പെട്രോളിന് തീ പിടിക്കും! FII വിപണി തകർക്കുമോ? ഇറാൻ യുദ്ധം: തിങ്കളാഴ്ച നിക്ഷേപകർ ജാഗ്രതൈ!

പശ്ചിമേഷ്യ കത്തുകയാണ്! ഇറാന്‍ സുപ്രീം ലീഡറുടെ വധവും അതിനെത്തുടര്‍ന്നുള്ള മിസൈല്‍ ആക്രമണങ്ങളും ആഗോള വിപണിയെ പിടിച്ചുലയ്ക്കുമ്പോള്‍, ഇന്ത്യന്‍ നിക്ഷേപകര്‍ക്ക് വരാനിരിക്കുന്നത് നിര്‍ണ്ണായകമായ ആഴ്ചയാണ്. ക്രൂഡ് ഓയില്‍ വില 100 ഡോളറിലേക്ക് കുതിക്കുകയാണോ? നമുക്ക് പരിശോധിക്കാം.ഇസ്രായേല്‍-യുഎസ് സഖ്യം ഇറാന് മേല്‍ നടത്തിയ ആക്രമണവും ഇറാന്റെ ശക്തമായ പ്രത്യാക്രമണവും ലോകത്തെ ഒരു വലിയ യുദ്ധഭീതിയിലേക്ക് തള്ളിയിട്ടിരിക്കുകയാണ്. ശനിയാഴ്ച നടന്ന ഈ നീക്കങ്ങള്‍ക്ക് ശേഷം തിങ്കളാഴ്ച വിപണി തുറക്കുമ്പോള്‍ വലിയ ചലനങ്ങളാണ് സാമ്പത്തിക വിദഗ്ധര്‍ പ്രവചിക്കുന്നത്.ഈ യുദ്ധത്തിന്റെ ഏറ്റവും വലിയ പ്രത്യാഘാതം ക്രൂഡ് ഓയില്‍ വിലയിലാണ്. നിലവില്‍ ബ്രെന്റ് ക്രൂഡ് വില 3 ശതമാനം വര്‍ധിച്ച് 73 ഡോളറിന് മുകളിലെത്തിക്കഴിഞ്ഞു. എന്നാല്‍ യഥാര്‍ത്ഥ ഭീഷണി മറ്റൊന്നാണ്. ലോകത്തെ എണ്ണക്കടത്തിന്റെ 20 ശതമാനവും നിയന്ത്രിക്കുന്ന 'ഹോര്‍മുസ് കടലിടുക്ക്' അടച്ചുപൂട്ടിയെന്ന റിപ്പോര്‍ട്ടുകള്‍ പുറത്തുവരുന്നു. ഇത് തുടര്‍ന്നാല്‍ എണ്ണവില ബാരലിന് 100 ഡോളറോ അതിന് മുകളിലോ എത്തിയേക്കാം. ഇത് ലോകമെമ്പാടും പണപ്പെരുപ്പം വീണ്ടും വര്‍ദ്ധിക്കാന്‍ കാരണമാകും. ഇത് ഇന്ത്യയ്ക്ക് വലിയൊരു സാമ്പത്തിക വെല്ലുവിളിയാണ്. നമ്മുടെ എണ്ണ ആവശ്യത്തിന്റെ 85 മുതല്‍ 90 ശതമാനവും ഇറക്കുമതിയെയാണ് ആശ്രയിക്കുന്നത്.ക്രൂഡ് ഓയില്‍ വിലയില്‍ ഉണ്ടാകുന്ന ഓരോ 10 ഡോളറിന്റെ വര്‍ദ്ധനവും ഇന്ത്യയുടെ ഇറക്കുമതി ചിലവില്‍ വര്‍ഷം തോറും 10,000 മുതല്‍ 15,000 കോടി രൂപയുടെ അധികബാധ്യതയുണ്ടാക്കും. ഇതിന്റെ ഫലമായി രൂപയുടെ മൂല്യം ഇടിയുകയും, കറന്റ് അക്കൗണ്ട് ഡെഫിസിറ്റ് വര്‍ദ്ധിക്കുകയും ചെയ്യും. സാധാരണക്കാരനെ സംബന്ധിച്ച് പെട്രോള്‍, ഡീസല്‍ വില വര്‍ദ്ധനവിനും ഇത് കാരണമായേക്കാം.

വിദഗ്ധര്‍ പറയുന്നതെന്ത്?

എണ്ണവിലയിലെ ഈ കുതിപ്പ് ഇന്ത്യയെ സംബന്ധിച്ച് ഒട്ടും ശുഭകരമല്ല. തിങ്കളാഴ്ച വിപണി തുറക്കുമ്പോള്‍ വിദേശ നിക്ഷേപകര്‍ (വലിയ തോതില്‍ ഓഹരികള്‍ വിറ്റഴിക്കാന്‍ സാധ്യതയുണ്ട്. ഹോര്‍മുസ് കടലിടുക്ക് എത്രകാലം അടഞ്ഞു കിടക്കുന്നു എന്നതിനെ ആശ്രയിച്ചിരിക്കും വിപണിയുടെ ഭാവി. നിക്ഷേപകര്‍ ഇപ്പോള്‍ സ്വര്‍ണ്ണം, യുഎസ് ഡോളര്‍ തുടങ്ങിയ സുരക്ഷിത നിക്ഷേപങ്ങളിലേക്ക മാറാന്‍ സാധ്യതയുണ്ടെന്നാണ് വി.കെ. വിജയകുമാര്‍ (Chief Investment Strategist, Geojit Financial Services) പറയുന്നത്.പെയിന്റ്, ടയര്‍, ഏവിയേഷന്‍, ബാങ്കിംഗ് തുടങ്ങിയ എണ്ണവിലയുമായി നേരിട്ട് ബന്ധമുള്ള സെക്ടറുകള്‍ സമ്മര്‍ദ്ദത്തിലാകും.എണ്ണ ഉല്‍പ്പാദന കമ്പനികള്‍, പ്രതിരോധ മേഖലയിലെ കമ്പനികള്‍ എന്നിവര്‍ക്ക് നിക്ഷേപകരുടെ ശ്രദ്ധ ലഭിച്ചേക്കാമെന്നും അദ്ദേഹം പറയുന്നു.

നിയന്ത്രിതമായ വര്‍ദ്ധനവ്

അമിത് ഗോയലിന്റെ (Chief Global Strategist, PACE 360) അഭിപ്രായത്തില്‍ എണ്ണവിലയില്‍ വലിയൊരു കുതിച്ചുചാട്ടം ഉണ്ടാകാന്‍ സാധ്യത കുറവാണ്. ഇതിനുള്ള കാരണങ്ങള്‍ ഇവയാണ്:

ലക്ഷ്യം എണ്ണപ്പാടങ്ങളല്ല: അമേരിക്കയുടെയും ഇസ്രായേലിന്റെയും ആക്രമണം ഇറാന്റെ സൈനിക താവളങ്ങളെ തകര്‍ക്കാന്‍ മാത്രമുള്ളതാണ്. ഇറാന്റെ എണ്ണപ്പാടങ്ങളെ അവര്‍ ആക്രമിക്കില്ല. കാരണം അത് ആഗോളതലത്തില്‍ എണ്ണലഭ്യത കുറയ്ക്കുകയും പണപ്പെരുപ്പം അതിരൂക്ഷമാക്കുകയും ചെയ്യും.

അമേരിക്കന്‍ തിരഞ്ഞെടുപ്പ്: ഒമ്പത് മാസത്തിനുള്ളില്‍ അമേരിക്കയില്‍ കോണ്‍ഗ്രസ് തിരഞ്ഞെടുപ്പ് നടക്കാനിരിക്കുകയാണ്. എണ്ണവില കുതിച്ചുയരുന്നത് ട്രംപിന്റെ പാര്‍ട്ടിയുടെ വിജയസാധ്യതയെ ബാധിക്കും. അതിനാല്‍ വില നിയന്ത്രിക്കാന്‍ ട്രംപ് സൗദി അറേബ്യയോടും മറ്റും ഉല്‍പ്പാദനം കൂട്ടാന്‍ ആവശ്യപ്പെടും.

പ്രവചനം: ബ്രെന്റ് ക്രൂഡ് ബാരലിന് 80 ഡോളറില്‍ താഴെയും, ഡബ്ല്യുടിഐ 75 ഡോളറില്‍ താഴെയും നില്‍ക്കാനാണ് സാധ്യത.

മിതമായ വര്‍ദ്ധനവ്

ബാര്‍ക്ലേയ്‌സ് ബാങ്കിന്റെ റിപ്പോര്‍ട്ട് പ്രകാരം, വിതരണത്തില്‍ വലിയ തടസ്സങ്ങള്‍ ഉണ്ടായാല്‍ ബ്രെന്റ് ക്രൂഡ് വില 80 ഡോളര്‍ വരെ ഉയര്‍ന്നേക്കാം. നിലവിലെ സാഹചര്യത്തില്‍ രാഷ്ട്രീയ അസ്ഥിരത മൂലമുള്ള ഒരു റിസ്‌ക് പ്രീമിയം വിപണി ഇതിനോടകം തന്നെ കണക്കിലെടുത്തു കഴിഞ്ഞു. ഈ പഠനം മുന്നറിയിപ്പ് നല്‍കുന്നത് മറ്റൊരു കാര്യമാണ്. എണ്ണ വിതരണത്തില്‍ ചെറിയൊരു തടസ്സം പോലുമുണ്ടായാല്‍ ഭൗമരാഷ്ട്രീയ സാഹചര്യം കണക്കിലെടുത്ത് ബാരലിന് 20 മുതല്‍ 40 ഡോളര്‍ വരെ അധികമായി വര്‍ദ്ധിക്കാം. അങ്ങനെയെങ്കില്‍ എണ്ണവില 95 ഡോളര്‍ മുതല്‍ 110 ഡോളര്‍ വരെയാകാന്‍ സാധ്യതയുണ്ട്.