തുടക്ക വ്യാപാരത്തില്‍ റെക്കോഡ് ഉയരം തൊട്ട് വിപണികള്‍

ഇന്ത്യന്‍ ഓഹരി വിപണി ബെഞ്ച്മാർക്ക് സൂചികകളായ സെൻസെക്സും നിഫ്റ്റിയും തങ്ങളുടെ റാലിയുടെ തുടർച്ചയായി വ്യാഴാഴ്ച ആദ്യ വ്യാപാരത്തിൽ റെക്കോർഡ് ഉയരങ്ങളിലെത്തി. ഐടി, ബാങ്കിംഗ് സ്റ്റോക്കുകളിലെ ശക്തമായ വാങ്ങലിനൊപ്പം ഏഷ്യൻ വിപണികളിലെ പോസിറ്റിവ് പ്രവണതയും നിക്ഷേപക വികാരത്തെ പിന്തുണച്ചു. ബിഎസ്ഇ സെൻസെക്‌സ് 304.06 പോയിന്റ് ഉയർന്ന് 67,771.05-ലെ എക്കാലത്തെയും ഉയർന്ന നിലവാരത്തിലെത്തി. നിഫ്റ്റി 97.65 പോയിന്റ് ഉയർന്ന് 20,167.65 എന്ന ആജീവനാന്ത ഉയരത്തിലെത്തി.

എങ്കിലും തുടര്‍ന്ന് വിപണികളില്‍ ചാഞ്ചാട്ടം പ്രകടമായി, രാവിലെ 10.35 നുള്ള നിലയനുസരിച്ച് സെന്‍സെക്സ് 52.07 പോയിന്‍റ് നേട്ടത്തോടെ 67,519.06ലും നിഫ്റ്റി 22.05 പോയിന്‍റ് നേട്ടത്തോടെ 20,092.05ലും ആണ് വ്യാപാരം നടക്കുന്നത് . സെൻസെക്സ് സ്ഥാപനങ്ങളില്‍ ടാറ്റ സ്റ്റീൽ, ടെക് മഹീന്ദ്ര, വിപ്രോ, സ്റ്റേറ്റ് ബാങ്ക് ഓഫ് ഇന്ത്യ എന്നിവയെല്ലാം നേട്ടത്തിലാണ്. ബജാജ് ഫിനാന്‍സ് ഓഹരികള്‍ ഇടിവിലാണ്.

ഏഷ്യൻ വിപണികളിൽ, സിയോളും ഷാങ്ഹായും പോസിറ്റിവായി വ്യാപാരം നടത്തുന്നു. യുഎസ് വിപണികള്‍ ഇന്നലെ സമ്മിശ്ര തലത്തിലാണ് വ്യാപാരം അവസാനിപ്പിച്ചത്. ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.42 ശതമാനം ഉയർന്ന് ബാരലിന് 92.28 ഡോളറിലെത്തി.

ഇന്നലെ വിദേശ നിക്ഷേപക സ്ഥാപന (എഫ്‌ഐഐ) ബുധനാഴ്ച 1,631.63 കോടി രൂപയുടെ അറ്റവില്‍പ്പന ഇക്വിറ്റികളില്‍ നടത്തിയതായി എക്സ്ചേഞ്ച് ഡാറ്റ വ്യക്തമാക്കുന്നു.

"യുഎസിൽ നിന്നുള്ള പണപ്പെരുപ്പ കണക്കുകൾ സമ്മിശ്ര ചിത്രമാണ് അവതരിപ്പിക്കുന്നത്. ഓഗസ്റ്റിലെ സിപിഐ പണപ്പെരുപ്പ കണക്കുകൾ 3.6 ശതമാനം പ്രതീക്ഷിച്ചിരുന്ന സ്ഥാനത്ത് 3.7 ശതമാനത്തിൽ എത്തിയപ്പോൾ, പ്രധാന പണപ്പെരുപ്പം 4.3 ശതമാനം വരുമെന്ന് പ്രതീക്ഷ ശരിയായി. സെപ്റ്റംബറിൽ ഫെഡറൽ റിസര്‍വ് നിരക്ക് വര്‍ധന താല്‍ക്കാലികമായി നിർത്താൻ സാധ്യതയുണ്ട്," ജിയോജിത് ഫിനാൻഷ്യൽ സർവീസസിലെ ചീഫ് ഇൻവെസ്റ്റ്‌മെന്റ് സ്ട്രാറ്റജിസ്റ്റ് വി കെ വിജയകുമാർ പറഞ്ഞു.

ബിഎസ്ഇ ബെഞ്ച്മാർക്ക് ബുധനാഴ്ച 245.86 പോയിന്റ് അഥവാ 0.37 ശതമാനം ഉയർന്ന് 67,466.99 എന്ന നിലയിലാണ്. വിശാലമായ നിഫ്റ്റി ആദ്യമായി 20,000-ന് മുകളിൽ ക്ലോസ് ചെയ്തു, 76.80 പോയിന്റ് അല്ലെങ്കിൽ 0.38 ശതമാനം ഉയർന്ന് 20,070 ൽ എത്തി, അതിന്റെ എക്കാലത്തെയും ഉയർന്ന ക്ലോസ് ചെയ്തു.