വിപണിയിൽ വൻ ഇടിവ്; സെൻസെക്സ് 1000 പോയിന്റിലധികം താഴേക്ക്, നിക്ഷേപകർ ആശങ്കയിൽ

ബുധനാഴ്ച മിഡ്-സെഷനിൽ ഇന്ത്യൻ ഓഹരി വിപണി കനത്ത വിൽപന സമ്മർദ്ദത്തിന് സാക്ഷ്യം വഹിച്ചു. വിദേശ നിക്ഷേപകരുടെ തുടർച്ചയായ വിൽപനയും പശ്ചിമേഷ്യയിലെ ഭൗമരാഷ്ട്രീയ അനിശ്ചിതത്വങ്ങളുമാണ് വിപണിയെ പിടിച്ചുലയ്ക്കുന്നത്.

രാവിലെ വ്യാപാരത്തിലുണ്ടായിരുന്ന നേട്ടങ്ങൾ പൂർണ്ണമായും കൈവിട്ടാണ് വിപണി താഴേക്ക് പതിച്ചത്.സെൻസെക്സ് ഉച്ചയ്ക്ക് 11:38 ഓടെ 878 പോയിന്റ് ഇടിഞ്ഞ് 77,327 നിലവാരത്തിലെത്തി. ദിവസത്തെ ഉയർന്ന നിലവാരത്തിൽ നിന്ന് 1000 പോയിന്റിലധികം തകർച്ചയാണ് സെൻസെക്സ് നേരിട്ടത്.

നിഫ്റ്റി 50 ഏകദേശം 242 പോയിന്റ് നഷ്ടം രേഖപ്പെടുത്തി നിർണ്ണായകമായ 24,000 എന്ന നിലവാരത്തിന് തൊട്ടടുത്താണ് വ്യാപാരം നടക്കുന്നത്. വിപണിയിലെ മൊത്തത്തിലുള്ള സ്ഥിതി പരിശോധിച്ചാൽ, 2,149 ഓഹരികൾ നേട്ടമുണ്ടാക്കിയപ്പോൾ 1,469 ഓഹരികൾ നഷ്ടം നേരിട്ടു. 179 ഓഹരികളുടെ വിലയിൽ മാറ്റമില്ല.

സൂചികകളിൽ സമ്മിശ്ര പ്രതികരണം

നിഫ്റ്റി മിഡ്ക്യാപ് ഇൻഡക്സ് 0.3% ഇടിഞ്ഞപ്പോൾ, നിഫ്റ്റി സ്മോൾക്യാപ് ഇൻഡക്സ് 0.5% നേട്ടത്തോടെ പോസിറ്റീവായി വ്യാപാരം തുടരുന്നു. വിപണിയിലെ അസ്ഥിരത അളക്കുന്ന ഇന്ത്യ വിക്സ് സൂചിക 8 ശതമാനത്തിലധികം ഉയർന്ന് 20.5 നിലവാരത്തിലെത്തി. ഇത് വരും ദിവസങ്ങളിലും വിപണിയിൽ വലിയ വോൾട്ടിലിറ്റി ഉണ്ടാകുമെന്നതിന്റെ സൂചനയാണ്.

വിൽപ്പന സമ്മർദ്ധം തുടരുന്നു; 24,000 ലെവൽ നിർണ്ണായകമാകും

നിഫ്റ്റി 50 സൂചിക ഒരു മണിക്കൂർ ചാർട്ടിൽ ഇപ്പോഴും ശക്തമായ വിൽപന സമ്മർദ്ദത്തിന് കീഴിലാണ്. പ്രധാന പ്രതിരോധ നിലവാരങ്ങൾക്ക് മുകളിൽ തുടരാൻ സാധിക്കാത്തതിനാൽ വിപണിയിലെ ഇടിവ് തുടരുകയാണ്.

സാങ്കേതിക സൂചനകൾ

താഴേക്ക് പോകുന്ന ട്രെൻഡ് ലൈനിന് (Downward trendline) സമീപം പലതവണ തടസ്സങ്ങൾ നേരിട്ടതിനെത്തുടർന്ന് സൂചിക വീണ്ടും താഴേക്ക് പതിച്ചു. പ്രധാനപ്പെട്ട ഫിബൊനാച്ചി റീട്രേസ്മൻ്റ് നിലവാരങ്ങൾ നിഫ്റ്റി തകർത്തു കഴിഞ്ഞു. 0.786 റിട്രേസ്‌മെന്റ് സോണായ 24,270-ന് താഴേക്ക് പോയ സൂചിക, നിലവിൽ 24,000 എന്ന സപ്പോർട്ട് നിലവാരത്തിന് തൊട്ടടുത്താണ്.

ബ്ലേക്ഡൗൺ (Breakdown): 24,140 – 24,270 മേഖലയ്ക്ക് താഴെയുള്ള ഈ തകർച്ച വിപണിയിലെ ബലഹീനതയെയാണ് സൂചിപ്പിക്കുന്നത്. ഹ്രസ്വകാല വ്യാപാരത്തിൽ നിലവിൽ വിൽപനക്കാർക്കാണ് മുൻതൂക്കം.

വരാനിരിക്കുന്ന സാധ്യതകൾ

നിഫ്റ്റിക്ക് 24,000 ലെവൽ നിലനിർത്താൻ സാധിച്ചില്ലെങ്കിൽ, അടുത്ത വലിയ സപ്പോർട്ട് 23,740 ലെവ ലായിരിക്കും. ഇത് മുൻപത്തെ ഏറ്റവും താഴ്ന്ന നിലവാരവുമായാണ് ചേരുന്നത്.മുകളിലേക്ക് കയറാൻ ശ്രമിച്ചാൽ 24,140-ലെവലിൽ ഉടനടി പ്രതിരോധം നേരിടാം. അതിനുശേഷം 24,450 ലെവലാണ് ശക്തമായ പ്രതിരോധ ലെവൽ.

ഈ പ്രതിരോധ നിലവാരങ്ങൾ മറികടക്കാത്തിടത്തോളം വിപണിയിലെ ട്രെൻഡ് നെഗറ്റീവ് ആയി തുടരാനാണ് സാധ്യത. ഓരോ ചെറിയ മുന്നേറ്റത്തിലും വിൽപന സമ്മർദ്ദം ഉണ്ടായേക്കാം.

സെക്ടറുകളിൽ സമ്മിശ്ര പ്രതികരണം; ബാങ്കിംഗ്, ഐടി ഓഹരികളിൽ വിൽപന സമ്മർദ്ദംഇന്ന് വിപണിയിൽ ഭൂരിഭാഗം സെക്ടറുകളും നഷ്ടത്തിലാണ് വ്യാപാരം നടത്തിയത്. വിപണിയിലെ പ്രധാന മാറ്റങ്ങൾ താഴെ പറയുന്നവയാണ്.

സെക്ടറുകളുടെ പ്രകടനം

ബാങ്കിംഗ്, ഫിനാൻഷ്യൽ സർവീസസ്, ഓട്ടോ, ഐടി, എഫ്എംസിജി എന്നീ പ്രധാന സെക്ടറുകൾ നഷ്ടം രേഖപ്പെടുത്തി. ഇത് സൂചികകളെ താഴേക്ക് നയിച്ചു.മീഡിയ, മെറ്റൽ, ഫാർമ, റിയൽറ്റി എന്നീ സെക്ടറുകളിൽ തിരഞ്ഞെടുത്ത വാങ്ങലുകൾ ദൃശ്യമായി. നിക്ഷേപകർ കമ്മോഡിറ്റി അധിഷ്ഠിത ഓഹരികളിലേക്കും ഡിഫൻസീവ് സെക്ടറുകളിലേക്കും ശ്രദ്ധ മാറ്റുന്നതിന്റെ സൂചനയാണിത്.

ശ്രദ്ധേയമായ ഓഹരികൾ

തളർച്ച നേരിട്ട ഓഹരികളിൽ ഫിനാൻഷ്യൽ സെക്ടറിലെ വമ്പൻമാരായ കൊട്ടക് മഹീന്ദ്ര ബാങ്ക്, ബജാജ് ഫിനാൻസ്, ബജാജ് ഫിൻസെർവ്, എസ്ബിഐ ലൈഫ് ഇൻഷുറൻസ് എന്നിവയുടെ ഓഹരികൾ ഏകദേശം 1% ഇടിഞ്ഞു. ഇത് ഫിനാൻഷ്യൽ സർവീസസ് സൂചികയെ ദോഷകരമായി ബാധിച്ചു.

ടെലികോം, കൺസംപ്ഷൻ മേഖലകളിൽ നിന്നുള്ള ഭാരതി എയർടെൽ, ടാറ്റ കൺസ്യൂമർ പ്രോഡക്ട്സ് എന്നിവയും നഷ്ടത്തിൽ വ്യാപാരം നടത്തി. വിപണിയിൽ ഏറ്റവും കൂടുതൽ ഇടപാടുകൾ നടന്ന ഓഹരികളിൽ റിലയൻസ് ഇൻഡസ്ട്രീസ് , എച്ച്ഡിഎഫ്സി ബാങ്ക് ,ഭാരതി എയർടെൽ എന്നിവയുണ്ട്.

തേജസ് നെറ്റ്‌വർക്സ് ,ഹാപ്പിയസ്റ്റ് മൈൻഡ്സ് ടെക്നോളജീസ് എന്നിവയാണ് ശ്രദ്ധാ കേന്ദ്രമായ മറ്റ് രണ്ട് ഓഹരികൾ.

തകർച്ചയ്ക്ക് പിന്നിലെ പ്രധാന കാരണങ്ങൾ

വിപണിയിലെ ഇന്നത്തെ ബലഹീനതയ്ക്ക് പ്രധാനമായും മൂന്ന് കാരണങ്ങളാണുള്ളത്.ആഭ്യന്തര നിക്ഷേപകരിൽ നിന്ന് വലിയ പിന്തുണ ലഭിക്കുന്നുണ്ടെങ്കിലും, വിദേശ നിക്ഷേപകർ ഓഹരികൾ വിറ്റഴിക്കുന്നത് വിപണിയെ സമ്മർദ്ദത്തിലാക്കുന്നു. കഴിഞ്ഞ സെഷനിൽ മാത്രം ഏകദേശം 4,673 കോടി രൂപയുടെ ഓഹരികളാണ് ഇവർ വിറ്റഴിച്ചത്.

കഴിഞ്ഞ ദിവസത്തെ തിരിച്ചു വരവിന് ശേഷം നിക്ഷേപകർ ലാഭമെടുപ്പിന് മുതിർന്നത് സൂചികകളെ താഴേക്ക് നയിച്ചു. പശ്ചിമേഷ്യയിലെ സംഘർഷങ്ങളും ഹോർമുസ് കടലിടുക്ക് അടച്ചുപൂട്ടാനുള്ള സാധ്യതയെത്തുടർന്ന് ക്രൂഡ് ഓയിൽ വിതരണത്തിലുണ്ടായേക്കാവുന്ന തടസ്സങ്ങളും നിക്ഷേപകരെ കൂടുതൽ ജാഗ്രതയുള്ളവരാക്കി.

ആഗോള അനിശ്ചിതത്വങ്ങളും വിദേശ നിക്ഷേപകരുടെ പണമൊഴുക്കും വിപണിയിലെ അസ്ഥിരത തുടരാൻ കാരണമാകുന്നു.ഹ്രസ്വകാലത്തേക്ക് വിപണിയുടെ ആത്മവിശ്വാസം നിലനിർത്താൻ നിഫ്റ്റി 50 24,000 എന്ന നിലവാരത്തിന് മുകളിൽ തുടരേണ്ടത് അത്യാവശ്യമാണ്.ബാങ്കിംഗ്, ഫിനാൻഷ്യൽ ഓഹരികളിലെ ബലഹീനത തുടരുകയാണെങ്കിൽ, അത് വരും ദിവസങ്ങളിലും വിപണി സൂചികകളെ സമ്മർദ്ദത്തിലാക്കാൻ സാധ്യതയുണ്ട്