റാലി തുടര്‍ന്ന് വിപണികള്‍

ആഭ്യന്തര വിപണികളിൽ നിക്ഷേപകർ ശുഭാപ്തിവിശ്വാസം പുലർത്തുന്നത് തുടർന്നതിനാൽ ഇക്വിറ്റി ബെഞ്ച്മാർക്ക് സൂചികകൾ തുടര്‍ച്ചയായ ഏഴാം ദിവസവും മുന്നേറ്റം തുടരുകയാണ്. റിലയൻസ് ഇൻഡസ്ട്രീസ്, ടാറ്റ കൺസൾട്ടൻസി സർവീസസ് എന്നിവയിലെ ശക്തമായ വാങ്ങല്‍ ഇക്വിറ്റികളിലെ നേട്ടത്തിന് ആക്കം കൂട്ടി.

ബിഎസ്ഇ സെൻസെക്‌സ് 293.7 പോയിന്റ് ഉയർന്ന് 66,892.61 ലെത്തി. നിഫ്റ്റി 95 പോയിന്റ് ഉയർന്ന് 19,914.95 ൽ എത്തി. സെൻസെക്‌സ് കമ്പനികളിൽ, എച്ച്‌സിഎൽ ടെക്‌നോളജീസ്, മാരുതി, സ്റ്റേറ്റ് ബാങ്ക് ഓഫ് ഇന്ത്യ, ടാറ്റ കൺസൾട്ടൻസി സർവീസസ്, ടാറ്റ മോട്ടോഴ്‌സ്, വിപ്രോ, നെസ്‌ലെ, റിലയൻസ് ഇൻഡസ്ട്രീസ്, ലാർസൻ ആൻഡ് ടൂബ്രോ, അൾട്രാടെക് സിമന്റ് തുടങ്ങിയ ഓഹരികൾ നേട്ടത്തിലാണ്. ഇൻഡസ്ഇൻഡ് ബാങ്കും ഭാരതി എയർടെല്ലുമാണ് ഇടിവ് നേരിട്ട പ്രധാന ഓഹരികള്‍.

ഏഷ്യൻ വിപണികളിൽ, ഷാങ്ഹായ് നേട്ടത്തോടെ മുന്നേറുമ്പോള്‍ സിയോൾ, ടോക്കിയോ, ഹോങ്കോംഗ് എന്നിവ താഴ്ന്നു. വെള്ളിയാഴ്ച യുഎസ് വിപണികൾ പോസിറ്റീവ് മേഖലയിലാണ് അവസാനിച്ചത്. ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.18 ശതമാനം കുറഞ്ഞ് ബാരലിന് 90.49 ഡോളറിലെത്തി.

"ജി20 ഡൽഹി പ്രഖ്യാപനവും ഉച്ചകോടിയുടെ വിജയകരമായ സമാപനവും പോസിറ്റീവ് മാർക്കറ്റ് മൂഡിൻറെ തുടർച്ചയ്ക്ക് കാരണമാകും," ജിയോജിത് ഫിനാൻഷ്യൽ സർവീസസിലെ ചീഫ് ഇൻവെസ്റ്റ്‌മെന്റ് സ്ട്രാറ്റജിസ്റ്റ് വി കെ വിജയകുമാർ പറഞ്ഞു. ക്രൂഡോയിൽ വില ബാരലിന് 90 ഡോളറിന് മുകളിലേക്ക് എത്തുന്നത് സംബന്ധിച്ച ആശങ്ക വിപണി അവഗണിക്കുകയാണെന്നും അദ്ദേഹം കൂട്ടിച്ചേർത്തു.

വിദേശ സ്ഥാപന നിക്ഷേപകർ (എഫ്‌ഐഐകൾ) വെള്ളിയാഴ്ച 224.22 കോടി രൂപയുടെ ഇക്വിറ്റികൾ വിറ്റഴിച്ചുവെന്ന് എക്‌സ്‌ചേഞ്ച് ഡാറ്റ വ്യക്തമാക്കുന്നു. ബി‌എസ്‌ഇ ബെഞ്ച്മാർക്ക് വെള്ളിയാഴ്ച 333.35 പോയിന്റ് അഥവാ 0.50 ശതമാനം ഉയർന്ന് 66,598.91 ൽ എത്തി. നിഫ്റ്റി 92.90 പോയിന്റ് അഥവാ 0.47 ശതമാനം ഉയർന്ന് 19,819.95 ൽ എത്തി.