അവസാന മണിക്കൂറിലെ ലാഭമെടുപ്പ്; വിപണിയില്‍ സമ്മിശ്ര ക്ലോസിംഗ്

ബുധനാഴ്ച മികച്ച നേട്ടത്തോടെ വ്യാപാരം ആരംഭിച്ച ഇന്ത്യന്‍ ഓഹരി വിപണിയില്‍, വ്യാപാരത്തിന്റെ അവസാന മണിക്കൂറില്‍ ഉണ്ടായ കനത്ത ലാഭമെടുപ്പ് രാവിലത്തെ നേട്ടങ്ങളെല്ലാം ഇല്ലാതാക്കി. ബാങ്കിംഗ്, എഫ്.എം.സി.ജി മേഖലകളുടെയും റിലയന്‍സിന്റെയും കരുത്തില്‍ ഒരു ഘട്ടത്തില്‍ സൂചികകള്‍ വലിയ കുതിപ്പ് നടത്തിയെങ്കിലും, ഉയര്‍ന്ന നിലവാരത്തില്‍ വിപണിക്ക് തുടരാന്‍ സാധിച്ചില്ല. സെന്‍സെക്‌സ് 64 പോയിന്റ് ഉയര്‍ന്ന് 73,983 പോയിന്റ് ഉയര്‍ന്ന് ക്ലോസ് ചെയ്തു. നിഫ്റ്റി 27 പോയിന്റ് കുറഞ്ഞ് 23,214ല്‍ വ്യാപാരം അവസാനിപ്പിച്ചു.

പശ്ചിമേഷ്യയില്‍ അമേരിക്കയും ഇറാനും തമ്മില്‍ വീണ്ടും ഉടലെടുത്ത പിരിമുറുക്കങ്ങള്‍, വിദേശ നിക്ഷേപകരുടെ തുടര്‍ച്ചയായ വില്‍പന, മിഡ്ക്യാപ്-സ്‌മോള്‍ക്യാപ് ഓഹരികളിലെ തളര്‍ച്ച എന്നിവയാണ് വിപണിയെ താഴേക്ക് നയിച്ചത്.

വ്യാപാരത്തിന്റെ പ്രധാന സവിശേഷതകള്‍

അവസാന മണിക്കൂറിലെ തകര്‍ച്ച: വ്യാപാരത്തിനിടയില്‍ നിഫ്റ്റി 23,400 എന്ന സുപ്രധാന പ്രതിരോധ നിലവാരം മറികടന്ന് മുന്നേറിയിരുന്നു. എന്നാല്‍ അവസാന ഒരു മണിക്കൂറില്‍ ഉണ്ടായ ശക്തമായ വില്‍പന സമ്മര്‍ദ്ദം സൂചികയെ ഇന്നത്തെ ഏറ്റവും താഴ്ന്ന നിലവാരത്തിന് തൊട്ടടുത്തേക്ക് എത്തിച്ചു.

ആഗോള ആശങ്കകള്‍: യു.എസ് - ഇറാന്‍ സംഘര്‍ഷം വീണ്ടും വഷളായത് ആഗോള സാമ്പത്തിക വളര്‍ച്ചയെ ബാധിക്കുമെന്ന ഭീതി പരത്തിയിട്ടുണ്ട്. ഇത് പണപ്പെരുപ്പത്തിനും ഊര്‍ജ്ജ പ്രതിസന്ധിക്കും കാരണമായേക്കുമെന്ന ആശങ്ക നിക്ഷേപകരെ കൂടുതല്‍ ജാഗ്രതയുള്ളവരാക്കി.

നിഫ്റ്റി ട്രെന്‍ഡ് ഇപ്പോഴും ബെയറിഷ്

ഡെയ്ലി ചാര്‍ട്ട് പ്രകാരം നിഫ്റ്റി 50 സൂചിക ഇപ്പോഴും അതിന്റെ ഡൗണ്‍ട്രെന്‍ഡില്‍ തന്നെയാണ് തുടരുന്നത്. ചാര്‍ട്ടിലെ ട്രെന്‍ഡ്ലൈന്‍, സൂപ്പര്‍ട്രെന്‍ഡ് റെസിസ്റ്റന്‍സ് സോണ്‍ എന്നിവയ്ക്ക് താഴെയാണ് സൂചിക ഇപ്പോഴും വ്യാപാരം നടത്തുന്നത്.

26,300 നിലവാരത്തില്‍ ഉണ്ടായ ശക്തമായ വില്‍പന സമ്മര്‍ദ്ദത്തിന് ശേഷം, വിപണി തുടര്‍ച്ചയായി ലോവര്‍ ഹൈസും ലോവര്‍ ലോസും ഉണ്ടാക്കുന്നത് വിപണിയില്‍ സെല്ലര്‍മാരുടെ ആധിപത്യം വ്യക്തമാക്കുന്നു. ഇടയ്ക്ക് ഉണ്ടാകുന്ന തിരിച്ചു വരവുകളെല്ലാം ട്രെന്‍ഡ്ലൈനിന് സമീപം പ്രതിരോധം നേരിടുന്നത് വിപണിയില്‍ ശക്തമായ ബയിംഗ് താല്‍പര്യത്തിന്റെ കുറവിനെയാണ് കാണിക്കുന്നത്.

നിലവിലെ ചാര്‍ട്ട് ഘടന

ഡിമാന്‍ഡ് സോണിലെ കണ്‍സോളിഡേഷന്‍: ചാര്‍ട്ടിലെ ദീര്‍ഘചതുരാകൃതിയില്‍ അടയാളപ്പെടുത്തിയിരിക്കുന്ന 23,100 - 23,250 എന്ന സപ്പോര്‍ട്ട് സോണിന് ഉള്ളിലാണ് നിഫ്റ്റി ഇപ്പോള്‍ കണ്‍സോളിഡേറ്റ് ചെയ്യുന്നത്. ഈ മേഖല വിപണിക്ക് ഒരു താല്‍കാലിക ഡിമാന്‍ഡ് സോണ്‍ ആയി പ്രവര്‍ത്തിക്കുകയും വലിയ തകര്‍ച്ചകളില്‍ നിന്ന് വിപണിയെ തടഞ്ഞുനിര്‍ത്തുകയും ചെയ്യുന്നുണ്ട്.

തീരുമാനമില്ലായ്മ : ഈ സപ്പോര്‍ട്ട് ലെവലിന് സമീപം ചെറിയ ബോഡിയുള്ള കാന്‍ഡിലുകള്‍ രൂപപ്പെടുന്നത് വിപണിയില്‍ ബയര്‍മാരും സെല്ലര്‍മാരും ഒരുപോലെ ആശയക്കുഴപ്പത്തിലാണെന്നാണ് സൂചിപ്പിക്കുന്നത്. ഒരു പുതിയ ദിശാസൂചനയ്ക്കായി വ്യാപാരികള്‍ കാത്തിരിക്കുകയാണ്.

പോസിറ്റീവ് സാധ്യത: വിപണിയില്‍ ഒരു ഹ്രസ്വകാല റിക്കവറി ഉണ്ടാകണമെങ്കില്‍ സൂചികയ്ക്ക് 23,415 എന്ന ആദ്യ പ്രതിരോധത്തിന് മുകളില്‍ ക്ലോസ് ചെയ്യാന്‍ സാധിക്കണം. ഒരു വലിയ ട്രെന്‍ഡ് മാറ്റം പ്രതീക്ഷിക്കണമെങ്കില്‍ സൂചിക 24,040 എന്ന സുപ്രധാന മേഖല ഭേദിച്ച് മുകളില്‍ തുടരേണ്ടതുണ്ട്. ഇത് സംഭവിച്ചാല്‍ സൂചിക 24,780, തുടര്‍ന്ന് 25,890 ലെവലുകളിലേക്ക് കുതിച്ചേക്കാം.

നെഗറ്റീവ് സാധ്യത: മറിച്ച്, ഇപ്പോള്‍ തുടരുന്ന കണ്‍സോളിഡേഷന് ഒടുവില്‍ നിഫ്റ്റിക്ക് 23,100 എന്ന സപ്പോര്‍ട്ട് നിലനിര്‍ത്താന്‍ കഴിയാതെ വരികയും താഴേക്ക് ബ്രേക്ക്ഡൗണ്‍ സംഭവിക്കുകയും ചെയ്താല്‍ വിപണിയില്‍ വില്‍പന സമ്മര്‍ദ്ദം ഇരട്ടിയാകും. ഇത് സൂചികയെ 22,773, അതിനും താഴെ 22,500 - 22,150 നിലവാരങ്ങളിലേക്ക് നയിച്ചേക്കാം.

മിഡ്ക്യാപ്, സ്‌മോള്‍ക്യാപ് ഓഹരികളില്‍ തകര്‍ച്ച

അമേരിക്കയും ഇറാനും തമ്മില്‍ പശ്ചിമേഷ്യയില്‍ വീണ്ടും ഉടലെടുത്ത സൈനിക നീക്കങ്ങള്‍ ആഗോള സാമ്പത്തിക വളര്‍ച്ചയെ ബാധിക്കുമെന്ന ഭീതി വിപണിയില്‍ ശക്തമായി നിലനില്‍ക്കുകയാണ്. ഇത് ആഗോളതലത്തില്‍ പണപ്പെരുപ്പം ഉയര്‍ത്തുമെന്നും ഇന്ധനവില വര്‍ദ്ധിപ്പിക്കുമെന്നുമുള്ള ആശങ്ക നിക്ഷേപകരെ വലിയ രീതിയില്‍ സ്വാധീനിക്കുന്നു.

ഇതിന്റെ ഫലമായി ഉയര്‍ന്നുവന്ന ജാഗ്രതാ നിര്‍ദ്ദേശങ്ങള്‍ വികസ്വര വിപണികളെയും ആഗോള ഇക്വിറ്റികളെയും ഒരേപോലെ ബാധിച്ചതോടെ നിക്ഷേപകര്‍ സുരക്ഷിത നിക്ഷേപങ്ങളിലേക്ക് പണം മാറ്റാന്‍ നിര്‍ബന്ധിതരായിരിക്കുകയാണ്.

പ്രധാന ബെഞ്ച്മാര്‍ക്ക് സൂചികകളായ സെന്‍സെക്‌സും നിഫ്റ്റിയും വലിയ വീഴ്ചയില്ലാതെ കണ്‍സോളിഡേറ്റ് ചെയ്തപ്പോള്‍, ചെറുകിട-ഇടത്തരം ഓഹരികളില്‍ വലിയ തോതിലുള്ള വില്‍പന സമ്മര്‍ദ്ദമാണ് ദൃശ്യമായത്.

നിഫ്റ്റി മിഡ്ക്യാപ് സൂചിക : വിപണിയിലെ പൊതുവായ വില്‍പനയില്‍ ഏകദേശം 1.5 ശതമാനത്തിന്റെ ഇടിവ് രേഖപ്പെടുത്തി. നിഫ്റ്റി സ്‌മോള്‍ക്യാപ് സൂചിക: ചെറുകിട ഓഹരികളുടെ ഈ സൂചികയും ഏകദേശം 1.3 ശതമാനത്തോളം താഴേക്ക് പോയി.

നെഗറ്റീവ് മാര്‍ക്കറ്റ് ബ്രെഡ്ത്

ലാര്‍ജ്-ക്യാപ് ഓഹരികളില്‍ മാത്രമായി ഒതുങ്ങിനിന്ന ഇന്നത്തെ റാലിക്ക് ബ്രോഡര്‍ മാര്‍ക്കറ്റിന്റെ പിന്തുണ പൂര്‍ണ്ണമായും നഷ്ടമായി. എന്‍.എസ്.ഇ അഡ്വാന്‍സ്-ഡിക്ലൈന്‍ റേഷ്യോ സൂചിപ്പിക്കുന്നത്, വിപണിയില്‍ ലാഭത്തില്‍ ക്ലോസ് ചെയ്ത കമ്പനികളെക്കാള്‍ വളരെ കൂടുതലാണ് നഷ്ടം നേരിട്ട കമ്പനികളുടെ എണ്ണം എന്നാണ്. ഇത് വന്‍കിട ഓഹരികള്‍ക്ക് പുറമെ വിപണിയില്‍ മൊത്തത്തിലുള്ള ഒരു വില്‍പന സമ്മര്‍ദ്ദം ശക്തമാണെന്ന് അടിവരയിടുന്നു.

മെറ്റല്‍ മേഖലയില്‍ വന്‍ തകര്‍ച്ച

ബുധനാഴ്ചത്തെ വ്യാപാരം അവസാനിക്കുമ്പോള്‍ വിപണിയില്‍ ഭൂരിഭാഗം സെക്ടറുകളും ചുവപ്പണിഞ്ഞെങ്കിലും, എഫ്.എം.സി.ജി, പ്രൈവറ്റ് ബാങ്കിംഗ് മേഖലകള്‍ മാത്രമാണ് വിപണിക്ക് താല്‍കാലിക ആശ്വാസമേകിയത്. ആഗോള അനിശ്ചിതത്വങ്ങള്‍ക്കിടയിലും ഈ രണ്ട് മേഖലകളിലെ പ്രമുഖ ഓഹരികള്‍ മികച്ച പ്രതിരോധം കാഴ്ചവെച്ചു.

എഫ്.എം.സി.ജി മേഖല

ഇന്ന് വിപണിയില്‍ ഏറ്റവും മികച്ച പ്രകടനം കാഴ്ചവെച്ചത് എഫ്.എം.സി.ജി സെക്ടറാണ്. മുന്‍നിര ഓഹരികള്‍: ഹിന്ദുസ്ഥാന്‍ യൂണിലിവര്‍, നെസ്ലെ ഇന്ത്യ , ഐ.ടി.സി എന്നിവയിലെ മികച്ച മുന്നേറ്റം നിഫ്റ്റി എഫ്.എം.സി.ജി സൂചികയെ ഇന്ന് ഏറ്റവും കൂടുതല്‍ നേട്ടമുണ്ടാക്കിയ സെക്ടറാക്കി മാറ്റി.

കാരണം: അസംസ്‌കൃത എണ്ണവിലയിലുണ്ടായ കുറവ് ഈ ഉപഭോക്തൃ കമ്പനികളുടെ ഇന്‍പുട്ട് ചെലവുകള്‍ കുറയ്ക്കുമെന്ന പ്രതീക്ഷ നല്‍കി. ഇത് രാജ്യത്തെ ആഭ്യന്തര ഉപഭോഗ വികാരത്തെയും കമ്പനികളുടെ ലാഭക്ഷമതയെയും അനുകൂലമായി ബാധിക്കുമെന്നാണ് വിലയിരുത്തല്‍.

ആര്‍.ബി.ഐ കരുത്തില്‍ പ്രൈവറ്റ് ബാങ്കുകള്‍

റിസര്‍വ് ബാങ്ക് ഓഫ് ഇന്ത്യ പുതുതായി പ്രഖ്യാപിച്ച 'ഫോറെക്‌സ് സ്വാപ്പ്' ആനുകൂല്യങ്ങളുടെ പശ്ചാത്തലത്തില്‍ ബാങ്കിംഗ് ഓഹരികള്‍ വിപണിയില്‍ മികച്ച പ്രതിരോധം തുടര്‍ന്നു.

ഈ പുതിയ നയം വഴി വിദേശ കറന്‍സി നിക്ഷേപങ്ങള്‍ സമാഹരിക്കുന്നതിനുള്ള ചെലവ് കുറയുകയും ബാങ്കുകളിലെ പണലഭ്യത മെച്ചപ്പെടുകയും ചെയ്യും.

ഐ.സി.ഐ.സി.ഐ ബാങ്ക്, ആക്‌സിസ് ബാങ്ക്, കോട്ടക് മഹീന്ദ്ര ബാങ്ക് എന്നീ പ്രമുഖ സ്വകാര്യ ബാങ്ക് ഓഹരികള്‍ ഇന്ന് സൂചികകള്‍ വലിയ തകര്‍ച്ചയിലേക്ക് പോകാതെ താങ്ങിനിര്‍ത്താന്‍ സഹായിച്ചു.

വില്‍പന സമ്മര്‍ദ്ദത്തില്‍ മെറ്റല്‍ മേഖല

മറുവശത്ത്, ലോഹ ഓഹരികളില്‍ ഇന്ന് കനത്ത ലാഭമെടുപ്പും വില്‍പനയുമാണ് ദൃശ്യമായത്. നിഫ്റ്റി മെറ്റല്‍ സൂചിക 1 ശതമാനത്തിലധികം ഇടിവ് രേഖപ്പെടുത്തി.

കാരണം: വര്‍ദ്ധിച്ചുവരുന്ന ഭൗമരാഷ്ട്രീയ ആശങ്കകള്‍, കമ്മോഡിറ്റി വിലയിലെ ചാഞ്ചാട്ടം എന്നിവയ്ക്ക് പുറമെ അമേരിക്കന്‍ ഫെഡറല്‍ റിസര്‍വ് പലിശനിരക്ക് ഉയര്‍ത്തിയേക്കാമെന്ന ആഗോള സൂചനകളും മെറ്റല്‍ മേഖലയ്ക്ക് തിരിച്ചടിയായി.

മെറ്റല്‍ ഓഹരികള്‍ക്ക് പുറമെ മീഡിയ, റിയല്‍റ്റി, എനര്‍ജി, ഓയില്‍ & ഗ്യാസ്, പൊതുമേഖലാ ബാങ്കുകള്‍ എന്നിവയും ഇന്ന് വലിയ നഷ്ടത്തിലാണ് വ്യാപാരം അവസാനിപ്പിച്ചത്.

ഐ.ടി മേഖല ആറാം ദിവസവും നഷ്ടത്തില്‍

ബുധനാഴ്ചത്തെ വ്യാപാരത്തില്‍ ഐ.ടി മേഖലയിലെ തളര്‍ച്ച തുടരുമ്പോഴും, കോര്‍പ്പറേറ്റ് പ്രഖ്യാപനങ്ങളുടെയും പുതിയ കരാറുകളുടെയും പശ്ചാത്തലത്തില്‍ നിരവധി ഓഹരികള്‍ വിപണിയില്‍ വന്‍ മുന്നേറ്റം നടത്തി. അതേസമയം, ആഭ്യന്തര കറന്‍സിയായ രൂപ അമേരിക്കന്‍ ഡോളറിനെതിരെ നേരിയ നേട്ടത്തോടെയാണ് വ്യാപാരം അവസാനിപ്പിച്ചത്.

ഐ.ടി മേഖലയിലെ തുടര്‍ച്ചയായ ഇടിവ്

സാങ്കേതികവിദ്യാ മേഖലയിലെ ഭാവി വളര്‍ച്ചയെക്കുറിച്ചുള്ള ആഗോള ആശങ്കകള്‍ ഐ.ടി ഓഹരികളെ വീണ്ടും സമ്മര്‍ദ്ദത്തിലാക്കി. നിഫ്റ്റി ഐ.ടി സൂചിക തുടര്‍ച്ചയായ ആറാം സെഷനിലും നഷ്ടം രേഖപ്പെടുത്തി. പ്രതി ഓഹരിക്ക് 25 രൂപ ലാഭവിഹിതം പ്രഖ്യാപിച്ചതിന് പിന്നാലെ ഇന്ന് 'എക്‌സ്-ഡിവിഡന്റ്' ആയി മാറിയ ഇന്‍ഫോസിസ് ആണ് സൂചികകളെ പ്രധാനമായും താഴേക്ക് വലിച്ചത്.

ശ്രദ്ധയാകര്‍ഷിച്ച മുന്നേറ്റങ്ങള്‍

നേട്ടമുണ്ടാക്കിയ കമ്പനികള്‍:ഹിന്ദുജ ഗ്ലോബല്‍ സൊല്യൂഷന്‍സ് : കമ്പനിയുടെ പുതിയ തന്ത്രപരമായ പദ്ധതിയായ 'പ്രോജക്ട് ഗംഗ' പ്രഖ്യാപിച്ചതിന് പിന്നാലെ ഓഹരി വില 11 ശതമാനം കുതിച്ചുയര്‍ന്നു.

ക്ലീന്‍ മാക്‌സ് എന്‍വിറോ എനര്‍ജി: പ്രമുഖ ആഗോള കമ്പനിയായ മെറ്റാ പ്ലാറ്റ്ഫോംസുമായി പുനരുപയോഗ ഊര്‍ജ്ജ മേഖലയില്‍ തന്ത്രപരമായ പങ്കാളിത്തം പ്രഖ്യാപിച്ചതോടെ ഓഹരി വില 10 ശതമാനം ഉയര്‍ന്നു.

അഫ്‌കോണ്‍സ് ഇന്‍ഫ്രാസ്ട്രക്ചര്‍: വാധവന്‍ പോര്‍ട്ടിനായി 5,301 കോടിയുടെ വമ്പന്‍ ബ്രേക്ക്വാട്ടര്‍ പ്രോജക്ട് കരാര്‍ സ്വന്തമാക്കിയ വാര്‍ത്തയ്ക്ക് പിന്നാലെ ഓഹരി വില 4 ശതമാനം നേട്ടമുണ്ടാക്കി.

കോണ്‍കോര്‍ഡ് ബയോടെക്: തങ്ങളുടെ 'ടോഫാസിറ്റിനിബ്' ഗുളികകള്‍ക്ക് യു.എസ്.എഫ്.ഡി.എ അംഗീകാരം ലഭിച്ചതോടെ ഓഹരി വില പോസിറ്റീവ് ആയി മുന്നേറി.

എച്ച്.ഡി.എഫ്.സി ബാങ്ക്: ലീലാവതി ട്രസ്റ്റ് കേസുമായി ബന്ധപ്പെട്ട് ബാങ്കിന് അനുകൂലമായ നിയമപരമായ തീരുമാനങ്ങള്‍ ഉണ്ടായതോടെ ഓഹരി വില നേട്ടത്തില്‍ അവസാനിച്ചു.

വലിയ നഷ്ടം നേരിട്ട ഓഹരികള്‍

ഓയില്‍ ഇന്ത്യ: പ്രമുഖ ബ്രോക്കറേജ് സ്ഥാപനങ്ങള്‍ ഓഹരിയുടെ റേറ്റിംഗ് താഴ്ത്തിയതിനെ തുടര്‍ന്ന് കമ്പനിയുടെ ഓഹരി വില 10 ശതമാനത്തിലധികം ഇടിഞ്ഞു.

കല്യാണ്‍ ജ്വല്ലേഴ്‌സ് & പി.സി ജ്വല്ലര്‍ : ആഗോള വിപണിയില്‍ സ്വര്‍ണവിലയിലുണ്ടായ കുറവ് ജ്വല്ലറി ഓഹരികളെ ബാധിച്ചു. ഇരു കമ്പനികളുടെയും ഓഹരികള്‍ നഷ്ടത്തിലാണ് ക്ലോസ് ചെയ്തത്.

വെല്‍സ്പണ്‍ കോര്‍പ്പറേഷന്‍: കമ്പനിയുടെ ഉപകമ്പനി സൗദി അറേബ്യയിലെ ഒരു പൈപ്പ് നിര്‍മ്മാണ കമ്പനിയിലുള്ള തങ്ങളുടെ ഓഹരി വിഹിതം കുറച്ചതിനെ തുടര്‍ന്ന് ഓഹരി വില താഴേക്ക് പോയി.

നേട്ടത്തോടെ ഇന്ത്യന്‍ രൂപ

വ്യാപാരത്തിനിടയില്‍ കൈവരിച്ച വലിയ നേട്ടങ്ങള്‍ അവസാന ഘട്ടത്തില്‍ അല്പം കൈവിട്ടെങ്കിലും, യു.എസ് ഡോളറിനെതിരെ ഇന്ത്യന്‍ രൂപ പോസിറ്റീവ് ആയി ക്ലോസ് ചെയ്തു.

രൂപയുടെ മൂല്യം: മുന്‍ ദിവസത്തെ അപേക്ഷിച്ച് 8 പൈസ കരുത്താര്‍ജ്ജിച്ച് ഡോളറിനെതിരെ 95.27 എന്ന നിലവാരത്തിലാണ് രൂപ വ്യാപാരം അവസാനിപ്പിച്ചത്.