Pre Market Technical Analysis : ഫെഡ് നിരക്ക് കുറച്ചു, കുതിപ്പിന് ഒരുങ്ങി വിപണി !

ആഗോള തലത്തിലെ അനുകൂല സാഹചര്യങ്ങളും യുഎസ് ഫെഡറൽ റിസർവ് പലിശ നിരക്ക് കുറച്ചതും ഇന്ത്യൻ വിപണിയിൽ പോയിസിറ്റീവ് തുടക്കത്തിന് കാരണമായി.

രൂപ റെക്കോർഡ് താഴ്ചയിലാണ് എന്നതും വിദേശ നിക്ഷേപക സ്ഥാപനങ്ങൾ തുടർച്ചയായ 11-ാം ദിവസവും ഓഹരികൾ വിറ്റഴിക്കുന്നു എന്നതും ശ്രദ്ധേയമാണ്. 2,021 കോടി രൂപയുടെ ഓഹരികൾ വിദേശ നിക്ഷേപകർ വിറ്റഴിച്ചപ്പോൾ ആഭ്യന്തര സ്ഥാപന നിക്ഷേപകർ 3,796 കോടി രൂപയുടെ നിക്ഷേപം നടത്തി വിപണിക്ക് താങ്ങായി. ഇന്ന് വരാനിരിക്കുന്ന ഇന്ത്യയുടെ പണപ്പെരുപ്പ ഡാറ്റ ബാങ്കുകൾ, ഓട്ടോ, റിയൽ എസ്റ്റേറ്റ് തുടങ്ങിയ പലിശ സെൻസിറ്റീവ് മേഖലകളെ സ്വാധീനിച്ചേക്കാം.

നിഫ്റ്റി ,ബാങ്ക് നിഫ്റ്റി സാങ്കേതിക വിശകലനം

നിഫ്റ്റി നിർണ്ണായകമായ ട്രെൻഡ് റിവേഴ്സലിന് 25,950 (20-DEMA) ന് മുകളിൽ നിലനിൽക്കേണ്ടത് അത്യാവശ്യമാണ്. 26,000–26,100 മറികടന്നാൽ 26,200+ ലേക്ക് നീങ്ങാൻ സാധ്യതയുണ്ട്. ബാങ്ക് നിഫ്റ്റിയുടെ 59,200 ന് മുകളിലുള്ള സ്ഥിരമായ വ്യാപാരം 59,900–60,100 ലെവലുകളിലേക്ക് വാങ്ങലുകൾ ആകർഷിക്കാൻ സാധ്യതയുണ്ട്. മൊത്തത്തിൽ വിപണി പോസിറ്റീവാണെങ്കിലും ഉയർന്ന തലങ്ങളിൽ ലാഭബുക്കിംഗിനുള്ള സാധ്യത തള്ളിക്കളയാനാവില്ല.

ഇന്ന് ബാങ്കിംഗ് ആൻഡ് ഫിനാൻഷ്യൽസ് മേഖല പോസിറ്റീവായി തുടരുന്നു. യുഎസ് ഫെഡ് നിരക്ക് കുറച്ചത് ബാങ്കുകൾക്കും നോൺ-ബാങ്കിംഗ് ഫിനാൻഷ്യൽ കമ്പനികൾക്കും അനുകൂലമാണ്. ബാങ്ക് നിഫ്റ്റി ഉയർന്ന സപ്പോർട്ട് ലെവലുകൾ നിലനിർത്തുന്നത് പ്രോത്സാഹനകരമാണ്, കൂടാതെ പൊതുമേഖലാ ബാങ്കുകളിൽ ഇന്ന് ശക്തമായ മുന്നേറ്റം പ്രതീക്ഷിക്കാം.. പവർ & ഇൻഫ്രാ മേഖലയും പോസിറ്റീവാണ്; ടാറ്റാ പവറിന് ലഭിച്ച 35 വർഷത്തേക്കുള്ള വലിയ ഓർഡർ ഈ മേഖലയ്ക്ക് ഗുണമാകും.

കൂടാതെ സുസ്ഥിരമായ അന്തരീക്ഷം ഇൻഫ്രാസ്ട്രക്ചർ കമ്പനികളിൽ വാങ്ങൽ താൽപ്പര്യം വർദ്ധിപ്പിക്കാൻ സാധ്യതയുണ്ട്. മെറ്റൽസ് മേഖലയിൽ സമ്മിശ്ര വികാരം ഉണ്ടാകും. വേദാന്ത ശ്രദ്ധയാകർഷിക്കും. ഐടി മേഖല നേരിയ നെഗറ്റീവ് അല്ലെങ്കിൽ റേഞ്ച്-ബൗണ്ട് ആയി തുടരാനാണ് സാധ്യത. ദുർബലമായ രൂപ ഐടി കമ്പനികൾക്ക് പിന്തുണ നൽകുന്നുണ്ടെങ്കിലും, ഇൻഫോസിസ് പ്രൊമോട്ടറുമായി ബന്ധപ്പെട്ട ഓഹരി വിൽപന സംബന്ധിച്ച വാർത്തകൾ ഹ്രസ്വകാലത്തേക്ക് ഒരു നേരിയ സെന്റിമെന്റ് സമ്മർദ്ദം സൃഷ്ടിച്ചേക്കാം. പണപ്പെരുപ്പ ആശങ്കകളും രൂപയുടെ ബലഹീനതയും കാരണം ശ്രദ്ധയാകർഷിക്കുന്ന മറ്റൊരു മേഖല എഫ്എംസിജിയാണ്.