വിപണി നഷ്ടത്തില്‍ അവസാനിച്ചു; ഡിഫന്‍സ്, എഫ്.എം.സി.ജി ഓഹരികള്‍ തിളങ്ങി

യൂണിയന്‍ ബജറ്റിന് മുന്നോടിയായി നിക്ഷേപകര്‍ ജാഗ്രത പാലിച്ചതോടെ, മൂന്ന് ദിവസത്തെ കുതിപ്പിന് വിരാമമിട്ട് ഇന്ത്യന്‍ ഓഹരി വിപണികള്‍ വെള്ളിയാഴ്ച നഷ്ടത്തില്‍ അവസാനിച്ചു. സെന്‍സെക്‌സ് 250-300 പോയിന്റ് താഴ്ന്നപ്പോള്‍, മെറ്റല്‍ ഓഹരികളിലെ വന്‍തോതിലുള്ള വില്‍പനയും ബാങ്കിംഗ്, എനര്‍ജി ഓഹരികളിലെ സമ്മര്‍ദ്ദവും കാരണം നിഫ്റ്റി 25,300-25,350 നിലവാരത്തിന് താഴേക്ക് പോയി. ഇത്രയും തകര്‍ച്ച നേരിട്ടെങ്കിലും, വ്യാപാരത്തിനിടയില്‍ സൂചികകള്‍ ശക്തമായ തിരിച്ചുവരവ് നടത്തി. സെന്‍സെക്‌സ് ഇന്‍ട്രാഡേയില്‍ ഏകദേശം 400 പോയിന്റോളം വീണ്ടെടുക്കുകയും നിഫ്റ്റി 25,200 എന്ന നിര്‍ണ്ണായക സപ്പോര്‍ട്ട് നിലനിര്‍ത്തുകയും ചെയ്തു. താഴ്ന്ന നിലവാരത്തില്‍ ഓഹരികള്‍ വാങ്ങാന്‍ നിക്ഷേപകര്‍ താല്‍പ്പര്യം കാണിക്കുന്നു എന്നാണ് ഇത് സൂചിപ്പിക്കുന്നത്.

ബ്രോഡര്‍ മാര്‍ക്കറ്റിലെ പ്രകടനം സമ്മിശ്രമായിരുന്നു. നിഫ്റ്റി മിഡ്ക്യാപ് സൂചിക ഏകദേശം 0.3% ഇടിഞ്ഞപ്പോള്‍, സ്‌മോള്‍ക്യാപ് സൂചിക 0.3% ഉയര്‍ന്നു. ഇത് വിപണിയില്‍ തെരഞ്ഞെടുത്ത ഓഹരികളില്‍ മാത്രമാണ് ചലനമുണ്ടാകുന്നതെന്ന് വ്യക്തമാക്കുന്നു. മുന്‍നിര സൂചികകള്‍ സമ്മര്‍ദ്ദത്തിലായിരുന്നപ്പോഴും ഡിഫന്‍സീവ്, ക്വാളിറ്റി ഓഹരികളില്‍ നിക്ഷേപകര്‍ മൂല്യം കണ്ടെത്തിയതോടെ മാര്‍ക്കറ്റ് ബ്രെഡ്ത്ത് പോസിറ്റീവായി തുടര്‍ന്നു; അതായത് വിപണിയില്‍ വില ഇടിഞ്ഞ ഓഹരികളേക്കാള്‍ കൂടുതല്‍ വില കൂടിയ ഓഹരികളായിരുന്നു.

നിഫ്റ്റി 50 തളര്‍ച്ചയില്‍

ശക്തമായ 'സപ്ലൈ ഏരിയ' ആയി പ്രവര്‍ത്തിച്ച 26,300-26,350 നിലവാരത്തിന് മുകളില്‍ തുടരാന്‍ കഴിയാതെ വന്നതോടെ നിഫ്റ്റി 50 ഹ്രസ്വകാല തളര്‍ച്ചയുടെ ഘട്ടത്തിലേക്ക് കടന്നു. ഉയര്‍ന്ന നിലവാരത്തില്‍ നിന്നുള്ള കടുത്ത വില്‍പന സമ്മര്‍ദ്ദം വിപണിയെ മുന്‍പത്തെ കുതിപ്പില്‍ നിന്ന് ഹ്രസ്വകാല ഇടിവിലേക്ക് നയിച്ചു. ഡെയ്ലി ചാര്‍ട്ടിലെ 'ലോവര്‍ ഹൈ-ലോവര്‍ ലോ' രൂപീകരണവും വിപണിയില്‍ നിലവില്‍ ബിയറുകള്‍ക്ക് മേല്‍ക്കൈ ഉണ്ടെന്ന് വ്യക്തമാക്കുന്നു.

റെസിസ്റ്റന്‍സ് നിലവാരങ്ങള്‍

26,300-26,350 എന്ന മേഖല ഇപ്പോഴും ഒരു പ്രധാന തടസ്സമായി തുടരുന്നു. മുന്‍പ് ഈ ലെവല്‍ നിന്നാണ് വലിയ ലാഭമെടുക്കല്‍ ഉണ്ടായത്. ഇതിന് താഴെ, മുന്‍പ് സപ്പോര്‍ട്ട് ആയിരുന്ന 25,880-25,920 മേഖല ഇപ്പോള്‍ പെട്ടെന്നുള്ള റെസിസ്റ്റന്‍സ് ആയി മാറിയിട്ടുണ്ട്. സൂചിക ഈ ലെവല്‍ മുകളില്‍ സ്ഥിരമായി ക്ലോസ് ചെയ്യുന്നത് വരെ, ഇങ്ങോട്ടുള്ള ഏതൊരു തിരിച്ചുപോക്കും വില്‍പന സമ്മര്‍ദ്ദത്തിന് കാരണമായേക്കാം.

സപ്പോര്‍ട്ട് നിലവാരങ്ങള്‍

താഴെ വശത്ത്, 25,450-25,480 മേഖല ഒരു താല്‍ക്കാലിക സപ്പോര്‍ട്ട് ആയി പ്രവര്‍ത്തിക്കുന്നു, അവിടെ സൂചിക നിലയുറപ്പിക്കാന്‍ ശ്രമിക്കുന്നുണ്ട്. സമീപകാല കാന്‍ഡിലുകളിലെ നീളമുള്ള ലോവര്‍ വിക്കുകള്‍ താഴ്ന്ന ലെവല്‍ ബയിംഗ് താല്‍പ്പര്യത്തെ സൂചിപ്പിക്കുന്നുണ്ടെങ്കിലും, ട്രെന്‍ഡ് മാറിയെന്ന് ഉറപ്പിക്കാന്‍ ഇത് പര്യാപ്തമല്ല. ഈ സപ്പോര്‍ട്ടിന് താഴെ പോയാല്‍, ഇടക്കാലത്തെ പ്രധാന ഡിമാന്‍ഡ് ഏരിയയായ 24,900-24,950 ലേക്ക് വിപണി ഇടിയാന്‍ സാധ്യതയുണ്ട്. ഈ നിലവാരവും തകര്‍ന്നാല്‍ വില്‍പന സമ്മര്‍ദ്ദം വര്‍ദ്ധിക്കുകയും സൂചിക 24,600 ലേക്ക് താഴുകയും ചെയ്‌തേക്കാം.

മെറ്റല്‍ ഓഹരികളില്‍ കടുത്ത വില്‍പന

വിപണിയില്‍ വെള്ളിയാഴ്ച ഏറ്റവും കൂടുതല്‍ ഇടിവ് രേഖപ്പെടുത്തിയത് മെറ്റല്‍ ഓഹരികളാണ്. ഹിന്‍ഡാല്‍കോ, ടാറ്റ സ്റ്റീല്‍, ജെ.എസ്.ഡബ്ല്യു സ്റ്റീല്‍, കോള്‍ ഇന്ത്യ തുടങ്ങിയ മുന്‍നിര ഓഹരികളിലെ വന്‍ വില്‍പനയെത്തുടര്‍ന്ന് മെറ്റല്‍ സൂചിക ഏകദേശം 5% ഇടിഞ്ഞു. ഓയില്‍ & ഗ്യാസ്, ബാങ്കിംഗ്, ഐടി, എനര്‍ജി സെക്ടറുകളും ലാഭമെടുപ്പിനെ തുടര്‍ന്ന് 0.51% നഷ്ടത്തില്‍ വ്യാപാരം നടത്തി. അതേസമയം, എഫ്.എം.സി.ജി , ഫാര്‍മ, മീഡിയ, കണ്‍സ്യൂമര്‍ ഡ്യൂറബിള്‍സ് തുടങ്ങിയ ഡിഫന്‍സീവ് സെക്ടറുകള്‍ 0.51.5% നേട്ടമുണ്ടാക്കി മികച്ച പ്രകടനം കാഴ്ചവെച്ചു.

നേട്ടങ്ങളും കോട്ടങ്ങളും

നഷ്ടം നേരിട്ടവര്‍: ഹിന്‍ഡാല്‍കോ, ടാറ്റ സ്റ്റീല്‍, കോള്‍ ഇന്ത്യ, ഒ.എന്‍.ജി.സി, ജെ.എസ്.ഡബ്ല്യു സ്റ്റീല്‍. നേട്ടമുണ്ടാക്കിയവര്‍: ടാറ്റ കണ്‍സ്യൂമര്‍ പ്രോഡക്ട്സ്, അപ്പോളോ ഹോസ്പിറ്റല്‍സ്, നെസ്ലെ ഇന്ത്യ, ഐ.ടി.സി , മഹീന്ദ്ര & മഹീന്ദ്ര.

സാമ്പത്തിക സര്‍വേയും വിപണി ഉണര്‍വും

വ്യാപാരത്തിനിടയില്‍ പുറത്തുവന്ന സാമ്പത്തിക സര്‍വേ വിപണിക്ക് വലിയ ആശ്വാസമായി. അടുത്ത സാമ്പത്തിക വര്‍ഷത്തില്‍ ഇന്ത്യയുടെ ജി.ഡി.പി വളര്‍ച്ച 6.87.2% ആയിരിക്കുമെന്ന സര്‍വേ പ്രവചനം വിപണിയിലെ നഷ്ടം കുറയ്ക്കാന്‍ സഹായിച്ചു. ശക്തമായ ആഭ്യന്തര ഡിമാന്‍ഡ്, സ്ഥിരതയുള്ള മൂലധന ചെലവ് എന്നിവയെക്കുറിച്ചുള്ള അനുകൂല റിപ്പോര്‍ട്ടുകള്‍ നിക്ഷേപകരുടെ ആത്മവിശ്വാസം വര്‍ദ്ധിപ്പിച്ചു. കൂടാതെ, കഴിഞ്ഞ രണ്ട് സെഷനുകളിലായി വിദേശ നിക്ഷേപകരുടെ വില്‍പന കുറഞ്ഞതും വിപണിയെ താഴെത്തട്ടില്‍ നിന്ന് തിരിച്ചുകയറാന്‍ സഹായിച്ചു.

ഓഹരികളിലെ പ്രധാന ചലനങ്ങള്‍

നെസ്ലെ ഇന്ത്യ : മികച്ച ക്യു3 ഫലങ്ങള്‍ പുറത്തുവിട്ടതോടെ നെസ്ലെ ഇന്ത്യയുടെ ഓഹരികള്‍ മികച്ച മുന്നേറ്റം നടത്തി. കമ്പനിയുടെ ലാഭം 45% വര്‍ദ്ധിച്ച് 998 കോടിയില്‍ എത്തി. ലാഭവിഹിതം പ്രഖ്യാപിച്ചതും എഫ്.എം.സി.ജി സെക്ടറിന് ഉണര്‍വേകി.

പ്രതിരോധ മേഖല : യൂണിയന്‍ ബജറ്റില്‍ പ്രതിരോധ മേഖലയ്ക്കുള്ള വിഹിതം കൂടുമെന്ന പ്രതീക്ഷയില്‍ നിഫ്റ്റി ഇന്ത്യ ഡിഫന്‍സ് ഇന്‍ഡക്‌സ് 1% ലധികം ഉയര്‍ന്നു. ഈ മാസം ബെഞ്ച്മാര്‍ക്ക് സൂചികകളേക്കാള്‍ മികച്ച പ്രകടനമാണ് പ്രതിരോധ മേഖലയിലെ ഓഹരികള്‍ കാഴ്ചവെക്കുന്നത്.

നിലവില്‍ വിപണി ജാഗ്രതയോടെയാണ് മുന്നേറുന്നത്. മെറ്റല്‍ പോലുള്ള സെക്ടറുകളില്‍ ലാഭമെടുപ്പ് നടക്കുന്നുണ്ടെങ്കിലും, ഡിഫന്‍സീവ് ഓഹരികളിലും മിഡ്ക്യാപ് ഓഹരികളിലും ബജറ്റുമായി ബന്ധപ്പെട്ട മേഖലകളിലും നിക്ഷേപകര്‍ താല്‍പ്പര്യം കാണിക്കുന്നത് വിപണിയുടെ കരുത്ത് വ്യക്തമാക്കുന്നു. ബജറ്റ് പ്രഖ്യാപനങ്ങള്‍ വരുന്നത് വരെ വിപണിയില്‍ ഏറ്റക്കുറച്ചിലുകള്‍ തുടരാന്‍ സാധ്യതയുണ്ട്.