ദിശയറിയാതെ വിപണികള്‍, യുഎസ് വിപണികള്‍ സമ്മിശ്രം; ഇന്ന് വിപണി തുറക്കും മുമ്പ് അറിയേണ്ടത്

ഇന്നലെ ഉച്ചകഴിഞ്ഞുള്ള വ്യാപാരത്തിൽ വിപണി മികച്ച രീതിയിൽ വീണ്ടെടുപ്പ് നടത്തി. നിഫ്റ്റി 21,500ൽ ശക്തമായ പ്രതിരോധം നേരിട്ടു. ജനുവരി ഫ്യൂച്ചറുകളും ഓപ്ഷനുകളും കാലഹരണപ്പെടുന്ന ദിവസമായ ഇന്ന് (ജനുവരി 25) ഇത് പ്രധാന ഘടകമാകുമെന്ന് വിദഗ്ധർ പ്രതീക്ഷിക്കുന്നു.

ഇന്നലെ ബിഎസ്ഇ സെൻസെക്‌സ് 690 പോയിന്റ് ഉയർന്ന് 71,060ലും നിഫ്റ്റി 215 പോയിന്റ് ഉയർന്ന് 21,454ലും എത്തി. വിപണിയില്‍ ഉയർന്ന തലത്തിലുള്ള അനിശ്ചിതത്വം നിലനില്‍ക്കുന്നതായാണ് വിലയിരുത്തപ്പെടുന്നത്. യുഎസ് ട്രഷറി ആദായം 4 പോയിന്‍റിന് മുകളില്‍ ഉയര്‍ന്നു നില്‍ക്കുന്നത് എഫ്ഐഐ വരവിനെ തുടര്‍ന്നും ബാധിക്കാം

നിഫ്റ്റിയുടെ പ്രതിരോധവും പിന്തുണയും

പിവറ്റ് പോയിന്റ് കാൽക്കുലേറ്റർ സൂചിപ്പിക്കുന്നത് നിഫ്റ്റി 21,226 ലും തുടർന്ന് 21,144 ലും 21,013ലും ഉടനടി പിന്തുണ സ്വീകരിക്കാൻ സാധ്യതയുണ്ട് എന്നാണ്. അതേസമയം ഉയർച്ച ഉണ്ടായാല്‍, 21,486 ലും തുടർന്ന് 21,571 ലും 21,703ലും ഉടനടി പ്രതിരോധം കാണാനിടയുണ്ട്.

ആഗോള വിപണികളില്‍ ഇന്ന്

യുഎസ് വിപണികള്‍ സമ്മിശ്ര തലത്തിലാണ് ബുധനാഴ്ചത്തെ വ്യാപാരം അവസാനിപ്പിച്ചിട്ടുള്ളത്. എസ് & പി 500 0.08 ശതമാനം ഉയർന്ന് 4,868.55 എന്ന പുതിയ റെക്കോഡ് ഉയരത്തില്‍ സെഷൻ അവസാനിപ്പിച്ചു. സൂചിക നേട്ടത്തിലാണെങ്കിലും ഓഹരികളില്‍ ബഹുഭൂരിപക്ഷവും ഇടിവ് രേഖപ്പെടുത്തി. നാസ്ഡാക്ക് 0.36 ശതമാനം ഉയർന്ന് 15,481.92 പോയിന്റിലും ഡൗ ജോൺസ് ഇൻഡസ്ട്രിയൽ ആവറേജ് 0.26 ശതമാനം ഇടിഞ്ഞ് 37,806.39 പോയിന്റിലുമെത്തി.

യൂറോപ്യന്‍ വിപണികള്‍ പൊതുവില്‍ നേട്ടത്തിലാണ് ബുധനാഴ്ചത്തെ വ്യാപാരം അവസാനിപ്പിച്ചത്.

ഏഷ്യ പസഫിക് വിപണികള്‍ ഏറെയും ഇന്ന് നേട്ടത്തിലാണ് ഉള്ളത്. ഓസ്ട്രേലിയ എഎസ്എക്സ്, ഹോംഗ്കോംഗിന്‍റെ ഹാങ്സെങ്, ചൈനയുടെ ഷാങ്ഹായ് എന്നിവ നേട്ടത്തിലാണ്. ജപ്പാന്‍റെ നിക്കിയും ദക്ഷിണ കൊറിയയുടെ കോസ്പിയും ഇടിവില്‍ വ്യാപാരം നടത്തുന്നു.

ഗിഫ്റ്റ് നിഫ്റ്റി 22.50 പോയിന്‍റ് നഷ്ടത്തില്‍ വ്യാപാരം തുടങ്ങി. ബെഞ്ച്മാര്‍ക്ക് സൂചികകളുടെ നെഗറ്റിവ് തുടക്കത്തെയാണ് ഡെറിവേറ്റിവ് വിപണി സൂചിപ്പിക്കുന്നത്.

ഇന്ന് ശ്രദ്ധ നേടുന്ന ഓഹരികള്‍

ബജാജ് ഓട്ടോ: മൂന്നാം പാദത്തിൽ എല്ലാ വിഭാഗങ്ങളിലും വിശാലമായ അടിസ്ഥാനത്തിലുള്ള ഇരട്ട അക്ക വളർച്ച കരസ്ഥമാക്കി. സ്‍റ്റാന്‍റ്എലോണ്‍ അറ്റാദായം 37 ശതമാനം വാര്‍ഷിക വളർച്ചയോടെ 2,042 കോടി രൂപയിലെത്തി. പ്രവർത്തന വരുമാനം 30 ശതമാനം വർധിച്ച് 12,113.5 കോടി രൂപയിലെത്തി, വിൽപ്പന അളവിൽ 21.7 ശതമാനം വളർച്ച നേടാനായി.

ടെക് മഹീന്ദ്ര: ഡിജിറ്റൽ ട്രാൻസ്‌ഫോർമേഷൻ, കൺസൾട്ടിംഗ്, ബിസിനസ് റീ-എൻജിനീയറിങ് സർവീസ് കമ്പനിയുടെ മൂന്നാം പാദത്തിലെ അറ്റാദായം മുന്‍പാദത്തെ അപേക്ഷിച്ച് 3.3 ശതമാനം വളർച്ച രേഖപ്പെടുത്തി 510.4 കോടി രൂപയായി. പ്രവർത്തന വരുമാനം 1.8 ശതമാനം വർധിച്ച് 13,101 കോടി രൂപയായി.

ടാറ്റ സ്‍റ്റീൽ:ഡിസംബറിൽ അവസാനിച്ച പാദത്തിൽ ടാറ്റ ഗ്രൂപ്പ് കമ്പനിയുടെ ഏകീകൃത അറ്റാദായം 522.1 കോടി രൂപയാണ്. മുൻ വർഷം ഇതേ കാലയളവിൽ ഇത് 2,502 കോടി രൂപയുടെ നഷ്ടമായിരുന്നു. പ്രവർത്തന വരുമാനം 3.1 ശതമാനം ഇടിഞ്ഞ് 55,312 കോടി രൂപയായി. ഇന്‍പൂട്ട് ചെലവകള്‍ കുറഞ്ഞതും മികച്ച പ്രവര്‍ത്തന പ്രകടനവും ലാഭത്തിനിടയാക്കി.

സിയറ്റ്: ടയർ നിർമ്മാതാവ് ഒക്ടോബർ-ഡിസംബർ കാലയളവിൽ ഏകീകൃത അറ്റാദായം 181.3 കോടി രൂപയായി രേഖപ്പെടുത്തി. മുന്‍ വർഷം ഇതേ കാലയളവിൽ ഇത് 34.85 കോടി രൂപയായിരുന്നു. പ്രവർത്തന വരുമാനം 8.6 ശതമാനം വാര്‍ഷിക വളര്‍ച്ചയോടെ 2,963.1 കോടി രൂപയായി.

ടിവിഎസ് മോട്ടോർ കമ്പനി: ഇരുചക്രവാഹന നിർമാതാവിന്‍റെ മൂന്നാം പാദ അറ്റാദായം 68 ശതമാനം വാര്‍ഷിക വര്‍ധനയോടെ 593 കോടി രൂപയായി, പ്രവർത്തന വരുമാനം 26 ശതമാനം ഉയർന്ന് 8,245 കോടി രൂപയായി. ഇരുചക്രവാഹന വിൽപ്പന 27.1 ശതമാനം ഉയർന്ന് 10.63 ലക്ഷം യൂണിറ്റായി.

ഡിഎല്‍എഫ്: ആരോഗ്യകരമായ പ്രവർത്തന മാർജിൻ പ്രകടനവും ഉയർന്ന മറ്റ് വരുമാനവുമുള്ള റിയൽ എസ്റ്റേറ്റ് കമ്പനിയുടെ, മൂന്നാംപാദത്തിലെ ഏകീകൃത അറ്റാദായം 26.6 ശതമാനം വാര്‍ഷിക വളർച്ച രേഖപ്പെടുത്തി 655.7 കോടി രൂപയായി. പ്രവർത്തന വരുമാനം 1.8 ശതമാനം വർധിച്ച് 1,521.3 കോടി രൂപയായി.

മാസഗോൺ ഡോക്ക് ഷിപ്പ് ബിൽഡേഴ്‌സ്: ഇന്ത്യൻ കോസ്റ്റ് ഗാർഡിനായി (ഐസിജി) 14 ഫാസ്റ്റ് പട്രോൾ വെസ്സലുകൾ (എഫ്‌പിവി) നിർമ്മിക്കുന്നതിനും വിതരണം ചെയ്യുന്നതിനുമായി കപ്പൽനിർമ്മാണ കമ്പനി പ്രതിരോധ മന്ത്രാലയത്തിന്‍റെ ഏറ്റെടുക്കൽ വിഭാഗവുമായി കരാർ ഒപ്പിട്ടു. 1070 കോടി രൂപയുടേതാണ് കരാർ.

ഇന്ന് പുറത്തുവരുന്ന റിസള്‍ട്ടുകള്‍

ജെഎസ്ഡബ്ല്യു സ്റ്റീൽ, പഞ്ചാബ് നാഷണൽ ബാങ്ക്, എസിസി, അദാനി പവർ, എസ്ബിഐ കാർഡ്‍സ് ആന്‍ഡ് പേയ്മെന്റ് സര്‍വീസസ്, എസ്ബിഐ ലൈഫ് ഇൻഷുറൻസ് കമ്പനി, ടാറ്റ ടെക്നോളജീസ്, വേദാന്ത, ഹിന്ദുസ്ഥാൻ പെട്രോളിയം കോർപ്പറേഷൻ, എയു സ്മോൾ ഫിനാൻസ് ബാങ്ക്, ചോളമണ്ഡലം ഇൻവെസ്‍റ്റ്‍മെന്‍റ് ആൻഡ് ഫിനാൻസ് കമ്പനി, സൈയന്‍റ്, ഇക്വിറ്റാസ് സ്മോൾ ഫിനാൻസ് ബാങ്ക്, ഇന്ത്യൻ എനർജി എക്‌സ്‌ചേഞ്ച്, ഇന്ദ്രപ്രസ്ഥ ഗ്യാസ്, സിൻജീൻ ഇന്‍റർനാഷണൽ എന്നിവയാണ് ഇന്ന് പുറത്തുവരുന്ന പ്രധാന ത്രൈമാസ വരുമാന പ്രഖ്യാപനങ്ങള്‍.

ക്രൂഡ് ഓയില്‍ വില

പ്രതീക്ഷിച്ചതിലും വലിയ യുഎസ് ക്രൂഡ് സ്റ്റോറേജ് പിൻവലിക്കൽ, യുഎസ് ക്രൂഡ് ഉൽപാദനത്തിലെ മാന്ദ്യം, ചൈനീസ് സാമ്പത്തിക ഉത്തേജന നടപടികള്‍ എന്നിവയ്ക്കിടയിൽ ക്രൂഡ് ഓയിൽ വില ഉയർന്നു. ബുധനാഴ്ച വ്യാപാരത്തില്‍ ബ്രെന്റ് ക്രൂഡ് ഫ്യൂച്ചറുകൾ 0.6 ശതമാനം ഉയർന്ന് ബാരലിന് 80.04 ഡോളറിലെത്തി, യുഎസ് വെസ്റ്റ് ടെക്സസ് ഇന്റർമീഡിയറ്റ് ക്രൂഡ് (WTI) 1.0 ശതമാനം ഉയർന്ന് 75.09 ഡോളറിൽ അവസാനിച്ചു.

വിദേശ നിക്ഷേപങ്ങളുടെ ഗതി

വിദേശ സ്ഥാപന നിക്ഷേപകർ (എഫ്‌ഐഐകൾ) തുടർച്ചയായ ആറാം ദിവസവും ക്യാഷ് സെഗ്‌മെന്റിൽ വിൽപ്പന സമ്മർദ്ദം നിലനിർത്തി, ഓഹരികളില്‍ 6,934.93 കോടി രൂപയുടെ അറ്റവില്‍പ്പന നടത്തി. ആഭ്യന്തര സ്ഥാപന നിക്ഷേപകർ (ഡിഐഐകൾ) 6,012.67 കോടി രൂപയുടെ അറ്റവാങ്ങല്‍ നടത്തിയെന്നും എൻഎസ്‌ഇയിൽ നിന്നുള്ള താൽക്കാലിക കണക്കുകൾ വ്യക്തമാക്കുന്നു.

ഓഹരി വിപണി വാര്‍ത്തകള്‍ അറിയാന്‍

നിരാകരണം: ഈ ലേഖനം വിജ്ഞാനത്തെ മാത്രം ഉദ്ദേശിച്ചുള്ളതാണ്, നിക്ഷേപ ശുപാര്‍ശയല്ല. ഓഹരി നിക്ഷേപം വിപണിയുടെ ലാഭ നഷ്ട സാധ്യതകൾക്ക് വിധേയമാണ്. ഓഹരി വിപണിയിൽ നിക്ഷേപിക്കും മുമ്പെ അംഗീകൃത സാമ്പത്തിക വിദഗ്ധന്റെ സേവനം തേടേണ്ടതാണ്. നിക്ഷേപങ്ങളിലൂടെയുണ്ടാകുന്ന നഷ്ടങ്ങള്‍ക്ക് ലേഖകനോ മൈഫിന്‍ പോയിന്‍റിനോ ഉത്തവരാദിത്തം ഉണ്ടായിരിക്കുന്നതല്ല.

വിപണി തുറക്കും മുന്‍പുള്ള മൈഫിന്‍ ടിവിയിലെ ലൈവ് അവലോകനം കാണാം