ്രശ്‌നബാധിത മേഖലയിലെ ഷിപ്പിംഗ് റൂട്ടുകള്‍ കേന്ദ്രസര്‍ക്കാര്‍ സൂക്ഷ്മമായി നിരീക്ഷിച്ചുവരികയാണെന്ന് പ്രധാനമന്ത്രി നരേന്ദ്ര മോദി ലോക്‌സഭയില്‍ വ്യക്തമാക്കി. എണ്ണ, വാതകം, വളം തുടങ്ങിയ അവശ്യവസ്തുക്കള്‍ സുരക്ഷിതമായി ഇന്ത്യയിലെത്തിക്കാന്‍ ആഗോള പങ്കാളികളുമായി രാജ്യം നിരന്തരം ചര്‍ച്ചകള്‍ നടത്തുന്നുണ്ട്. ഹോര്‍മുസ് കടലിടുക്കില്‍ കുടുങ്ങിക്കിടന്ന ചില ഇന്ത്യന്‍ കപ്പലുകള്‍ സുരക്ഷിതമായി തിരിച്ചെത്തിക്കാന്‍ സാധിച്ചത് വലിയ ആശ്വാസമാണ്.ചുരുക്കത്തില്‍, പശ്ചിമേഷ്യയിലെ ഓരോ ചലനവും നമ്മുടെ പോക്കറ്റിനെ ബാധിക്കുന്ന അവസ്ഥയാണിന്നുള്ളത്. അന്താരാഷ്ട്ര വിപണിയിലെ ഈ അസ്ഥിരത വരും ദിവസങ്ങളില്‍ ഇന്ത്യന്‍ ഓഹരി വിപണിയിലും ഇന്ധന വിലയിലും പ്രതിഫലിച്ചേക്കാം.