തുടക്കവ്യാപാരത്തില്‍ കനത്ത ഇടിവുമായി സെന്‍സെക്സും നിഫ്റ്റിയും

യുഎസ് ഫെഡറൽ റിസർവിന്റെ പലിശ നിരക്ക് തീരുമാനത്തിന് മുന്നോടിയായി, ആഗോള വിപണികളിലെ ദുർബലമായ പ്രവണതകളുടെ പശ്ചാത്തലത്തില്‍ ആഭ്യന്തര ഓഹരി വിപണികള്‍ ഇന്ന് തുടക്കവ്യാപാരത്തില്‍ കനത്ത ഇടിവ് നേരിട്ടു. വിദേശ ഫണ്ടുകളുടെ ഒഴുക്കും സൂചികയിലെ പ്രമുഖരായ എച്ച്‌ഡിഎഫ്‌സി ബാങ്കിലെ വില്‍പ്പനയും ബെയറിഷ് പ്രവണതയ്ക്ക് ആക്കം കൂട്ടി.

സെൻസെക്‌സ് 611.48 പോയിന്റ് ഇടിഞ്ഞ് 66,985.36 എന്ന നിലയിലെത്തി. നിഫ്റ്റി 164.4 പോയിന്റ് താഴ്ന്ന് 19,968.90 ൽ എത്തി. സെൻസെക്‌സ് കമ്പനികളില്‍, എച്ച്‌ഡിഎഫ്‌സി ബാങ്ക് ഏറ്റവും കൂടുതൽ ഇടിവ് പ്രകടമാക്കി, 3 ശതമാനത്തിലധികം താഴ്ച്ചയാണ് ഈ ഓഹരിയില്‍ ഉണ്ടായത്. റിലയൻസ് ഇൻഡസ്ട്രീസ്, ഭാരതി എയർടെൽ, മാരുതി, ടൈറ്റൻ, ഹിന്ദുസ്ഥാൻ യുണിലിവർ എന്നിവയാണ് ഇടിവ് നേരിടുന്ന മറ്റ് പ്രധാന ഓഹരികള്‍.

എൻടിപിസി, ഇൻഡസ്ഇൻഡ് ബാങ്ക്, ആക്സിസ് ബാങ്ക്, മഹീന്ദ്ര ആൻഡ് മഹീന്ദ്ര തുടങ്ങിയ ഓഹരികൾ നേട്ടത്തിലാണ്.

ഏഷ്യൻ വിപണികളിൽ സിയോൾ, ടോക്കിയോ, ഷാങ്ഹായ്, ഹോങ്കോങ് എന്നിവ നഷ്ടത്തിലാണ് വ്യാപാരം നടക്കുന്നത്. ചൊവ്വാഴ്ച യുഎസ് വിപണികൾ നെഗറ്റീവ് ടെറിട്ടറിയിലാണ് അവസാനിച്ചത്. ആഗോള എണ്ണ മാനദണ്ഡമായ ബ്രെന്റ് ക്രൂഡ് 0.99 ശതമാനം ഇടിഞ്ഞ് ബാരലിന് 93.41 ഡോളറിലെത്തി.

"ദുര്‍ബലമായ ആഗോള സൂചനകൾ ബുധനാഴ്ച തുടക്കത്തിലെ വ്യാപാരത്തെ ബുദ്ധിമുട്ടിച്ചേക്കാം, ഫെഡ് റിസര്‍വ് പ്രഖ്യാപനത്തിന് മുന്നോടിയായി നിക്ഷേപകർ ജാഗ്രത പാലിക്കാൻ സാധ്യതയുണ്ട്. . ബാങ്ക് ഓഫ് ഇംഗ്ലണ്ട്, ബാങ്ക് ഓഫ് ജപ്പാൻ എന്നിവയും പലിശ നിരക്ക് സംബന്ധിച്ച അവരുടെ തീരുമാനത്തിനായി ഈ ആഴ്ച യോഗം ചേരുന്നുണ്ട്,” മേത്ത ഇക്വിറ്റീസ് ലിമിറ്റഡിന്റെ സീനിയർ വിപി (റിസർച്ച്) പ്രശാന്ത് തപ്‌സെ തന്‍റെ പ്രീ-മാര്‍ക്കറ്റ് വിശകലനത്തില്‍ പറഞ്ഞു.

"ഹ്രസ്വകാലത്തേക്ക് വിപണിയിൽ വളരെയധികം വെല്ലുവിളികൾ ഉണ്ട്. ബ്രെന്റ് ക്രൂഡ് 94 ഡോളറിലാണ്, ഡോളർ സൂചിക 105ന് മുകളിലേക്ക് നീങ്ങി, യുഎസ് ബോണ്ട് യീൽഡ് 5.09 ശതമാനമായി, ഡോളറിനെതിരെ രൂപ റെക്കോഡ് താഴ്ചയിലെത്തി എന്നിവയെല്ലാം ശക്തമായ തിരിച്ചടികളാണ്," ജിയോജിത് ഫിനാൻഷ്യൽ സർവീസസിലെ ചീഫ് ഇൻവെസ്റ്റ്‌മെന്റ് സ്ട്രാറ്റജിസ്റ്റ് വി കെ വിജയകുമാർ പറയുന്നു.

വിദേശ സ്ഥാപന നിക്ഷേപകർ (എഫ്‌ഐഐകൾ) തിങ്കളാഴ്ച 1,236.51 കോടി രൂപയുടെ ഇക്വിറ്റികൾ വിറ്റഴിച്ചുവെന്ന് എക്സ്ചേഞ്ച് ഡാറ്റ വ്യക്തമാക്കുന്നു. ഗണേശ ചതുർത്ഥി പ്രമാണിച്ച് ഓഹരി വിപണികൾക്ക് ചൊവ്വാഴ്ച അവധിയായിരുന്നു.

11 ദിവസത്തെ റാലി അവസാനിപ്പിച്ച്, ബി‌എസ്‌ഇ ബെഞ്ച്മാർക്ക് 241.79 പോയിന്റ് (0.36 ശതമാനം) ഇടിഞ്ഞ് തിങ്കളാഴ്ച 67,596.84 ൽ എത്തി. വിശാലമായ നിഫ്റ്റി 59.05 പോയിന്റ് (0.29 ശതമാനം) ഇടിഞ്ഞ് 20,133.30ൽ അവസാനിച്ചു.