റേഞ്ച് ബൗണ്ട് ട്രേഡിംഗ് തുടരുന്നു; നിഫ്റ്റി 26,000 ലെവൽ പിടിക്കുമോ?

മിശ്രിതമായ ആഗോള സൂചനകൾക്കിടയിൽ ഇന്ത്യൻ ഓഹരി വിപണിയിൽ പോസിറ്റീവ് തുടക്കം.

കഴിഞ്ഞ ദിവസം യുഎസ് വിപണി സമ്മിശ്രമായാണ് വ്യാപാരം അവസാനിപ്പിച്ചത്. ഹെൽത്ത് കെയർ, എനർജി ഓഹരികളിലെ തളർച്ച കാരണം ഡൗ ജോൺസും എസ് ആൻഡ് പി 500-ഉം ഇടിഞ്ഞപ്പോൾ നാസ്ഡാക്ക് നേട്ടമുണ്ടാക്കിയിരുന്നു. യുഎസ് പണപ്പെരുപ്പ കണക്കുകൾക്കായി നിക്ഷേപകർ കാത്തിരിക്കുന്നതിനാൽ ഏഷ്യൻ വിപണികൾ ദുർബലമായാണ് കാണപ്പെടുന്നത്. പലിശ നിരക്ക് കുറയ്ക്കുന്ന കാര്യത്തിൽ ഫെഡറൽ റിസർവ് സ്വീകരിക്കുന്ന ജാഗ്രത കലർന്ന നിലപാട് നിക്ഷേപകരുടെ ആത്മവിശ്വാസത്തെ ബാധിക്കുന്നുണ്ട്. വിദേശ നിക്ഷേപകരുടെ ഇന്ത്യൻ വിപണിയിൽ നിന്നുള്ള തുടർച്ചയായ പിൻമാറ്റവും രൂപയുടെ മൂല്യത്തകർച്ചയും ആഭ്യന്തര വിപണിക്ക് വെല്ലുവിളിയായി തുടരുന്നു.

പ്രതീക്ഷിക്കേണ്ടത് എന്തൊക്കെ?

നിഫ്റ്റി 50 ഇന്ന് ഒരു നിശ്ചിത പരിധിക്കുള്ളിൽ തുടരാനാണ് സാധ്യത. 26,000 എന്ന ലെവൽ മറികടക്കാൻ വിപണി പ്രയാസപ്പെടുകയാണ്. ഗിഫ്റ്റ് നിഫ്റ്റി 25,925 നിലവാരത്തിൽ സൂചന നൽകുന്നതിനാൽ, വിപണിയിൽ ഏറ്റക്കുറച്ചിലുകൾ ഉണ്ടായേക്കാം. നിഫ്റ്റി 26,100-ലെവലിന് താഴെ നിൽക്കുന്നിടത്തോളം കാലം അനിശ്ചിതത്വം തുടരാം.

25,750 എന്നതാണ് പ്രധാന സപ്പോർട്ട് ലെവൽ. 26,100 – 26,300 ലെവലിലാണ് റെസിസ്റ്റൻസ്.

നിഫ്റ്റി 50 – സാങ്കേതിക അവലോകനം

26,300–26,400 ലെവലിൽ തടസ്സം നേരിട്ടതിനെത്തുടർന്ന് നിഫ്റ്റി ഇപ്പോൾ കറക്ഷൻ ഘട്ടത്തിലാണ്. നിലവിൽ 25,860 നിലവാരത്തിലാണ് നിഫ്റ്റി ഉള്ളത്. ഇത് നിർണ്ണായകമായ ഫിബൊനാച്ചി റിട്രേസ്‌മെന്റ് (0.786) മേഖലയാണ്. 25,780–25,750 ലെവൽ നിലനിർത്തുകയാണെങ്കിൽ വിപണിക്ക് തിരിച്ചുകയറാനാകും. എന്നാൽ താഴേക്ക് പോയാൽ 25,550–25,500 വരെ ഇടിഞ്ഞേക്കാം.

ബാങ്ക് നിഫ്റ്റി – സാങ്കേതിക അവലോകനം

ബാങ്ക് നിഫ്റ്റി ഇപ്പോൾ 59,000 നിലവാരത്തിന് ചുറ്റുമാണ് ചലിക്കുന്നത്. 58,650–58,500 എന്ന സപ്പോർട്ട് മേഖല നിലനിർത്തുന്നത് വിപണിക്ക് പ്രതീക്ഷ നൽകുന്നുണ്ട്. 59,300–59,500 ലെവലിലാണ് റെസിസ്റ്റൻസ്. ഇത് മറികടന്നാൽ ബാങ്ക് നിഫ്റ്റി 60,000 എന്ന ലക്ഷ്യത്തിലേക്ക് നീങ്ങും. 58,500 ലെവൽ തകർന്നാൽ സൂചിക 57,450 വരെ താഴാൻ സാധ്യതയുണ്ട്.

ഇന്ന് ശ്രദ്ധിക്കേണ്ട ഓഹരികൾ

ഡിസംബർ 19-ന് ഫണ്ട് ശേഖരണത്തിനായി ശ്രീറാം ഫിനാൻസ് ബോർഡ് യോഗം ചേരും.അക്സോ നോബൽ ഇന്ത്യ പ്രൊമോട്ടർ ഗ്രൂപ്പ് 9% ഓഹരികൾ വിൽക്കാൻ ഒരുങ്ങുന്നതായി വാർത്തകളുണ്ട്.കേന്ദ്ര സർക്കാർ ഇന്ത്യൻ ഓവർസീസ് ബാങ്കിലെ 3% ഓഹരികൾ വിറ്റഴിക്കാൻ (OFS) പദ്ധതിയിടുന്നു.

മൊത്തത്തിലുള്ള കാഴ്ചപ്പാട്

വിപണി ഇന്ന് ജാഗ്രതയോടെയായിരിക്കും നീങ്ങുക. ഓഹരികൾ കേന്ദ്രീകരിച്ചുള്ള നീക്കങ്ങൾക്കായിരിക്കും മുൻഗണന. വലിയ കുതിപ്പിന് കാത്തുനിൽക്കാതെ ലാഭമെടുക്കുന്ന 'സെൽ-ഓൺ-റൈസ്' (Sell-on-rise) തന്ത്രമായിരിക്കും വ്യാപാരികൾക്ക് ഉചിതം.