വിപണികളിൽ ശുഭാപ്തിവിശ്വാസം, ഇന്ത്യൻ സൂചികകൾ ഉയരാൻ സാധ്യത

യുഎസ്-ചൈന വ്യാപാര ചർച്ചകളെക്കുറിച്ചുള്ള ശുഭാപ്തിവിശ്വാസം ആഗോളതലത്തിൽ വിപണികളെ ഉത്തേജിപ്പിച്ചു. സൂചനകൾ അനുസരിച്ച് ഇന്ത്യൻ വിപണി ഇന്ന് നേട്ടത്തോടെ തുറക്കും. ഗിഫ്റ്റ് നിഫ്റ്റി പോസിറ്റീവായി തുറന്നു. ഏഷ്യൻ വിപണികൾ ഉയർന്ന തോതിൽ വ്യാപാരം നടത്തുന്നു. യുഎസ് ഓഹരി വിപണി നേട്ടത്തിൽ അവസാനിച്ചു.

ഗിഫ്റ്റ് നിഫ്റ്റി

ഗിഫ്റ്റ് നിഫ്റ്റി 25,245 ലെവലിൽ വ്യാപാരം നടത്തുന്നു. നിഫ്റ്റി ഫ്യൂച്ചേഴ്‌സിന്റെ മുൻ ക്ലോസിനേക്കാൾ ഏകദേശം 63 പോയിന്റിന്റെ പ്രീമിയം. ഇത് ഇന്ത്യൻ ഓഹരി വിപണി സൂചികകൾക്ക് ഒരു നല്ല തുടക്കത്തെ സൂചിപ്പിക്കുന്നു.

ഏഷ്യൻ വിപണികൾ

ചൊവ്വാഴ്ച ഏഷ്യൻ വിപണികൾ ഉയർന്ന തോതിൽ വ്യാപാരം നടത്തുന്നു. ജപ്പാനിലെ നിക്കി 0.51% ഉയർന്നു, ടോപ്പിക്സ് സൂചിക 0.3% ഉയർന്നു. ദക്ഷിണ കൊറിയയുടെ കോസ്പി 0.32% ഉയർന്നു. കോസ്ഡാക്ക് 0.28% ഉയർന്നു. ഹോങ്കോങ്ങിന്റെ ഹാങ് സെങ് സൂചിക ഫ്യൂച്ചറുകൾ ദുർബലമായ ഓപ്പണിംഗിനെ സൂചിപ്പിക്കുന്നു.

വാൾസ്ട്രീറ്റ്

വ്യാപാര തർക്കം പരിഹരിക്കുന്നതിനുള്ള യുഎസ്-ചൈന ചർച്ചകൾ പ്രതീക്ഷ നൽകിയതിനാൽ തിങ്കളാഴ്ച യുഎസ് ഓഹരി വിപണി നേട്ടത്തിൽ അവസാനിച്ചു. ഡൗ ജോൺസ് ഇൻഡസ്ട്രിയൽ ശരാശരി മാറ്റമില്ലാതെ 42,761.76 ൽ അവസാനിച്ചു, അതേസമയം എസ് ആൻറ് പി 0.09% ഉയർന്ന് 6,005.88 ൽ എത്തി. നാസ്ഡാക്ക് 0.31% ഉയർന്ന് 19,591.24 ൽ അവസാനിച്ചു.

ആപ്പിൾ ഓഹരി വില 1.2% കുറഞ്ഞു. എൻവിഡിയ ഓഹരി വില 0.64% ഉയർന്നു. ആമസോണിന്റെയും ഗൂഗിളിന്റെയും ഓഹരികൾ ഓരോന്നും 1% ൽ കൂടുതൽ ഉയർന്നു. ടെസ്‌ല ഓഹരി വില 4.55% ഉയർന്നു. വാർണർ ബ്രദേഴ്‌സ് ഡിസ്‌കവറി ഓഹരികൾ ഏകദേശം 3% ഇടിഞ്ഞു, മക്‌ഡൊണാൾഡിന്റെ ഓഹരി വില 0.8% ഇടിഞ്ഞു. റോബിൻഹുഡ് മാർക്കറ്റ് ഓഹരികൾ ഏകദേശം 2% ഇടിഞ്ഞു.

ഇന്ത്യൻ വിപണി

ഇന്ത്യൻ ഓഹരി വിപണി ഇന്നലെ നേട്ടത്തിൽ വ്യാപാരം അവസാനിപ്പിച്ചു. സെൻസെക്സ് 256.22 പോയിന്റ് അഥവാ 0.31 ശതമാനം ഉയർന്ന് 82,445.21 ലും നിഫ്റ്റി 100.15 പോയിന്റ് അഥവാ 0.40 ശതമാനം ഉയർന്ന് 25,103.20 ലും വ്യാപാരം അവസാനിപ്പിച്ചു. സെൻസെക്സ് ഓഹരികളിൽ, കൊട്ടക് മഹീന്ദ്ര ബാങ്ക്, ബജാജ് ഫിനാൻസ്, ആക്സിസ് ബാങ്ക്, പവർ ഗ്രിഡ്, ഇൻഡസ്ഇൻഡ് ബാങ്ക്, മാരുതി, ബജാജ് ഫിൻസെർവ്, എൻ‌ടി‌പി‌സി എന്നിവയാണ് ഏറ്റവും കൂടുതൽ നേട്ടമുണ്ടാക്കിയത്. അതേസമയം എറ്റേണൽ, ഐസിഐസിഐ ബാങ്ക്, ടൈറ്റാൻ, അദാനി പോർട്ട്സ്, ടാറ്റ സ്റ്റീൽ, ഭാരതി എയർടെൽ എന്നി ഓഹരികൾ ഇടിവ് നേരിട്ടു. സെക്ടര്‍ സൂചികകളിൽ റിയലിറ്റി ഒഴികെ മറ്റെല്ലാ മേഖല സൂചികകളും ഇന്ന് നേട്ടത്തിൽ വ്യാപാരം അവസാനിപ്പിച്ചു.

പിന്തുണയും പ്രതിരോധവും

നിഫ്റ്റി

പിവറ്റ് പോയിന്റുകളെ അടിസ്ഥാനമാക്കിയുള്ള പ്രതിരോധം: 25,145, 25,165, 25,196

പിന്തുണ: 25,082, 25,062, 25,031

ബാങ്ക് നിഫ്റ്റി

പിവറ്റ് പോയിന്റുകളെ അടിസ്ഥാനമാക്കിയുള്ള പ്രതിരോധം: 56,992, 57,053, 57,151

പിന്തുണ: 56,796, 56,735, 56,637

പുട്ട്-കോൾ അനുപാതം

വിപണിയുടെ മാനസികാവസ്ഥ സൂചിപ്പിക്കുന്ന നിഫ്റ്റി പുട്ട്-കോൾ അനുപാതം (PCR), ജൂൺ 9 ന് 1.01 ആയി കുറഞ്ഞു.

ഇന്ത്യ വിക്സ്

വിപണിയിലെ ചാഞ്ചാട്ടം അളക്കുന്ന ഇന്ത്യ വിക്സ്, 15 മാർക്കിന് താഴെയായി തുടർന്നു. കഴിഞ്ഞ സെഷനിലെ കുത്തനെയുള്ള ഇടിവിന് ശേഷം ഇത് 0.43 ശതമാനം ഉയർന്ന് 14.69 ലെവലിലെത്തി.

വിദേശ സ്ഥാപന നിക്ഷേപകർ

വിദേശ സ്ഥാപന നിക്ഷേപകർ (എഫ്‌ഐഐ) തിങ്കളാഴ്ച ഈ മാസത്തെ ഏറ്റവും ഉയർന്ന നിക്ഷേപം രേഖപ്പെടുത്തി.അവർ 1,992.87 കോടി രൂപയുടെ ഓഹരികൾ വാങ്ങി. ആഭ്യന്തര നിക്ഷേപകർ 3,503.79 കോടിയുടെ ഓഹരികൾ വാങ്ങി.

സ്വർണ്ണ വില

സ്വർണ്ണ വില സ്ഥിരമായി തുടർന്നു. സ്‌പോട്ട് സ്വർണ്ണ വില ഔൺസിന് 0.2% കുറഞ്ഞ് 3,322.07 ഡോളറിലെത്തി. യുഎസ് സ്വർണ്ണ ഫ്യൂച്ചറുകൾ 0.4% കുറഞ്ഞ് 3,341.90 ഡോളറിലെത്തി.

എണ്ണ വില

അസംസ്കൃത എണ്ണ വില ഉയർന്നു. ബ്രെന്റ് ക്രൂഡ് ഫ്യൂച്ചറുകൾ ബാരലിന് 0.13% ഉയർന്ന് 67.13 ഡോളറിലെത്തി. യുഎസ് വെസ്റ്റ് ടെക്സസ് ഇന്റർമീഡിയറ്റ് ക്രൂഡ് 0.17% ഉയർന്ന് 65.40 ഡോളറിലെത്തി.

ഇന്ന് ശ്രദ്ധിക്കേണ്ട ഓഹരികൾ

വിപ്രോ

വിപ്രോയുടെ പ്രൊമോട്ടർ സ്ഥാപനമായ അസിം പ്രേംജി ട്രസ്റ്റ് ഒരു ബ്ലോക്ക് ഡീൽ വഴി കമ്പനിയുടെ 5,057 കോടി രൂപയുടെ 20.23 കോടി ഓഹരികൾ വിറ്റു.

മോത്തിലാൽ ഓസ്വാൾ

നിയമങ്ങൾ ലംഘിച്ചതായി കണ്ടെത്തിയതിനെത്തുടർന്ന് മൂലധന വിപണി നിയന്ത്രണ ഏജൻസിയായ സെബി ബ്രോക്കറേജ് സ്ഥാപനമായ മോട്ടിലാൽ ഓസ്വാൾ ഫിനാൻഷ്യൽ സർവീസസിന് (MOFSL) 3 ലക്ഷം രൂപ പിഴ ചുമത്തി.

ജന എസ്‌എഫ്‌ബി

ഒരു യൂണിവേഴ്‌സൽ ബാങ്കായി മാറുന്നതിന് അനുമതി തേടി റിസർവ് ബാങ്ക് ഓഫ് ഇന്ത്യയ്ക്ക് (ആർ‌ബി‌ഐ) ഔദ്യോഗികമായി അപേക്ഷ സമർപ്പിച്ചതായി ജന സ്‌മോൾ ഫിനാൻസ് ബാങ്ക് (ജന എസ്‌എഫ്‌ബി) അറിയിച്ചു.

ഐആർബി ഇൻഫ്രാസ്ട്രക്ചർ

ഐആർബി ഇൻഫ്രാസ്ട്രക്ചർ 2025 മെയ് മാസത്തിൽ ടോൾ വരുമാനത്തിൽ 9% വാർഷിക വർധനവ് നേടി. ഇത് 581 കോടിയായി റിപ്പോർട്ട് ചെയ്തു.

കാപ്രി ഗ്ലോബൽ

500 കോടി രൂപയുടെ അപ്‌സൈസ് ഓപ്ഷൻ ഉൾപ്പെടെ 2,000 കോടി രൂപ വരെ സമാഹരിക്കുന്നതിനായി കാപ്രി ഗ്ലോബൽ ഒരു യോഗ്യതയുള്ള സ്ഥാപന പ്ലേസ്‌മെന്റ് (ക്യുഐപി) ആരംഭിച്ചതായി റിപ്പോർട്ട് പറയുന്നു.

ആസ്ട്രസെനെക്ക ഫാർമ ഇന്ത്യ

ജൂൺ 30 മുതൽ പ്രബല്യത്തിൽ വരുന്ന തരത്തിൽ, ആസ്ട്രസെനെക്ക ഫാർമയുടെ മാനേജിംഗ് ഡയറക്ടർ സഞ്ജീവ് കുമാർ പഞ്ചൽ തന്റെ സ്ഥാനത്ത് നിന്ന് രാജിവച്ചതായി ആസ്ട്രസെനെക്ക ഫാർമ അറിയിച്ചു.